NATO-nun sabiq Baş katibi, siyasi məsləhətləşmələr üzrə "Rasmussen Global" təşkilatının təsisçisi Anders Foq Rasmussen Ermənistanda səfərdədir.
O, Ermənistanın Baş naziri Nikol Paşinyan və müdafiə naziri Suren Papikyanla görüşüb. Görüşdə regional təhlükəsizlik vəziyyəti müzakirə olunub.
Qeyd edək ki, Rasmussen 2009-2014-cü illərdə NATO-nun Baş katibi postunda çalışıb. Bu, Rasmussenin Ermənistana ilk səfəri deyil, o, ilk dəfə 2012-ci ilin sentyabrında NATO-nun baş katibi olarkən İrəvana səfər edib.
Bəllidir ki, Rasmussenin İrəvana səfəri və onun yüksək çinli rəsmilərlə görüşü təsadüfi xarakter daşımır. Ermənistan KTMT hərbi blokunda təmsil olunsa da, son vaxtlar ona qarşı həm praktik addımlarla, həm də bəyanatlarla çıxış edir. Belə olan halda, Paşinyan Rasmussenlə nəyi müzakirə edə bilər?
Hərbi siyasi-ekspert Emin Həsənli qəzetimizə bildirdi ki, Paşinyanın Qərbin layihəsi olması heç kimə sirr deyil: “ABŞ başda olmaqla, Qərbin dəstəyi ilə hakimiyyətə gəlib. Fransa da onu çox dəstəkləyir. Çalışırlar ki, Rusiyanın təsir dairəsindən çıxıb, Qərbi öz tərəflərinə çəkələr. Burada Ermənistanın İranla sərhədi, hərbi maraqların da olması heç də sirr deyil. Ermənistan isə bu məsələləri bir neçə istiqamətdən aparır. Həm İranla hərbi əməkdaşlığını dərinləşdirir, həm Rusiyanın orda hərbi bazaları var, qısa müddətdə ordan çıxara bilməyəcək. Birdən - birə radikal dəyişiklik Ermənistan kimi kiçik dövlət üçün çox böyük faciələr gətirə bilər. Bu belə də olmalıdır. Ermənistan buna layiqdir. Rusiya ekspertləri haqlı olaraq qeyd edir ki, Ermənistanı dövlət kimi biz yaratmışıq, Ermənistanı biz Cənubi Qafqaza gətirmişik, Azərbaycan torpaqlarını biz alıb vermişik Ermənistana. Ermənistanın tarix boyu fəaliyyətini incələyəndə görürsən ki, onlar həmişə böyük dövlətlərin əlində alət olub, onların maraqlarını həyata keçirib. Bu, Ermənistan üçün bir vasitədir. Amma bu dəfə siyasətlərini həyata keçirə bilməyəcəklər. Hesab edirəm ki, daha böyük problemlərlə üzləşəcəklər. Ermənistanın həm iqtisadi, həm siyasi problemi səbəbindən Rusiya ilə Qərb arasında seçim etməsinin məcburluğu Hayastanı (Ermənistanı) çətin duruma salır. Paşinyanın hakimiyyətə gətirilməsi, 2021-ci il müharibəsindən sonra Paşinyanın qorunub saxlanması, Amerikanın ən böyük səfirliyinin Ermənistanda olması, Qərb institutlarının Ermənistanda sıx işləməsi onu deməyə əsas verir ki, bütün gücləri ilə Ermənistanda fəaliyyətlərini daha da gücləndirmək və Rusiyanı bölgədən sıxışdırıb çıxarmaq istəyirlər. Ona görə də, Rusiya bütün gücü ilə bölgədə qalmaq və imkanlarını daha da genişləndirmək istəyir. Ermənistanın yaxın zamanda tək siyasi yox, həm də hərbi poliqona çevriləcəyi gözlənilir”.
İkiüzlülük Ermənistanın klassik üslubudur. Tarix boyu hələ dövlətçiliklərinin mövcud olmadığı zamanlarda belə bir-birinə tamamilə rəqib olan dövlətlərlə əməkdaşlıq edərək, mövcudluqlarını təmin etməyə çalışıblar. Mahiyyət etibarı ilə bu da Emmənistanın ikibaşlı oyununu sübuta yetirir. Bir tərəfdən Rusiya ilə hərbi əməkdaşlığının yüksək səviyyədə olduğunu və onun atdığı addımlarda iştirak etdiyini ortaya qoymaq istəyir. Digər tərəfdən isə bunun belə olmadığını sübut etmək üçün NATO qarşısında özünü təmizə çıxarmağa çalışır. Ermənistan qırıcılarının Ukraynadakı hərbi əməliyyatlarda iştirak etməsi faktdır və həmin təyyarələrin hərəkəti üzrə müvafiq qaydada kosmik görüntülər əldə olunmaqla sübuta yetirilib. Buna baxmayaraq, NATO ilə də əməkdaşlıq edir.
Məhəmmədəli QƏRİBLİ
