“Azərbaycan çoxkonfessional, multietnik ölkədir. Azərbaycanda milli azlıqların hüquqları Konstitusiyamız tərəfindən qorunur”. Bu barədə Azərbaycan Prezidenti İlham Əliyev martın 9-da Bakıda işə başlayan "Dünya bu gün: Çağırışlar və ümidlər” mövzusunda X Qlobal Bakı Forumunun açılış mərasimində çıxışında bildirib.
Müxtəlif etnik qrupların və konfessiyaların nümayəndələrinin Azərbaycanda ləyaqətli və dinc şəraitdə yaşadıqlarını vurğulayan Prezident deyib: "Ona görə əminəm ki, Azərbaycanın Qarabağ regionunda yaşayan ermənilərin həyatı, işğal dövründən fərqli olaraq, bundan sonrakı dövrdə daha yaxşı olacaq”.
“Onlar illər boyudur ki, separatçıların boyundurğu altında qara gün çəkirlər, amma Azərbaycan vətəndaşı kimi onları yüksək rifah, firavan həyat gözləyir”
Prezidentin “Qarabağda yaşayan ermənilərin həyatı bundan sonra daha yaxşı olacaq” bəyanatını şərh edən AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə bildirdi ki, dünyada 3 mindən artıq millət, 300-ə yaxın dövlət var, dövlətlərin də əksəriyyəti çoxmillətli dövlətdir: “Bu gün dünyada Ermənistandan başqa monoetnik, monomilli dövlət yoxdur. Çünki orada yaşayan digər millətləri qovub çıxardılar. Bu da ermənilərin faciəsidir. Yəni Ermənistanı çıxmaq şərtilə XXI əsrdə mövcud olan dövlətlərin hamısı çoxmillətli tərkibə malikdir. Milli azlıqlar, milli çoxluqlar var. Azərbaycanda tarixən, xüsusilə də kapitalizmin, neft sənayesinin inkişafı ilə əlaqədar çoxmillətli tərkuib formalaşıb. Ölkə əhalisinin 90 faizi Azərbaycan türkləri, 10 faizi isə milli azlıqlardır. Azərbaycanda heç zaman milli ayrıseçkilik siyasəti olmayıb. Hazırda da milli azlıqlar Azərbaycan vətəndaşları olaraq konstitusion hüquqlarından tam istifadə edirlər. Qaldı Qarabağda yaşayan ermənilərə, onlar böyük dövlətlərin öz siyasətlərinə uyğun daim istifadə etdikləri milli azlıq olaraq XX əsrin sonlarından separatizmə bilavasitə cəlb edildilər. Bundan da nəinki Qarabağ erməniləri, hətta Ermənistan da itirdi. Yəni Ermənistan bu proseslərə qoşulmasaydı, qonşu Azərbaycanla mehriban qonşuluq siyasəti yeritsəydi əsrin müqaviləsini imzalayanların istəyi vardı ki, Bakı-Tbilisi-Ceyhan kəməri Ermənistan ərazisindən keçsin. Fikir verin, əgər belə olardısa Ermənistan tranzit kəmərlərin keçdiyi ölkə kimi bundan nə qədər qazanardı. Amma buna məlum dövlətlər, xüsusən Rusiya imkan vermədi. Rusiya Bakı-Tbilisi-Ceyhan neft kəmərinin çəkilməsində maraqlı deyildi. Çünki Azərbaycan neftinin də Bakı-Qrozni-Novorossiysk xətti ilə daşınmasını istəyirdi. Rusiya o zaman bunun əleyhinə olsa da, lakin bunun qarşısını ala bilmədi. Amma separatizmi körüklədilər, bu separatizmdən isə, dediyim kimi, nə Qarabağda yaşayan ermənilər, nə də Ermənistan əhalisi bir xeyir gördü.
Azərbaycan Prezidentinin çıxışında qeyd etdiyi kimi, gələcəkdə əgər Qarabağda yaşayan ermənilər konstitusiyamızda olan vətəndaşlıq hüququnu qəbul edərlərsə, Azərbaycan qanunlarına riayət edib ona hörmətlə yanaşarlarsa, əlbəttə, onların həyat şəraiti indikindən qat-qat yaxşı olacaq. Hesab edirəm ki, Qarabağda yaşayan ermənilər Azərbaycan Prezidentinin mesajında öz gələcəklərini aydın şəkildə görürlər və irəliyə addım atacaqlar. Onlar illər boyudur ki, separatçıların boyundurğu altında qara gün çəkirlər, amma Azərbaycan vətəndaşı kimi onları yüksək rifah, firavan həyat gözləyir. Azərbaycan Cənubi Qafqazın ən varlı, ən güclü dövlətidir. Yəni milli azlıq olan ermənilər separatizmdən əl çəkərlərsə, Azərbaycan cəmiyyətinə inteqarsiya edərlərsə onların həyat şəraiti Ermənistanda yaşayan ermənilərin həyat şəraitindən qat-qat yüksək olacaq. Hələ Ermənənistanda yaşayan erməni əhali Azərbaycan vətəndaşı olan erməni əhaliyə gələcəkdə qibtə edə bilər. Bu baxımdan, Prezident çox zamanında, vaxtında dəqiqliklə bu mesajı verir”.
M.Zülfüqarlı qeyd etdi ki, separatçıların zülmündən, kənardan ixrac edilən düşmənçilikdən artıq erməni əhali də bezib, ona görə də onların bir hissəsi inteqrasiyaya hazırdır. Amma yenə də onları təzyiq altında saxlayan qüvvələrin mövcud olduğunu deyən M.Zülfüqarlı hesab edir ki, gələcəkdə bu qüvvələr neytrallaşdırılarsa, onlar Azərbaycan cəmiyyərtinə sürətlə inteqrasiya edə bilərlər və yüksək həyat şəraiti əldə edərlər. Azərbaycanın dünya üçün bir nümunə olduğunu deyən M.Zülfüqarlının sözlərinə görə, ötən əsrin 90-cı illərində 30 min erməni əhalimiz olub, indi yəqin onların sayı artıb, Qarabağda yaşayan ermənilər də bu sıraya daxil olarsa onlar Azərbaycanın həqiqətən də tolerant, multikultural bir dövlət olduğunu görərlər. M.Zülfüqarlı qeyd etdi ki, bunu sübut edən çoxlu amillər var...
İradə SARIYEVA
