İƏT-in Baş katibi Ermənistanın mina xəritələrini Azərbaycana verməməsini çox ciddi təhlükə adlandırdı

Ceyhun Bayramov və İƏT Baş katibi birgə mətbuat konfransı keçirdi

img

İslam Əməkdaşlıq Təşkilatının (İƏT) Baş katibi Yusif Bin Əhməd Əl-Osaymin Azərbaycana səfərə gəlib.

Trend-in məlumatına görə, hazırda Xarici işlər naziri Ceyhun Bayramov və İƏT Baş katibi Yusif Bin Əhməd Əl-Osayminin birgə mətbuat konfransı keçirilib.

  • İƏT Azərbaycana dəstəyini əsirgəməyib

Xarici işlər naziri C.Bayramov deyib ki, İslam Əməkdaşlıq Təşkilatı Ermənistan-Azərbaycan Dağlıq Qarabağ münaqişəsinin ilk günündən hər zaman Azərbaycanın haqq mövqeyini dəstəkləyib, bu münaqişənin beynəlxalq hüquq prinsipinə, sərhədlərin toxunulmazlığı əsasında həll edilməsini dəstəkləyib.

Nazir bildirib ki, İƏT beynəlxalq hüquqa əsasən, Azərbaycanı dəstəkləyən mövqeyini əsirgəməyib: “Münaqişə ilə bağlı təşkilat tərəfindən Azərbaycanın mövqeyini dəstəkləyən qətnamələr qəbul edilib. İƏT səfirləri Ağdama, Gəncəyə və digər ərazilərə səfər ediblər, ermənilərin Azərbaycana qarşı törətdiyi cinayətlərin şahidi olublar”.

  • Regionda yeni təhlükəsizlik və inkişaf formatı yaranıb

Nazir bildirib ki, üçtərəfli bəyanatın imzalanması regionda yeni təhlükəsizlik və inkişaf formatının yaranmasına səbəb olub.

C.Bayramov bildirib ki, insanların işğaldan azad edilmiş ərazilərə təhlükəsiz formada qayıtması istiqamətində Azərbaycan lazımı addımlar atır: "Eyni zamanda, Azərbaycan regionda yeni əməkdaşlıq formatının yarandığını bildirərək əməkdaşlığa açıq olduğunu bəyan edir. Lakin Azərbaycanın bu cür konstruktiv mövqeyi fonunda biz Ermənistanın qeyri-konstruktv addımlarını və bəyanatlarını müşahidə edirik”.

  • Ermənistan Azərbaycan ərazilərini minalayaraq bu əraziləri cansız məkana çevirib

30 il ərzində Ermənistanın Azərbaycan ərazilərini minalayaraq bu əraziləri cansız məkana çevirdiyini deyən nazir bildirib ki, bu gün Ermənistan beynəlxalq qanunlara zidd olaraq minalanmış ərazilərin xəritələrini Azərbaycana verməkdən boyun qaçırır: “Xəritələri təqdim etməkdən boyun qaçırmaqla Ermənistan Azərbaycana qarşı hərbi cinayətləri bu gün də davam etdirir. Son bir neçə ay ərzində Azərbaycan bu istiqamətdə sistemli addımlar atır və beynəlxalq təşkilatlara müraciət edib. Eyni zamanda, Azərbaycanda bu istiqamətdə vətəndaş cəmiyyəti aktivlik göstərir, imzatoplama aksiyasi keçirilir. Azərbaycan imkan verməyəcək ki, Ermənistan bu məsələni dünya ictimaiyyətinin diqqətindən yayındırsın”.

  • Ermənistan hələ də yeni reallığı anlamır

“Biz Ermənistan Xarici İşlər Nazirliyinin (XİN) təxribatçı, qeyri-konstruktiv, revanşist xarakterli bəyanatlar verdiyini görürük. Bu, həmin ölkənin hələ də yeni reallığı anlamadığını göstərir” - naziri C.Bayramov deyib.

Nazir bildirib ki, Ermənistan tərəfi reallığı nə qədər tez anlasa, o qədər yaxşı olar: “Azərbaycan regionda yeni əməkdaşlıq formatının qurulmasına hazırdır. Lakin əgər Azərbaycan ərazisində yenidən hər hansı bir təxribat olarsa, buna layiqli şəkildə cavab veriləcək”.

  • Ermənistanın minalanmış ərazilərin xəritələrini Azərbaycana verməməsi çox ciddi təhlükədir

İƏT Baş katibi Yusif Bin Əhməd Əl-Osaymin isə Ermənistanın minalanmış ərazilərin xəritələrini Azərbaycana verməməsini çox ciddi təhlükə adlandırıb.

Baş katib bildirib ki, minalanmış ərazilər insanlar üçün böyük təhlükə yaradır: “Bizim nümayəndə heyəti bu ərazilərə səfər edərkən çox ciddi təhlükələrin olduğunu bildirirdilər. Onlar deyirlər ki, hansı anda minaya tuş gələ biləcəyini bilmirsən. Bu, çox ciddi məsələdir”.

  • Azad edilən ərazilərin bərpasında İƏT Azərbaycanın bütün səylərini dəstəkləyir

“Əlbəttə ki, Azərbaycana hərbi əməliyyatları başa vurmaq lazım idi, amma həmin ərazilərdə yenidənqurma işləri çox zaman, maliyyə və səbr tələb edir” - İƏT Baş katibi deyib.

Baş katib bildirib ki, İslam Əməkdaşlıq Təşkilatı Azərbaycanın bu istiqamətdə bütün səylərini dəstəkləyir: “Təşkilata üzv olan bütün ölkələr Azərbaycanın bu səylərini dəstəkləyəcək. Əlbəttə ki, gələcəkdə yenidənqurma işlərinin necə davam etməsi üçün Azərbaycana yenə səfərlər edəcəm".

Baş katib, həmçinin əlavə edib ki, İslam İnkişaf Bankı Azərbaycanın işğaldan azad edilmiş ərazilərinin bərpasında öz dəstəyini göstərir. Əgər layihə müəyyən edilsə, İslam İnkişaf Bankı faizsiz kredit verə bilər və digər dəstək göstərə bilər.

Son xəbərlər