“Bu gün biz soyuq müharibənin bitməsindən sonra bugünədək baş vermiş bəlkə də ən ciddi Şərq-Qərb qarşıdurmasının şahidi oluruq”. Bunu Prezident İlham Əliyev Bakıda işə başlayan “Dünya bu gün: Çağırışlar və ümidlər” mövzusunda X Qlobal Bakı Forumunun açılış mərasimində çıxışında deyib.
Ölkə başçısının fikrincə, münaqişələrin həllində yeni yanaşmaların formalaşdırılmasında Hərakat mühüm rol oynaya bilər: “Qoşulmama Hərəkatı körpülərin salınmasında, münaqişələrin həllində yeni yanaşmaların formalaşdırılması və Qoşulmama Hərəkatının təməl prinsiplərinin – Bandunq Prinsiplərinin təmin edilməsində mühüm rol oynaya bilər və oynamalıdır. Həmin prinsiplər – sülh, əməkdaşlıq, ərazi bütövlüyünə və suverenliyə hörmət, habelə sərhədlərin toxunulmazlığından ibarətdir”.
Bütün bunlar onu göstərir ki, dünyada bir sıra məsələlərin həllində QH-nin rolu artmalıdır.
“Azərbaycanın QH vasitəsilə münaqişələrin dayandırılması çağırışları yüksək qiymətləndirilməlidir”
Məsələyə münasibət bildirən AMİP-in sədr müavini Afsəddin Nəbiyev hesab edir ki, Qoşulmama Hərəkatının bununla bağlı daha fəal olmasına zərurət var: “Həqiqətən, hazırda yaşadığımız mürəkkəb tarixi şəraitdə bir çox dövlətlərin bir-birilə müharibə vəziyyətində olmaları bütün dünya ölkələrinə ciddi şəkildə təsir edir. Bu konfliktlərə siyasi nöqteyi-nəzərdən baxsaq görərik ki, Şərq-Qərb qarşıdurması bəzi hallarda bəşəriyyətin dinc nizamını təhdid etməkdədir. Hazırda dünyanın yeni düzəninin formalaşdığı bir dövrdə barışdırıcı, neytral güclərin olmasına böyük ehtiyac yaranıb. Problem ondadır ki, müharibələr davam etdikcə daha böyük fəlakətlər baş verir. Şəhərlər xarabazara çevrilir, dinc insanlar həlak olur, yüz illərlə böyük zəhmət hesabına qurulmuş infrastruktur tamamilə sıradan çıxarılır. Bütün bunlar çox ciddi fəlakətlərdir. Biz Azərbaycan xalqı bütün bu ağrı-acını son 30 ildə yaşamışıq. Müharibənin, işğalın nə olduğunu bilirik. Baxmayaraq, Ermənistanın işğalçılıq siyasəti nəticəsində Azərbaycan xalqı və dövləti olaraq böyük faciələr yaşadıq. Bununla belə, bölgəmizdə sülh təşəbbüslərini ilk olaraq Azərbaycan dəstəkləyir. Tarixdə də hər zaman belə olub. Müharibələrdə ağrı-acı çəkən dövlətlər sülhün qorunması üçün daha çox səy göstərirlər. Ona görə də Azərbaycanın Qoşulmama Hərəkatı vasitəsilə münaqişələrin dayandırılması çağırışları yüksək qiymətləndirilməlidir. Dünya dövlətləri, ərazi baxımından böyük və kiçik olmasından asılı olmayaraq, bir-birinin ərazi bütövlüyünə, suverenliyinə hörmətlə yanaşmalıdır. Bütün bunları Bandunq prinsipləri ilə yanaşı Beynəlxalq Konvensiyaların prinsipial qətnamələri tələb edir. Bu baxımdan, Azərbaycan Qərb və Şərq dövlətləri arasında balanslı siyasət yeritməklə öz xarici siyasət kursunda əməkdaşlığın, dostluğun və tolerantlığın əsas prinsiplər olduğunu bir daha bütün dünyaya nümayiş etdirir. Azərbaycanın Şərqlə Qərb arasında körpü rolunu oynamaqla qarşıdurmaların qarşısının alınması üçün sülh, barış təşəbbüsləri yüksək qiymətləndirilməlidir”.
Vidadi ORDAHALLI
