Prezidentin köməkçisi, Azərbaycan Prezidenti Administrasiyasının xarici siyasət məsələləri şöbəsinin müdiri Hikmət Hacıyev müsahibəsində bildirib ki, Ermənistan məqsədli şəkildə prosesi pozaraq Azərbaycanla sülh müqaviləsini imzalamaqdan yayınır və vaxt udmağa çalışır:
“Qazax rayonunun 7, Naxçıvanın isə 1 kəndi hələ də işğal altındadır. Laçın yolundan hərbi məqsədlər, o cümlədən silah-sursatın, minaların daşınması, şəxsi heyətin rotasiyası üçün istifadə olunurdu. Ermənistan, 10 noyabr bəyanatına zidd olaraq, Zəngəzur dəhlizi ilə bağlı öhdəliklərini də yerinə yetirmir. Azərbaycanın qərb rayonlarından Naxçıvana bugünə qədər bir maşın belə keçməyib.
2022-ci ildə Praqa və Soçidə keçirilmiş görüşlərdə Ermənistanın Azərbaycanın ərazi bütövlüyü və suverenliyini tanımasına baxmayaraq, baş nazir və digər Ermənistan rəsmiləri tərəfindən vəziyyəti qəsdən gərginləşdirən, Azərbaycanın suverenliyini və ərazi bütövlüyünü sual altına qoyan, təhdid edən açıqlamaların verilməsi, addımların atılması davam edir və bu xətt son vaxtlar daha da güclənir”.
Maraqlıdır, dünya birliyi niyə əsl blokadadan danışmır, yalnız Laçın yolu ilə bağlı əsassız iddialar səsləndirir?
Politoloq Əhəd Məmmədli qəzetimizə açıqlamasında bildirdi ki, bunun bir çox səbəbləri var: “Türkiyədəki zəlzələ və prezident seçkilərinə hazırlıq düşmənimizin və onun havadarlarının əl-qolunu açıb: “Onların xarici havadarları olan Rusiya, Fransa və ABŞ kimi hegemon ölkələr bundan istifadə edib, ölkəmizin üstünə gəlirlər. Son zamanlar biz diplomatik müstəvidə də uğur görürük. Azərbaycan rəsmilərinin bu yöndə olan açıqlamaları məzmun baxımından doğrudur, ancaq zaman anlamında bir qədər geçikir. Biz belə kəskin açıqlamaları bir müddət əvvəldən verməliydik. Azərbaycan Ermənistana hiss etdirməlidir ki, ümidlənməsi İrəvana ciddi ziyanlar verə bilər. Həm hərbi, həm də diplomatik müstəvidə biz düşmənə ciddi xəbərdarlıqlar etməliyik ki, onun havadarları da ayılsın. Azərbaycan, Ermənistan və Rusiya arasında imzalanmış üçtərəfli sazişin bəndlərini biz icra edirik. Laçın yolu ilə bağlı nəzərdə tutulan işlər icra olunub. Əraziyə rusiyalı sülhməramlılar nəzarət edir. Ermənistan həmin yoldan istifadə edə bilir. İndi insanları ən çox düşündürən suallardan biri də Naxçıvanla dəhlizin nə zaman yaradılacağı ilə bağlıdır. Bu, türk dünyasını da birləşdirəcək yol olacaq. Beynəlxalq layihə olduğu üçün, ola bilsin, ermənilər də burdan mənfəət əldə edəcəklər. Ermənistan həmişə beynəlxalq layihələrdən kənar tutulub və təcrid olunmuş vəziyyətdə qalıb. Hər halda, Ermənistanın ağıllı adamları başa düşməlidirlər ki, bu layihə onlara mənfəət gətirə bilər, eyni zamanda indiyə kimi Ermənistanın düşdüyü blokada şəraitindən çıxmasına misilsiz dərəcədə yardım göstərə bilər.
Təəssüflər olsun ki, Naxçıvanın blokadadan çıxarılması üçün nə Fransa, nə də Avropa Birliyi Ermənistanın 10 noyabr bəyanatında Naxçıvana quru dəhlizlə bağlı üzərinə götürdüyü öhdəlikləri yerinə yetirməsinə nəzarət etmir. Eyni zamanda günü bu gün də Ermənistan tərəfindən Zəngəzur dəhlizinin açılması ilə bağlı proseslər əngəllənir, bunun qarşısında süni maneələr yaradılır. Belə olan təqdirdə bu gün erməni havadarlarının Laçın yolu ilə bağlı hər hansı qondarma, uydurma ittihamlar əsasında süni gündəm yaratmaq cəhdləri ədalətsizlikdir. Bir çox avropalı siyasətçilər Azərbaycana yanaşmada bütün ədalət meyarlarını tamamilə unudublar. Belə olan təqdirdə belə qeyri-səmimi siyasətçilərin Naxçıvanın taleyi ilə bağlı hər hansı bir qərar verəcəyini gözləmək yersizdir.
Beynəlxalq güclər bu məsələdə Ermənistandan siyasi təsir vasitəsi kimi istifadə edirlər və güclənən Azərbaycan-Türkiyə faktoruna qarşı Ermənistanı qızışdıranlar Laçın yolu ilə bağlı lüzumsuz mövqe ortaya qoyurlar. Əsl blokadada qalan Naxçıvandır, Qarabağdakı ermənilər yox”.
Məhəmmədəli QƏRİBLİ
