“Bu, Cənub Qaz Dəhlizi kimi meqalayihənin başa çatmasından dərhal sonra sözün əsl mənasında digər qlobal meqa layihədir”. Bunu Prezident İlham Əliyev Latviya prezidenti Egils Levits ilə görüşdən sonra mətbuata bəyanatında bildirib.
Ölkə başçısı qeyd edib ki, yaxın perspektivdə Azərbaycan Avropaya yaşıl enerjini ixrac etməyə başlayacağıq: “Azərbaycan Avropa İttifaqı üçün enerji təchizatı sahəsində daha əhəmiyyətli tərəfdaşa çevrilir. Biz Avropa Komissiyası tərəfindən hər zaman etibarlı tərəfdaş sayılmışıq. Bu gün biz nefti, təbii qazı, elektrik enerjisini, neft-kimya məhsullarını, neft məhsullarını ixrac edirik. Ümid edirik ki, bu yaxınlarda yaşıl enerjini ixrac etməyə başlayacağıq. Azərbaycan, Gürcüstan, Rumıniya və Macarıstan arasında müvafiq razılaşma Avropa İttifaqı Komissiyasının xanım sədrinin iştirakı ilə ötən ilin dekabr ayında Buxarestdə imzalandı. Bir sözlə, bu, Cənub Qaz Dəhlizi kimi meqalayihənin başa çatmasından dərhal sonra sözün əsl mənasında digər qlobal meqa layihədir”.
Görünən odur ki, Azərbaycan növbəti böyük layihəni həyata keçirməklə Avropanın enerji təchizatında əsas ölkəyə çevrilir.
“Azərbaycan yeni meqa layihə hesabına Avropaya daha böyük həcmdə elektrik enerjisi ixrac edəcək”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, yaşıl enerji ilə bağlı Prezident İlham Əliyevin səsləndirdiyi fikirlər reallığa söykənir: “Ən azından ona görə ki, Azərbaycanın böyük bərpaolunan enerji potensialı var. Söhbət Xəzər dənizi sahillərində yerləşən böyük külək və günəş enerjisindən gedir. Bu potensialdan istifadə etmək üçün konkret işlər görülür. Səudiyyə Ərəbistanı və Böyük Britaniya şirkətləri ilə əldə olunan razılaşmalar bu potensialın perspektivinə verilən dəyərin göstəricisidir. Getdikcə dünyada enerji təhlükəsizliyi dövlətlərin milli təhlükəsizlik məsələsinə çevrilir. Azərbaycan yeni enerji marşrutların qurulması sahəsində ciddi addımlar atmaqdadır. Müşahidələr göstərir ki, yaşıl enerjinin Avropa ölkələrində payı getdikcə artır. Ölkəmizin enerji diplomatiyasının uğurları beynəlxalq səviyyədə də təqdir edilir. İki il bundan əvvəl Cənub Qaz Dəhlizinin tam istifadəyə verilməsi Azərbaycanın Avropa İttifaqının etibarlı enerji tərəfdaşı olduğunu bir daha sübut etdi. Məhz bunun nəticəsi idi ki, Avroittifaq Azərbaycanla digər enerji resurslarının alınması ilə bağlı razılaşmaları dəstəklədi. 2022-ci il iyulun 18-də Bakıda Avropa Komissiyasının prezidenti xanım Ursula Fon der Lyayen ilə birgə “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu” imzalandı. Bununla belə, ötən il dekabrın 17-də Buxarestdə “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” imzalandı. Burada söhbət yaşıl enerjinin Gürcüstan, daha sonra Qara dənizin dibi ilə Rumıniya və Macarıstana ixracından gedir. Nəzərə almaq lazımdır ki, Avropa İttifaqı ölkələrinin iqtisadiyyatı getdikcə böyüdüyü üçün elektrik enerjisinə tələbat daha da artır. Bu isə o deməkdir ki, Azərbaycan yeni meqa layihə hesabına Avropaya daha böyük həcmdə elektrik enerjisi ixrac edəcək”.
Vidadi ORDAHALLI
