Tehran rejimi Azərbaycanın böyük şairi Nizami Gəncəviyə də, onun anadan olduğu, dəfn edildiyi, məqbərəsinin ucaldıldığı Gəncə şəhərinə qarşı da iddia irəli sürməkdədir. Tehranda “Nizami Gəncəvi həftəsi”nin açılış mərasimi keçirilib.
İran Xarici İşlər Nazirliyinin sözçüsü Nasir Kənani martın 5-də Nizami Gəncəvinin anım həftəsinin açılış mərasimində deyib: “Fars dili məhəbbət, dostluq və irfan dilidir. Şübhəsiz, Nizaminin özünəməxsus yeri var və onunla müqayisə oluna bilən böyük şairlər azdır”. O deyib ki, Nizami Gəncəvi “indiki Azərbaycanın Gəncə şəhərində doğulub və məzarı oradadır”.
Göründüyü kimi, İran Xarici İşlər Nazirliyinin sözçüsü Nasir Kənani Gəncənin guya “İran şəhəri” olduğunu iddia edib.
Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə martın 9-da “Dünya bu gün: Çağırışlar və ümidlər” mövzusunda X Qlobal Bakı Forumu işə başlayıb.
Məsələ burasındadır ki, Tehranda X Qlobal Bakı Forumu ərəfəsində Nizami Gəncəvi ilə bağlı tədbir keçiriib. Tehran rejiminin Nizami Gəncəvi ilə bağlı tədbir keçirməsinin Bakıda öz işinə başlayan X Qlobal Bakı Forumu ilə eyni ərəfəyə düşməsi təsadüfidirmi? Molla rejiminin məqsədi nə olub ki, ona aid olmayan bir mövzuda nüfuzlu beynəlxalq tədbir ərəfəsində qondarma tədbir düzənləsin?
Yeri gəlmişkən, Prezident İlham Əliyev X Qlobal Bakı Forumunun açılış mərasimində molla rejiminin iddiasına layiqli cavab verib. “Nizami Gəncəvi Azərbaycanın qədim şəhərlərindən biri olan doğma Gəncə şəhərində anadan olub, yaşayıb, dünyasını dəyişib və dəfn edilib. Onun müdrikliyi və istedadı isə Azərbaycan xalqının müdrikliyini və istedadını simvolizə edir”, - deyə Prezident İlham Əliyev bildirib.
“Prezidentin Nizami Gəncəvi ilə bağlı dedikləri də farsçılara, panfarsist qüvvələrə, fars şovinstlərinə təkrar ismarıcdır ki…”
Orta Doğu Araşdırma Mərkəzinin rəhbəri Sədrəddin Soltan “Bakı-Xəbər”ə şərhində bildirdi ki, İran 100 ilə yaxındır panfarsçı ideologiya ilə idarə olunur. “İndiki rejim də bu ideologiyanın quludur. İslam dini bu şovinist siyasəti pərdələmək üçün bir maskadır. İran hakimiyyəti güneyli-quzeyli Azərbaycana, türkə münasibətini gizlətməyə çalışsa da, buna nail ola bilmir. Tehran rejimi Güney Azərbaycan türkünün milli varlığını görməzdən gəlir. Güney Azərbaycan torpaqlarını parçalayıb, yeni əyalətlər yaradır. Azərbaycana, türkə məxsus yer adlarını, coğrafi adları farslaşdırır, mədəni tarixi abidələri dağıdır, onun farslara məxsus olduğunu iddia edir.
Heydər Əliyevin 2002-ci ilin mayında Tehrana rəsmi səfəri zamanı İranın ali rəhbəri ayətullah Seyid Əli Xamneiyə Azərbaycan türkcəsinin dövlət dili olması və bu ölkənin o vaxtkı prezidenti Məhəmməd Xatəmiyə Xəzər dənizinin adı ilə bağlı vurduğu “şapalaq” hər kəsin yadındadır. Bununla yanaşı, bu şovinist hakimiyyət Azərbaycan türklərinin dahi şəxslərini də farsların adına çıxmaq istəyir.
İran Xarici İşlər Nazirliyinin sözçüsü Nasir Kənani martın 5-də Nizami Gəncəvinin anım həftəsinin açılış mərasimində deyib: “Fars dili məhəbbət, dostluq və irfan dilidir. Şübhəsiz, Nizaminin özünəməxsus yeri var və onunla müqayisə oluna bilən böyük şairlər azdır”. O deyib ki, Nizami Gəncəvi “indiki Azərbaycanın Gəncə şəhərində doğulub və məzarı oradadır”. N. Kənani mənsub olduğu və daşıdığı siyasi-ideologiyaya uyğun olaraq, Gəncəni “İran şəhəri” Nizami Gəncəvini isə “fars şairi” adlandırmaqdan özünü saxlaya bilməyib.
Tədbirdə İranın bir qrup fars dili və ədəbiyyatı üzrə alimləri, mədəniyyət idarələrinin rəhbərləri, xarici ölkələrin səfirləri də iştirak edib. Tədbirə qatılan Tacikistanın Tehrandakı səfirliyinin mədəniyyət müşaviri Müzəffər Məhəmmədi də Nizami Gəncəvini “fars şairi” adlandıraraq deyib: “Nizami Gəncəvi ədəbiyyat aləmində “Xəmsə” poemasını yazmış ən böyük fars şairlərindən biridir”.
Bu yerdə “Yalançının kor şahidi yanında olar”, “Axsaq atın kor nalbəndi” atalar sözləri yerinə düşür. Yaxud, elə “İlanın ağına da, qarasına da lənət”i də demək uyğundur. Çünki Nasiri və Məhəmmədi kimilərinin su içdikləri ideologiya Firdovsinin “Şahnamə” adlı antitürk nağıllarıdır. Bu nağıllar toplusu Sultan Mahmudun sifarişi ilə yazılıb. Sultanla müəllif arasında münasibət də tarixin bir səhifəsidir. Türkə qarşı haqsızlıq edən Firdovsiyə Sultanın qızıl, yaxud gümüş pulları qismət olmur. Buna taleyin ironiyası deyərlər… Xamnei, Xatəmi, Qulaməli Həddad, XİN rəsmisi, pəhləvilər, Firdovsi, Tacikistan səfirliyinin nümayəndəsi… bunlar hamısı bir qabdan su içdikləri üçün eyni xəstəliyə yoluxublar. Bunu Paşinyan, Sarqsyan, Koçaryan, Kaputikyan, Balayan, Njde, Andranik və başqalarının türk düşmənliyi ilə tutuşdurmaq da olar. Nəticə – hər ikisi bir bezin qırağıdır.
Fars və erməni faşizmi bir mahiyyət daşıyır – türk düşmənliyi. Ermənilər indiki Ermənistana, Azərbaycanın qədim tarixi torpaqlarını yerləşdirildikdən sonra fars şovinistlərinin Güney Azərbaycan, yaxud İran ərazisində törətdikləri saxtakarlığı ediblər. Onlar bunu 30 il işğal altında saxladıqları Qarabağ və ətraf rayonlarda da etmişdilər… …Panfarsçılar İsrailin İran hakimiyyətindən Azərbaycana daha yaxın olduğunu xatırlatdılar. Ötən ilin yayında İsrailin Azərbaycandakı səfiri Corc Dik tvitter səhifəsində Nizami Gəncəvi ilə bağlı paylaşım etmişdi: “Böyük Azərbaycan şairi və filosofu Nizami Gəncəvinin yaradıcılığından bəhs edən bu gözəl kitabı oxumaq üçün səbrsizlənirəm”.
Corc Dik Azərbaycanın qədim şəhəri Təbrizin tarixi və incəsənətindən bəhs edən “Təbrizin sehrli nağılları” kitabı ilə bağlı paylaşım etmişdi. Panfarsçılara, yaxud onların tayı olan ermənilərə türk tarixi, dahiləri və başqa məsələləri barədə mübahisə açmaq, onlara gerçəyi başa salmaq kimi bir cəhdimiz yoxdur. Çünki onların milli tərbiyəsi naqisdir. Belə düşüncənin daşıyıcıları heç kimi sevmir. Panfarsçılarla ermənilərin eyni xislətin daşıyıcı olduğunu bu ilin yanvarında İsraildə “Ağlama divarı” yaxınlığında baş verən hadisə də isbatlayır. Ora ziyarətə getmiş ermənilər iddia edib ki, İsrail onlara məxsusdur. Gevorq Kaxkecyan adlı erməni deyib: “Bura – İsrail bizim ölkəmizdir, bura evimizdir”.
Mədəni, mənəvi baxımdan kiçiklər böyük ola bilməz. Onların gözü həmişə böyüklərin qapısında, əlində, qulaqları isə divarında olur. Panfarsçılarla ermənilərin göz və qulağı türklərin əlində, qapısında və divarında olduğu kimi…”
Tehran rejiminin belə bir qondarma tədbir keçirməsi məsələsinə gəlincə, S.Soltan qeyd etdi ki, mərhum Prezident Heydər Əliyevin dönəmində İranın dövlət rəsmilərinin Azərbaycanla bağlı təhriflərinə yüksək səviyyədə cavab verilib. “Eləcə də İranın Nizami Gəncəvini farslaşdırmaq cəhdlərinə Heydər Əliyev də, İlham Əliyev də lazımı cavab verib və Nizaminin türk, Azərbaycan şairi oluğunu bəyan ediblər. Qeyd etdiyimiz kimi, Tehran rəsmiləri hər zaman təhrif etməklə məşğul olublar.
Görünən odur ki, İran hakimiyyətinin rəsmi dairələrinin Azərbaycan ərazilərinə, Azərbaycana aid məsələlərə iddiası ermənilərin iddiası ilə eynidir. Məsələn, ermənilər daim Azərbaycanın sazına, kamançasına, tütəyinə, balabanına iddia etdikləri kimi, İran hakimiyyəti də Azərbaycanın Nizami Gəncəvisinə, Gəncəsinə, digər ərazilərinə qarşı əsassız iddialar irəli sürür. Bununla özlərini “böyük və qədim” göstərməyə çalışırlar. Bu parsizmlə ermənizmin türkə qarşı tutduğu ortaq mövqedir. O ki qaldı Tehran rejiminin Nizami Gəncəvi barədə keçirdiyi tədbirin X Qlobal Bakı Forumu ilə eyni ərəfəyə təsadüf etməsinə, təbii, molla rejimi burada da təxribatından qalmır”.
Molla rejiminin daim pozuculuq etdiyini deyən S.Soltan hesab edir ki, IX Qlobal Bakı Forumu 2022-ci ilin yayında keçirilib. “X Qlobal Bakı Forumunun bu gün keçirilməsi bir sıra baxımlardan Azərbaycan üçün əhəmiyyətlidir. Azərbaycan son zamanlar beynəlxalq aləmdə öz regiondakı vəziyyətlə bağlı öz vacibliyini artırıb. Xüsusən şaxələnmiş enerji xəttləri bağlı. Dövlətimiz artıq dünyanın enerji daşıyıcılarına aid xətlərdən birinin vacib bölməsini təşkil edir. Perspektivdə Xəzəryanı ölkələrdən Avropaya əlaqəni də quracaq. Bu forumun da istiqamətətlərindən biri energetika, təhlükəsizliklə bağlıdır. Azərbaycan 2020-ci ildə müharibədə əldə etdiyi uğurdan sonra iqtisadi, təhlükəsizlik və s bağlı əməkdaşlığı beynəlxalq əməkdaşlığı genişləndirir. Odur ki, X forumun açılışında vurğulanan məsələlər daha çox bunu əhatə edir. Prezidentin Nizami Gəncəvi ilə bağlı dedikləri də farsçılara, panfarsist qüvvələrə, fars şovinistlərinə təkrar ismarıcdır ki, Nizami Gəncəvinin, eləcə də Azərbaycanın başqa dahilərinin kölgəsində böyük görsənməyə cəhd göstərməyin. Şəms Təbrizi, Şəhriyar, Nizami Gəncəvi və başqaları Azərbaycan türküdür. Nizami kimi dahilərimizi kölgəsində böyük görünməyə çalışan fars şovinizmi uğursuz cəhdlər göstərir. Prezident də bu məsələni dolayı yolla vurğulayıb”-deyə bildirən S.Soltan hesab edir ki, fars şovinstləri bu sərt cavabdan dərs almalıdır.
İradə SARIYEVA
