Məlum olduğu kimi, Ermənistanın baş naziri Nikol Paşinyan Moskvaya işgüzar səfər edib. Səfər zamanı Paşinyan Rusiya prezidenti Vladimir Putinlə görüşüb. Görüşdə bir sıra məsələlər müzakirə edilib.
Paşinyan Dağlıq Qarabağda Rusiya sülhməramlılarının olmasının vacibliyini qeyd edərək bildirib ki, bu, regionda sabitlik və təhlükəsizliyin vacib amilinə çevrilir. Həmçinin, o, Dağlıq Qarabağda və bütövlükdə, regionda təhlükəsizlik sisteminin arxitekturasının müzakirəsinə tərəfdar olduğunu bildirib.
Bununla yanaşı, Paşinyan Putinlə görüşündə belə bir fikir səsləndirdi ki, 10 noyabrdan sonra saxlanan ermənilər məsələsində Ermənistan və Rusiyanın mövqeyi eynidir: “Bu məsələ hələ də həllini tapmayan çox vacib məsələdir. Dəfələrlə müzakirə etdiyimiz kimi, 9 noyabr (2020-ci il) bəyanatına əsasən, bütün girovlar, hərbi əsirlər, digər tutulan şəxslər vətənə qaytarılmalıdır. Lakin təəssüf ki, indiyədək Azərbaycanda saxlanan şəxslərimiz var. Bu məsələ ilə bağlı İrəvan və Moskvanın mövqeyi eynidir”.
Maraqlıdır, Moskva 10 noyabrdan sonra saxlanan erməni terrorçularının əsir olmasını və ya onların buraxılmasını haçan bəyan edib ki, Paşinyan belə deyir? Ermənistan baş naziri bununla nə demək istəyir?
“Seçki yaxınlaşdığı üçün Paşinyan bəzi məsələləri təhrif edərək bundan xal qazanmağa çalışır”
Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, seçki ərəfəsi siyasi xal qazanmaqdan ötrü Paşinyan belə yalanlar uydurur: “Əvvəla Putin-Paşinyan görüşündə heç bir razılaşmaya dair sənəd imzalanmadı. Paşinyan bu görüşdə istəklərini dilə gətirdi. Açıq sezilirdi ki, Putin Paşinyanla görüşməkdə o qədər də həvəsli deyil. Paşinyan erməni diversantların məsələsini qabartmaqla, bir növ, cəmiyyəti sakitləşdirmək məqsədi güdürdü. Çünki bununla bağlı ölkə daxilində ona qarşı təzyiq var. Eyni zamanda, Paşinyana müxalif olan qüvvələr bu amildən maksimum istifadə etməyə çalışırlar. Paşinyan bununla cəmiyyətə göstərmək istəyirdi ki, o nəsə etməyə çalışır. Diversantlar məsələsində Kremlin İrəvanla eyni mövqedən çıxış etməsi ilə bağlı səsləndirdiyi fikir reallığı əks etdirmir. Belə olsaydı, o zaman Rusiya hakimiyyətini təmsil edən rəsmilər müəyyən oxşar açıqlamalar verərdilər. İndiyə qədər bu özünü göstərməyib. Doğrudan da belə idisə, o zaman Putin niyə diversantlar barədə bir kəlmə danışmadı? Məsələ ondadır ki, Putin görüşdən əvvəl mətbuata açıq olan hissədə, ümumiyyətlə, sözügedən məsələyə toxunmadı. Bu o deməkdir ki, 10 noyabr razılaşmasından sonra saxlanan diversantlar məsələsi Kremli narahat etmir. Sadəcə, seçki yaxınlaşdığı üçün Paşinyan bəzi məsələləri təhrif edərək bundan xal qazanmağa çalışır. Özü də Nikol bütün bunları özünəməxsus formada təqdim etməyə çalışır”.
Partiya sədri hesab edir ki, diversantlar azad edilsə, bu, seçkidə Paşinyanın xeyrinə işləyəcək.
Vidadi ORDAHALLI
