Uzun illərdir ki, Hayastan (Ermənistan) beynəlxalq təşkilatların himayəsi altında öz işğalçı, irticaçı fəaliyyətini ortaya qoyur. Eyni zamanda da bu ölkə dünyada yeganə monoetnik dövlətdir ki, xalqlar dostluğunu əlində bayraq edən Avropa Parlamenti və onun kimi başqa təşkilatlar buna göz yumurlar.
Şübhəsiz, burada onların öz maraqları var. Bu öz yerində. Halbuki, monoetniklik irqçiliyin, dini, milli ayrı-seçkiliyin ana qaynağıdır ki, Hayastan da bu sahədə liderdir.
Dünən olduğu kimi, bu gün də Avropa Parlamenti Hayastanı o ki var, dəstəkləyir, qoruyur.
Avropa Parlamenti Ermənistan kimi genosidçi, monoetnik bir ölkəni niyə belə müdafiə edir? Səbəb nədir?
“...Bu səbəbdən də onun monoetnikliyinə də, irqçi siyasətinə də, törətdiyi genosidlərə də göz yumur”
AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə bildirdi ki, Avropa Parlamenti hər zaman ermənipərəstliyi ilə seçilib. “Qərbi Avropa, o cümlədən də Amerika daim öz milli maraqlarından istifadə edirlər. Çörçillin bir sözü var: İngiltərənin daimi dostları yoxdur, daimi maraqları var. Erməni kartından zaman-zaman əvvəl Rusiya, sonra İngiltərə, Fransa və digər ölkələr istifadə edib. Bu gün də müxtəlif ölkələr, onların təsiri altında olan beynəlxalq təşkilatlar, o cümlədən də Avropa Parlamenti erməni kartından hər zaman təzyiq vasitəsi kimi istifadə edir. Bu baxımdan, Avropa Paralamenti burada təmsil olunan dövlətlərin əksəriyyətinin maraqlarından çıxış edərək genosidçi, irqçi, monoetnik Ermənistanı müdafiə edir. O da gizlin deyil ki, bu təşkilatda da erməni lobbisinin təsiri altında olan muzdlu deputatlar var”.
M.Zülfüqarlı qeyd etdi ki, həmin təşkilatlar erməni kartından həm Azərbaycana, həm də qardaş Türkiyəyə qarşı daim təzyiq vasitəsi kimi istifadə etməyə çalışır. M.Zülfüqarlı xatırlatdı ki, Türkiyə Avropa Birliyinə üzv olmaq istəyərkən onun qarşısına “erməni soyqırımını tanı, səni qəbul edək” tələbini qoydular, halbuki, tarixdə belə genosid baş verməyib. Bu gün Avropa Parlamenti də, başqa qurumlar da saxta genosid iddiası ilə Türkiyəyə təzyiq göstərməyə cəhd edirlər. 30 ilə yaxın bir müddətdə Azərbaycan torpaqlarının erməni işğalında olduğunu deyən M.Zülfüqarlı bildirdi ki, həmin beynəlxalq təşkilatlar bizi işğal faktı ilə barışmağa sövq edirdilər, onlar Azərbaycan xalqının işğalla barışacağını güman edirdilər, amma yanıldılar. “Onlar bunu ona görə edirdilər ki, Ermənistan yeni-yeni ərazi iddiaları ilə çıxış etsin. Amma Azərbaycan buna imkan vermədi və torpaqlarını azad etdi. Halbuki, bu işlə ATƏT-in Minsk qrupu məşğul olmalı idi, onlar da bura turist səfərinə gəlirdilər deyə, bir nəticə hasil olmurdu. Fransa ATƏT-in Minsk qrupunun həmsədri olsa da, öz qatı ermənipərəst mövqeyini ortaya qoyurdu. Bu gün Avropa Parlamentinin tərəf nümayiş etdirməsinin, ermənilərin tərəfini tutmasının əsas səbəblərindən biri odur ki, bu qurum Ermənistan vasitəsilə bölgədə öz maraqlarını təmin etməyə çalışır.
Şuşa bəyannaməsindən sonra bölgədə Türkiyə və Azərbaycanın birgə güclənməsi onları çox ciddi narahat edir. Azərbaycan-Türkiyə birliyinin bölgədə güc faktoruna çevrilməsinin qarşısını almaq üçün Avropa Parlamenti Ermənistana bu cür saxta dəstək verir. Əslində, əsas məqsəd Ermənistana havadarlıq etmək deyil, regionda öz maraqlarını təlqin etməkdir, bunun üçün də Ermənistandan alət kimi istifadə edirlər. Ermənistan hazırda Avropa Parlamentinə Azərbaycan və Türkiyə birliyinə qarşı istifadə etmək üçün lazımdır, bu səbəbdən də onun monoetnikliyinə də, irqçi siyasətinə də, törətdiyi genosidlərə də göz yumur. Əslində, Azərbaycan türklərinin erməni daşnakları tərəfindən genosid edilməsi Qərb təşkilatlarının da işinə yarayır...”
M.Zülfüqarlı hesab edir ki, Avropa Şurası da, Avropa İttifaqı da, Avropa Parlamenti də, başqa təşkilatlar da Ermənistandan öz maraqlarını həyata keçirmək üçün istifadə edir, yeri gələndə onu kukla kimi oynadır, istədiyi yerə yönəldir. “Ermənistan müstəqil dövlət deyil və forpostdur. Ona görə də onun sahibi çoxdur. Avropa Parlamenti də, başqa qurumlar da, ölkələr də ondan öz məqsədləri üçün alət kimi istifadə edirlər” - deyə M.Zülfüqarlı qeyd etdi.
İradə SARIYEVA
