Martın 11-də Gümrü-İrəvan marşrutu ilə hərəkət edən “Cənubi Qafqaz Dəmir Yolu” şirkətinin elektrik qatarına basqın olub. Belə ki, bir neçə nəfər qatara daş ataraq şirkətə maddi ziyan vurub.
Hadisə Noraqvit-İrəvan sərnişin qatarında baş verib. Atılan daşlardan biri elektrik qatarının şüşəsini sındırıb. Qatarda çoxsaylı sərnişin olsa da, onlardan heç biri xəsarət almayıb. Hadisə ilə bağlı hüquq-mühafizə orqanlarına məlumat verilib. “Cənubi Qafqaz Dəmir Yolu” şirkəti bəyan edib ki, bu cür xuliqanlıq hərəkətləri bunu törədənlər üçün hüquqi nəticələrlə yanaşı, sərnişinlərin həyat və sağlamlığı üçün də təhlükə yaradır.
Erməni mediası bunu sıradan xuliqanlıq hadisəsi kimi qələmə versə də, əslində bu, Rusiyaya qarşı münasibətin ifadəsidi. Nəzərə almaq lazımdır ki, “Cənubi Qafqaz Dəmir Yolu” şirkəti Rusiyaya məxsusdur. Bu şirkət Ermənistanda fəaliyyət göstərsə də, səhmləri Rusiyaya məxsusdur. O baxımdan bu, əslində Rusiyaya atılan daş deyilmi?
“Qatara atılan daş Rusiyaya qarşı yönələn qəzəbin göstəricisidir”
Məsələyə münasibət bildirən AMİP funksioneri Əli Orucovun fikrincə, bütün bunlar Ermənistanda getdikcə güclənən anti-Rusiya ovqatının tərkib hissəsidir: “O baxımdan bəli, qatara atılan daş Rusiyaya qarşı yönələn qəzəbin göstəricisidir. Onsuz da Rusiyaya qarşı antipatiya var idi. Bunun nəticəsi idi ki, 2018-ci ildə Serj Sarkisyan devrildi. 44 günlük Vətən müharibəsindən sonra Rusiyaya qarşı nifrət daha da gücləndi. Bu gün Ermənistanın bir sıra media orqanlarında nəinki Rusiya kəskin tənqid olunur, hətta bu ölkənin prezidenti Vladimir Putin ən vülqar formada təhqir edilir. Ermənilər elə bir məxluqdular ki, heç vaxt nə iləsə kifayətlənməyəcəklər. 1918-ci ildə tarixi Azərbaycan əraziləri hesabına yoxdan Ermənistan yaradıldı. 1920-ci ildə 20 min kvadrat kilometr ərazimiz Ermənistana verildi. O vaxt belə fikir ortaya atılmışdı ki, Zəngəzur Ermənistana verilsə, ermənilər Qarabağla bağlı ərazi iddiaları ilə çıxış etməyəcəklər. Ancaq bütün bunların tam əksini gördük. İndi də Ermənistanda belə bir fikir var ki, Rusiya onların yerinə Azərbaycanı ilhaq etsin. Dava bunun davasıdır. Bu səbəbdən İrəvanda Rusiyaya qarşı mitinqlərin keçirilməsi adi hala çevrilib. Rusiyanın İrəvandakı səfirliyi qarşısında, Gümrüdəki 102-ci bazanın önündə aksiyaların keçirilməsi adi hala çevrilib. Görünən odur ki, bütün bunlarla ermənilər kifayətlənmək fikrində deyillər. Ona görə də səhmləri Rusiyaya məxsus olan “Cənubi Qafqaz Dəmir Yolu” şirkətinin qatarlarını daşqalaq edirlər. Bu baxımdan hesab edirəm ki, baş verənlər sıradan bir kriminal hadisə deyil. Çox güman ki, Ermənistanla Rusiya arasında konfrontasiya daha da dərinləşəcək. Yəni bu təkcə qatarın daşqalaq edilməsi ilə bitməyəcək. Nəzərə almaq lazımdır ki, Avropa İttifaqı monitorinq missiyası Ermənistana gələndən sonra ermənilər daha cəsarətlə Rusiyaya qarşı çıxışlar edirlər. Fikrimcə, bu əsla təsadüfi deyil. Hələlik bəzi amillər Rusiyanı Ermənistandan çıxarmağa imkan vermir. Ancaq əminəm ki, Rusiya Ukraynada uduzsa, bu ölkənin Ermənistandandan çıxması qaçılmaz olacaq”.
Vudadi ORDAHALLI
