2021-ci ildə Xarici İşlər Nazirliyi Azərbaycan Respublikasının dövlət mənafeyi və milli maraqlarının beynəlxalq aləmdə layiqincə təmin edilməsi məqsədilə apardığı çevik və praqmatik xarici siyasət fəaliyyətini davam etdirəcək.
Xarici İşlər Nazirliyindən verilən məlumata görə, əsas səylər ikitərəfli və çoxtərəfli münasibətlərdə maraqlarımıza cavab verən qarışlıqlı hörmət və bərabərhüquqluluq prinsipləri əsasında əməkdaşlığın inkişaf etdirilməsi, Azərbaycanın işğaldan azad olunmuş ərazilərinin bərpasına dost ölkələrin və tərəfdaş beynəlxalq təşkilatların cəlb edilməsi, bölgədə yeni əməkdaşlıq və inkişaf təşəbbüslərinin təşviq edilməsi, habelə enerji və nəqliyyat sahələrində irimiqyaslı regional infrastruktur layihələrin uğurla həyata keçirilməsinin təmin edilməsi ilə Azərbaycanın beynəlxalq aləmdə mövqelərinin gücləndirilməsi və nüfuzunun daha da artırılmasına yönələcək.
Xarici siyasət fəaliyyəti Prezident İlham Əliyevin vurğuladığı “bütün ölkələrlə bərabərhüquqlu, qarşılıqlı hörmət və etimad əsasında münasibətlərin qurulması əsas prinsiplərimizdən biridir” fikri əsasında həyata keçiriləcək.
Maraqlıdır, Azərbaycan diplomatiyası qarşıya qoyulan hədəflərin öhdəsindən gələ biləcəkmi?
Elşən Mustafayev: “Azərbaycanın qarşısında duran ən vacib diplomatik tapşırıq Qarabağ məsələsi ilə bağlı zəfəri sona çatdırmaqdır”
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycan bu ili çox uğurla başa vurdu: “Bütün dünyada nisbətən durğunluq, böhran ili kimi xarakterizə olunan bu il bizim üçün böyük uğurlar gətirdi. Biz uzun illərdən sonra işğal altında olan ərazilərimizi azad etdik. Bunu beynəlxalq ictimaiyyətin gücü ilə deyil, öz gücümüzə, ordumuzun dəmir yumruğu ilə etdik. Bununla yanaşı, biz 100 kilometrlərlə məsafəni əhatə edən dövlət sərhədlərimizi bərpa etdik. Hazırda Azərbaycan bütün sərhədlərinə özü nəzarət edir. Bura Ermənistanla sərhədimizin bir hissəsi və İranla olan sərhəd zolağını aid edirəm. Bunun nəticəsində Azərbaycan bütün bölgədə yeni reallıqlar yaradıb. Biz BMT qətnamələrinin icra mexanizmini təmin etmişik. Bölgədə sülhə və təhlükəsizliyə qarant olmuşuq. Bu reallıqların nəticəsində yeni əməkdaşlıq formatları ərsəyə gələ bilər. Artıq Ermənistanın da iştirakı ilə region ölkələrinin əməkdaşlığına dair anonslar verilir. Təbiidir ki, bütün bunlar Ermənistan üzərinə götürdüyü öhdəlikləri həyata keçirəcəyi təqdirdə mümkün ola bilər. Bununla yanaşı, Azərbaycanın qarşısında duran ən vacib diplomatik tapşırıq Qarabağ məsələsi ilə bağlı zəfəri sona çatdırmaqdır. Ordumuz üzərinə düşəni edib, hazırda münaqişə bir qədər diplomatik müstəviyə qədəm qoyub. Ermənilərin bu istiqamətdə müqaviməti hiss edilir. Bu istiqamətə ciddi güc qoymalıyıq. Eyni zamanda, işğaldan azad edilən ərazilərimizdə törədilən erməni vəhşiliyi və buna görə ödəniləcək təzminatla bağlı beynəlxalq ictimaiyyətin dəstəyini almalıyıq. Normal diplomatik zəmin yaratmalıyıq ki, əcnəbi ölkələrin şirkətləri işğaldan azad olunan ərazilərin bərpasında yaxından iştirak etsinlər”.
Ekspertin sözlərinə görə, digər istiqamətlər üzrə Azərbaycan ənənəvi və uğurlu sayılan xarici siyasət kursunu davam etdirməlidir: “Biz bütün ölkələrlə normal ikitərəfli münasibətlərin qurulması, yaxın qonşularla mehriban olmaq siyasətini davam etdirəcəyik. İqtisadi əməkdaşlığımız olan ölkələrlə münasibətləri daha da inkişaf etdirəcəyik. Əminliklə deyə bilərəm ki, qarşıdan gələn il bizim üçün daha da uğurlu olacaq və Azərbaycan diplomatiyası öz hədəflərinə çatacaq”.
Məhəmmədəli QƏRİBLİ
