Ermənistanın baş naziri Nikol Paşinyan özünün “Facebook” səhifəsində onu müharibənin qarşısını almaq üçün “çevik siyasət” yürütməməkdə günahandıran müxalifətə cavab yazıb. Paşinyanın sözlərinə görə, müharibədən qaçmağın ancaq bir yolu vardı - əraziləri qaytarmaq və Dağlıq Qarabağın statusunu yaddan çıxarmaq.
Paşinyan qeyd edir ki, “çevik siyasət” tərəfdarları uzun illər ərzində müharibədən qaçmaq siyasəti aparıblar və müharibəyə hazırlaşmayıblar: “Bu tezisi ortaya atanlar, ən azından, bu suala cavab verməlidirlər: nəyə görə onların “çevik” siyasəti nəticəsində 2016-cı ildə müharibədən qaçmaq mümkün olmadı?”.
Bununla belə, Paşinyan Qarabağla bağlı bu və ya digər formada Rusiyanı günahlandırıb. Onun sözlərinə görə, Ermənistanın uzun illər yürütdüyü “çevik” siyasət 2016-cı ilin yanvarında Rusiyanın təklifilə sonuclandı. Təkliflərdə Dağlıq Qarabağın statusu dəqiqləşdirilmədən yeddi rayonun (5+2) qaytarılmasından söhbət gedirdi: “Rusiya niyə belə bir təklif irəli sürdü? Sadə bir səbəbdən Ermənistanın ‘çevik’ siyasəti Madrid prosesini çıxmaza saldı, “Artsax” Azərbaycandan kənarda statusu yalnız Azərbaycanın razılığı ilə ala bilərdi. Həm Rusiyaya, eləcə də hamıya aydın idi ki, Azərbaycan heç vaxt bu varianta razılaşmaz və razılaşmamaq üçün bütün imkanları var. Ona görə də çıxmazdan çıxmaq yolları tapılmalıydı. Bəziləri deyirlər ki, 2018-ci ildən sonra Ermənistanın yürütdüyü siyasətin “yetərincə Rusiyapərəst olmaması” müharibəyə əsas yaradıb. Elədirsə, 2016-cı ildə “yetərincə Rusiyapərəst” siyasət niyə Rusiyanın təkliflərinə yol açdı, aprel müharibəsi baş verdi?”.
Paşinyan özünə haqq qazandırmaq üçün demək istəyir ki, status dəqiqləşmədən Rusiya 7 rayonun qaytarılmasını Ermənistandan tələb edib. O isə bu varianta razı olmadığı üçün müharibə başlayıb. Bununla özünü, bir növ, baş verənlərə görə sığortalamaq istəyir.
“Ona görə də Paşinyanın indi kimisə günahlandırmağa heç bir əsası yoxdur”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Paşinyanın səsləndirdiyi arqumentlər çox zəifdir: “O, müxtəlif manevrlər edərək baş verən müharibəyə görə özünü sığortalamaq istəyir. Baxmayaraq ki, bu belə deyil. Çünki Paşinyanın danışıqlarda sərgilədiyi təxribatçı mövqe danışıqları dalana sürüklədi və müharibənin başlamasını tezləşdirdi. Paşinyan isə 7 rayon söhbətini ortaya atmaqla günahı Rusiyanın üstünə yıxmaq istəyir. Bununla bağlı müxtəlif ziddiyyətli açıqlamalar verir. Nəzərə almaq lazımdır ki, Rusiya haqlı olaraq Vətən müharibəsində Azərbaycana etiraz etmədi. Rusiya prezidenti Vladimir Putin açıq şəkildə bəyan etdi ki, Dağlıq Qarabağ Azərbaycan ərazisidir. O, illik mətbuat konfransında ətraf rayonlar məsələsinə də toxundu. Dedi Rusiya illər boyu belə bir mövqedən çıxış edib ki, Qarabağ ətrafındakı 7 rayon Azərbaycana qaytarılmalı, regionda status-kvo müəyyənləşdirilməlidir. Ermənistan isə nəinki Dağlıq Qarabağı, o cümlədən, ətraf rayonları da qaytarmaq istəmirdi. Paşinyan illərlə ATƏT-in Minsk Qrupunun vasitəçiliyi ilə aparılan danışıqlarda razılaşdırılan prinsiplərin də üzərindən xətt çəkdi. Halbuki, Ermənistan həmin prinsiplərə əməl etsəydi, bu, onlar üçün indikindən daha məqbul olardı. Ona görə də Paşinyanın indi kimisə günahlandırmağa heç bir əsası yoxdur”.
Politoloq onu da qeyd etdi ki, Paşinyan bu cür açıqlamalarla ictimai rəydə ona qarşı olan qəzəbi sakitləşdirə bilməyəcək.
Vidadi ORDAHALLI
