Azərbaycan dövlətinin vətəndaşlarına yönəlik siyasəti bütün təbəqələri əhatə edir. Ermənistanın təcavüzü nəticəsində evlərinə, malına-mülkünə, əkin sahələrinə, obyektlərinə ciddi ziyan dəymiş vətəndaşlarımıza da dövlətin qayğı siyasəti böyükdür və bu istiqamətdə çoxsaylı iş görülür.
Ermənistanın təcavüzü nəticəsində mülki əhaliyə dəymiş ziyanın ödənilməsi üçün ilkin ayrılan məbləğ açıqlanıb və 11 rayonun sakinlərinə pul ayrılıb.
Məlum olduğu kimi, Baş nazir Əli Əsədov “2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə dəymiş ziyanla bağlı maddi yardımın ödənilməsi barədə” sərəncam imzalayıb.
Sərəncam “2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə dəymiş ziyanın ödənilməsi ilə bağlı əlavə tədbirlər haqqında” Azərbaycan Respublikası Prezidentinin 2020-ci il 14 dekabr tarixli, 2343 nömrəli Sərəncamının 2-ci hissəsinin icrasını təmin etmək məqsədilə imzalanıb.
Sərəncama əsasən, Azərbaycan Respublikasının Maliyyə Nazirliyinə müvafiq tapşırıqlar verilib:
- “2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə dəymiş ziyanın ödənilməsi ilə bağlı əlavə tədbirlər haqqında” Azərbaycan Respublikası Prezidentinin 2020-ci il 14 dekabr tarixli, 2343 nömrəli Sərəncamının 1-ci hissəsi ilə müəyyən edilmiş qaydada mülki əhalinin əmlakına dəymiş ziyanla bağlı maddi yardımın ödənilməsi məqsədilə Azərbaycan Respublikası Nazirlər Kabinetinin 2020-ci il 11 noyabr tarixli, 612s nömrəli sərəncamı ilə yaradılmış işçi qrupları tərəfindən təqdim edilən siyahılar əsasında hesablanmış ilkin olaraq 9 068 128 (doqquz milyon altmış səkkiz min yüz iyirmi səkkiz) manat (bank xidməti ödənişləri də daxil olmaqla) məbləğində vəsaitin 2020-ci il üçün Azərbaycan Respublikasının dövlət büdcəsində nəzərdə tutulmuş Ehtiyat Fondunun vəsaiti hesabına maliyyələşdirilməsini təmin etsin;
- bu sərəncamın 1.1-ci bəndində göstərilən vəsaitin 2 920 500 (iki milyon doqquz yüz iyirmi min beş yüz) manatının Gəncə Şəhər İcra Hakimiyyətinin, 67 000 (altmış yeddi min) manatının Mingəçevir Şəhər İcra Hakimiyyətinin, 1 848 500 (bir milyon səkkiz yüz qırx səkkiz min beş yüz) manatının Ağdam Rayon İcra Hakimiyyətinin, 586 000 (beş yüz səksən altı min) manatının Ağcabədi Rayon İcra Hakimiyyətinin, 233 000 (iki yüz otuz üç min) manatının Bərdə Rayon İcra Hakimiyyətinin, 124 000 (bir yüz iyirmi dörd min) manatının Beyləqan Rayon İcra Hakimiyyətinin, 41 000 (qırx bir min) manatının Cəbrayıl Rayon İcra Hakimiyyətinin, 4 000 (dörd min) manatının Naftalan Rayon İcra Hakimiyyətinin, 2 296 500 (iki milyon iki yüz doxsan altı min beş yüz) manatının Tərtər Rayon İcra Hakimiyyətinin, 494 500 (dörd yüz doxsan dörd min beş yüz) manatının Füzuli Rayon İcra Hakimiyyətinin və 421 500 (dörd yüz iyirmi bir min beş yüz) manatının Goranboy Rayon İcra Hakimiyyətinin müvafiq xəzinə hesabına ödənilməsini təmin etsin;
- Maliyyə Nazirliyi və aidiyyəti yerli icra hakimiyyəti orqanları mülki əhali üçün hesablanmış maddi yardımların işçi qrupları tərəfindən Dövlət Komissiyasına təqdim edilən siyahılar əsasında 10 (on) gün müddətində yaşayış evlərinin sahiblərinin və ya onların qanuni nümayəndələrinin bank hesablarına (o cümlədən kart hesablarına) ödənilməsini təmin edib, nəticəsi barədə Azərbaycan Respublikasının Nazirlər Kabinetinə hesabat təqdim etsinlər”.
Bu məqsədlə dövlət tərəfindən 11 rayona vəsait ayrılıb. Dövlətin bu addımlarının əhəmiyyəti nədir?
“Dövlət, təbii ki, bununla bir daha göstərdi ki, o, vətəndaşlarının yanındadır”
“Ekonomiks” Beynəlxalq İqtisadi Araşdırmalar Birliyinin sədri, tanınmış mütəxəssis Fikrət Yusifov “Bakı-Xəbər”ə bildirdi ki, Ermənistanın təcavüzü nəticəsində mülki əhaliyə dəymiş ziyanın dövlət tərəfindən qarşılanması və bu məqsədlə 11 rayona vəsait ayrılması dövlətin ən çətin, ağır məqamlarda, vəziyyətlərdə vətəndaşlarını taleyin ümidinə buraxmamasının, hər addımda vətəndaşın yanında olmasının nümunəsidir. Bunun bir neçə istiqamətdə əhəmiyyətli olduğunu deyən F.Yusifovun fikrincə, Azərbaycan həm də özünün sosial dövlət olduğunu bir daha göstərib: “Bu, Ermənistanın təcavüzü nəticəsində mülki əhaliyə dəymiş ziyanın ödənilməsi, qarşılanması ilə bağlı dövlətimiz tərəfindən atılan addımdır. Dövlət, təbii ki, bununla bir daha göstərdi ki, o, vətəndaşlarının, əhalisinin yanındadır. Həmişə olduğu kimi, bu çətin məqamda daha çox vətəndaşının yanındadır. Çünki vətəndaşlarımız erməni vəhşiliyinin, vandalizminin nəticəsində böyük itkilərlə üzləşiblər, evləri, əmlakları dağılıb, şəxsi əşyalarına ziyan dəyib. Azərbaycan dövləti bununla bir daha özünün sosial dövlət olduğunu və əhalisinin bütün problemlərini hər bir şəraitdə çözməyə qadir bir dövlət olduğunu bu addımı ilə göstərdi. Təbii ki, bizim bir dövlət olaraq maliyyə imkanlarımız Ermənistan kimi dırnaqarası bir dövlətin imkanlarından qat-qat yüksəkdir və dövlətimiz də mülki əhaliyə dəymiş ziyanı yüksək səviyyədə ödəyəcək, Qarabağın bərpasını da yüksək səviyyədə aparacaq” - deyə F.Yusifov qeyd etdi.
İradə SARIYEVA
