Ermənistan xarici işlər naziri Ararat Mirzoyan Misirin paytaxtı Qahirədə Ərəb Dövlətləri Liqası Şurasının nazirlər səviyyəsində keçirilən iclasında iştirak edib. Mirzoyan, hər zaman olduğu kimi, bu dəfə də fürsətdən maksimum istifadə edərək, iclasda Azərbaycan əleyhinə iftira məzmunlu yalanlar danışıb, Ermənistanın müsəlman aləmi ilə sıx əlaqələrindən bəhs edib.
Qəribəsi odur ki, iclasda iştirak edən ərəb ölkələri nazirlərinfdən heç biri işğal dövründə Ermənistanın Qarabağda müsəlman abidələrinin məhvindən danışmayıb. Tədbirdə iştirak edənlərdən bir nəfər soruşmayıb ki, Qarabağdakı məscidləri niyə dağıtmısız? Məscidlərə niyə donuz bağlayıb müqəddəs məkanları təhqir etmisiniz? Ən təəccüblüsü odur ki, 2022-ci il noyabrın 1-də Əlcəzairdə keçirilən Ərəb Dövlətləri Liqasının 31-ci zirvə toplantısında Azərbaycan iştirak etdiyi halda, Qahirədə keçirilən tədbirə Azərbaycan dəvət edilməyib. Ancaq Ermənistan dəvət edilib. Xristian Ermənistan dəvət olunduğu halda müsəlman Azərbaycan niyə dəvət olunmayıb?
“Tədbirə Azərbaycanın dəvət olunmaması daha çox Misirin istəyi ilə bağlı olub”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, ərəb ölkələrinin işğal dövründə müsəlman abidələri ilə bağlı törədilən vandalizmi görməzdən gəlmələri təəssüf doğurur: “Halbuki, bununla bağlı Mirzoyana bir sıra suallar vermək mümkün idi. Ən azından ona görə ki, bununla bağlı yetərincə faktlar var idi. Ancaq müsəlman həmrəyliyindən dəm vuran ərəb ölkələri bütün bunları görməzdən gəldilər. Digər tərəfdən, tədbirə kim ev sahibliyi edirsə, ölkələri də o dəvət edir. Çünki tədbirin keçirildiyi ölkənin buna səlahiyyəti var. Ərəb Dövlətləri Liqası Şurasının toplantısına Ermənistanın dəvət olunması yəqin ki, hansısa beynəlxalq formatlarla bağlıdır. Məsələ ondadır ki, dünyanın özündə də qütübləşmə var. Bu amilin də təsiri var. Başqa bir tərəfdən, Misirlə Ermənistan arasında münasibətlər çox yaxındır. Bütün hallarda, tədbirə Azərbaycanın dəvət olunmaması daha çox Misirin istəyi ilə bağlı olub. Xristian Ermənistan tədbirə dəvət olunduğu halda, Azərbaycanın dəvət olunmaması müsbət hal deyil. O da ola bilər ki, Ərəb Dövlətləri Liqası görünür bununla balansı qorumağa çalışır. Hesab edirlər ki, ötən il qurumun tədbirində Azərbaycan iştirak etdiyi üçün, bu il Ermənistan dəvət olunsun. Bununla sanki hər iki dövlətə neytral yanaşmaq istəyirlər. Ancaq ərəb dövlətləri içərisində xristian ölkələr, təmsilçilər də var, Çox guman ki, bəzi ərəb ölkələrində olan erməni lobbisinin də bunda müəyyən rolu olub. Ötən ay Misir prezidenti Azərbaycan və Ermənistanda səfərdə olub. Ola bilsin ki, bu görüşlərdə Ermənistanın dəvət olunması müzakirə olunub. Əslində Ərəb Dövlətləri Liqası beynəlxalq münasibətlər sistemində elə bir söz sahibi deyil. Hansısa güclü təsir imkanına malik olan təşkilat deyil. Ancaq hər halda dünyada 22 ərəb ölkəsi var və belə bir qurumun tədbirində iştirak etmək Azərbaycan üçün yaxşı olardı. Hesab edirəm ki, Azərbaycan diplomatik kanallarla bununla bağlı öz narahatlığını bildirməlidir. Çünki məntiqlə Azərbaycanın bir müsəlman ölkəsi olaraq ora dəvət olunması daha doğru olar, nəinki Ermənistanın. İstənilən halda, Azərbaycan hansısa formada buna öz etirazını bildirməlidir”.
Vidadi ORDAHALLI
