İslam Əməkdaşlıq Təşkilatı nümayəndə heyətinin mətbuat konfransı keçirilib. “Trend”in məlumatına görə, İslam Əməkdaşlıq Təşkilatı nümayəndə heyəti Ağdam və Gəncəyə səfərlə bağlı təəssüratlarını bölüşüb.
Qeyd edək ki, aprelin 6-da İslam Əməkdaşlıq Təşkilatının Ermənistanın Azərbaycana qarşı təcavüzünə dair Təmas Qrupuna daxil olan ölkələrin daimi nümayəndələri Ermənistanın müharibə cinayətləri ilə yaxından tanış olmaq üçün Ağdam və Gəncədə səfərdə olublar.
İslam Əməkdaşlıq Təşkilatının (İƏT) Baş katibinin iqtisadi məsələlər üzrə köməkçisi Ahmad Kavaesa Senqendo deyib ki, münaqişə başa çatdı, lakin bərpa prosesi kifayət qədər vaxt aparan prosesdir. Bu münaqişədən əziyyət çəkən çoxlu sayda insanlar var. O qeyd edib ki, İƏT bərpa-yenidənqurma işlərində də dəstəyini davam etdirəcək: "Biz bütün İƏT üzvlərini çağırırıq ki, öz dəstəklərini göstərsinlər. Eyni zamanda, insanların psixoloji sarsıntılarının aradan qaldırılması lazımdır. Biz bütün bu məsələlərdə təşkilat üzvlərini Azərbaycana dəstək göstərməyə çağırırıq”.
Cibutinin Səudiyyə Ərəbistanındakı səfiri, İslam Əməkdaşlıq Təşkilatındakı (İƏT) daimi nümayəndəsi Dya-Eddine Said Bamakhrama isə xatırladıb ki, İƏT 57 ölkədən ibarətdir və onlar ilk dəfə işğaldan azad edilmiş ərazilərə gedərək orada dağıntıların, Ağdamın yer üzündən silinməsinin şahidi olublar.
O qeyd edib ki, həmçinin münaqişədən əziyyət çəkən insanlarla da görüşüblər: “Gəncə şəhərində olduq. Raketlərin Gəncəyə vurduğu dağıntıları gördük. Məqsədimiz vəziyyəti yerində görmək, Azərbaycan hökuməti ilə müzakirələr aparmaq idi. Azərbaycan hökumətinə dəstək göstərəcəyik ki, həmin ərazilərdə həyatı yenidən bərpa etmək mümkün olsun. Biz üzv dövlətlərlə təmasları davam etdirəcəyik ki, Azərbaycana müvafiq dəstək göstərə bilək, orada məktəbləri, məscidləri bərpa edək. Biz şadıq ki, Azərbaycan öz torpaqlarını geri qaytardı”.
“İslam Əməkdaşlıq Təşkilatı (İƏT) Azərbaycana öz səmimi dəstəyini göstərib. İslam dünyası bu məsələdə Azərbaycanın yanında yer aldı. Qərb dünyasında Azərbaycanın qələbəsi ilə bağlı bəzi xoşagəlməz fikirlər oldu, ancaq müsəlman dünyası Azərbaycanı dəstəklədi”.
Bunu isə İƏT Təmas Qrupunun nümayəndə heyətinin üzvü Mehmet Metin Eker deyib.
O qeyd edib ki, İƏT bundan sonra da Azərbaycanın yanında olacaq: “Ağdama səfər edərkən çox kədərli bir mənzərənin şahidi olduq. Ağdamda tək bir bina salamat qalmayıb. Ermənilər təkcə insanlara deyil, təbiətə, mədəniyyətə qarşı da düşmənçilik, vandallıq nümayiş etdirib. Məscidləri, dini abidələri məhv etmək mədəniyyətə qarşı vandallıqdır”.
M.M.Eker vurğulayıb ki, Azərbaycanın bu müharibədə qələbəsi İslam dünyasının qələbəsidir: “Azərbaycanın bu qələbəsi İslam dünyasında zülümlərin aradan qaldırılması üçün səbəb olacaq. İndi qarşıda duran əsas məsələ Qarabağda təhlükəsizliyi tam bərpa etmək və orada həyatı bərpa etməkdir. Bütün İslam dünyası bu məsələdə də Azərbaycanın yanında olacaq”.
İƏT Baş katibinin iqtisadi məsələlər üzrə köməkçisi Ahmad Kavaesa Senqendo İslam Əməkdaşlıq Təşkilatının (İƏT) Dağlıq Qarabağ məsələsində daim Azərbaycanı dəstəklədiyini deyib. Bildirib ki, bu dəstək təkcə Azərbaycanın İƏT-ə üzv olması ilə bağlı deyil, eyni zamanda Azərbaycanın haqlı mövqedə olmasına görədir. Azərbaycanın öz ərazilərini işğaldan azad etməli olduğunu deyən Ahmad Kavaesa Senqendo qeyd edib ki, İƏT bundan sonra da Azərbaycanı dəstəkləyəcək: “Biz bundan sonra da Azərbaycana öz dəstəyimizi göstərəcəyik. 2016-cı ildə Təmas Qrupu yaradıldı. Biz ilk dəfə azad edilmiş ərazilərə səfər etmək imkanı qazandıq və həmin ərazilərdə dağıntıları gördük, binalara, məscidlərə qarşı ermənilərin törətdiyi vandallıqların şahidi olduq. Bu çox məyusedici, kədərli bir mənzərədir. Eyni zamanda məscidlərdə donuz, inək saxlanmasının şahidi olduq, qəbiristanlıqların, məzarların dağıdılmasını gördük. Bu onu göstərir ki, işğalçılar yalnız dirilərə deyil, ölülərə qarşı da vandallıqlar törədiblər. Şükürlər olsun ki, həmin ərazilər işğaldan azad edilib və inanırıq ki, o ərazilər bərpa ediləcək, yenidən qurulacaq və insanlar öz doğma torpaqlarına qayıdacaqlar”.
“Azərbaycanın nailiyyətləri İslam dünyasında digər münaqişələrin də həllinə ümidlər verir”. Bunu isə mətbuat konfransında Pakistanın İslam Əməkdaşlıq Təşkilatında və digər beynəlxalq təşkilatlardakı daimi nümayəndəliyinin rəhbəri, səfir Rizvan Səid Şeyx deyib.
O qeyd edib ki, 30 il ərzində İƏT bu məsələyə xüsusi diqqət yetirib və daim bunu öz gündəliyində saxlayıb: “Bu məsələni daim siyasi gündəliyində saxlayan bir Təşkilat olaraq biz bu uğurdan qürur duyuruq. Ölkə olaraq onu deyə bilərəm ki, Pakistan Azərbaycanı daim dəstəkləyib. Gələn il İslamabadda İƏT ölkələrinin xarici işlər nazirlərinin görüşü keçiriləcək və bu görüş zamanı bu regionda sülhün davamlı olması üçün fəaliyyət planı hazırlanmalıdır. Fəaliyyət planı digər İslam ölkələrində də münaqişələrin həlli üçün bizdə bir birlik yaradır. Azərbaycanın əldə etdiyi nailiyyətlər İslam dünyasında digər münaqişələrin də həllinə ümidlər verir.
Sonda onu da qeyd edim ki, Pakistan daim Azərbaycanın yanında olacaq. Biz bundan sonra da sülhün bərqərar olması üçün öz dəstəyimizi göstərəcəyik. Zəfəriniz mübarək! Qarabağ Azərbaycandır”.
Əfqanstanın İslam Əməkdaşıq Təşkilatındakı (İƏT) daimi nümayəndəsi Şafiq Samim Azərbaycanın işğaldan azad edilmiş ərazilərində böyük dağıntıların şahidi olduqlarını bildirib. O qeyd edib ki, həmin ərazilərdə salamat yer qalmayıb: “Biz bütün yaşayış məntəqələrinin və məscidlərin dağıdılmasının şahidi olduq. Biz Azərbaycan Prezidenti İlham Əliyevin mövqeyini dəstəkləyirik. Bu müharibə ərəfəsində və müharibə zamanı Prezident İlham Əliyev Azərbaycan xalqının Ermənistan tərəfindən təcavüzə məruz qalmasını bütün dünyaya çatdırmağa nail oldu.
Biz, eyni zamanda, Gəncə şəhərini ziyarət etdik və orada dinc sakinlərin bombalanmasını gördük. Mən Əfqanıstanda bu barədə məlumat yayılmasına, televiziyalarda göstərilməsinə nail olmağa çalışacağam”.
Malayziyanın Azərbaycandakı səfiri Dato Yubazlan bin Yusof isə bildirib ki, Ermənistanın Azərbaycana qarşı təcavüzü zamanı törətdiyi dağıntılar bütün insanlığa qarşı cinayətdir. Fürsətdən istifadə edib Azərbaycan xalqını qələbə münasibətilə təbrik etdiyini deyən səfir qeyd edib ki, işğaldan azad edilmiş ərazilərə səfər etmək və bütün prosesləri yaxından görmək imkanı olub: “Biz təkcə münaqişə zonalarına deyil, münaqişə zonalarına yaxın ərazilərdə də olmuşuq və insanların münaqişədən nə qədər əziyyət çəkdiyini görmüşük. Bütün bunların hamısı insanlığa, insanların əmlakına, ətraf mühitə qarşı cinayətdir. Məni məyus edən amillərdən biri ermənilər tərəfindən ibadət evlərinin dəhşətli vəziyyətə gətirilməsidir. Malayziya daim Dağlıq Qarabağ məsələsində Azərbaycana dəstəyini nümayiş etdirib. Bizim dəstəyimiz İƏT Təmas Qrupu çətçivəsində də öz əksini tapıb.
Müharibə nəticəsində yaranmış vəziyyətin aradan qaldırılması üçün öz dəstəyimizi göstərəcəyik. İnanıram ki, İƏT dövlətləri azad edilmiş ərazilərin bərpa prosesində Azərbaycanın yanında olacaq”.
Qambiyanın İslam Əməkdaşlıq Təşkilatındakı (İƏT) səfirinin müavini Əbubəkir Cah bildirib ki, burada ədalətsizlik baş vermişdi və bu ədalətsizliyin aradan qaldırılması üçün Azərbaycan mücadiləyə qalxdı və qalib gəldi: "Biz işğaldan azad edilmiş ərazilərdə hər şeyin, məscidlərin dağıdılmasının şahidi olduq. Həmin ərazliərdə həyatı tamamilə məhv etmək cəhdləri olub, lakin buna nail olmayıblar. Həmin ərazilərdə yenə də ocaqlar yanacaq, o ərazilər bərpa olunacaq və insanlar öz doğma torpaqlarına qayıdacaqlar.
İƏT olaraq biz Azərbaycanla həmrəylik nümayiş etdirməli, eyni zamanda Azərbaycana qarşı törədilən bu cinayətlərin beynəlxalq məhkəmələrə çıxarılmasına nail olmalıyıq. Bu digər işğalçılara da nümunə olmalıdır ki, kiminsə ərazisini işğal edib oranı dağıtmaqla canını qurtara bilməyəsən”.
İƏT Təmas Qrupunun nümayəndə heyətinin üzvü Mehmet Metin Eker isə deyib ki, İslam Əməkdaşlıq Təşkilatı (İƏT) minalanmış ərazilərin xəritəsinin Azərbaycana verilməsi üçün Ermənistana çağırış edə bilər. O qeyd edib ki, işğaldan azad olunmuş ərazilərin bərpa prosesi və insanların oraya qayıtması üçün ən ciddi problem ərazilərin ermənilər tərəfindən minalanmasıdır.
M.M.Eker xatırladıb ki, Ermənistan hələ də minalanmış ərazilərin xəritəsini verməkdən imtina edir. Onun sözlərinə görə, İƏT bu yöndə bir çağırış edə bilər: “Bununla bağlı bu gün səfərin yekunları üzrə hesabatın hazırlanması zamanı müzakirə aparacağıq. Ermənistana beynəlxalq təzyiqləri artıraraq onun bu xəritələri verməsinə nail ola bilərik. Biz bu məsələni gündəmdə saxlayacağıq”.
İslam Əməkdaşlıq Təşkilatının (İƏT) Baş katibinin iqtisadi məsələlər üzrə köməkçisi Ahmad Kavaesa Senqendo Təşkilatın Dağlıq Qarabağ münaqişəsi nəticəsində Azərbaycanda mədəni abidələrə dəyən ziyanı qiymətləndirmək üçün iş aparacağını diqqətə çatdırıb. O bildirib ki, bu münaqişə nəticəsində Azərbaycanda mədəni abidələrə ciddi ziyan dəyib: “Biz bu məlumatları həm dünya ictimaiyyətinə çatdırmaq, həm də dəymiş ziyanı qiymətləndirmək üçün fəaliyyət göstərəcəyik”.
