Sentyabrın 27-dən başlayan, 44 gün davam edən və Dağlıq Qarabağ da daxil olmaqla işğal altındakı ərazilərimizin qaytarılması ilə nəticələnən Vətən müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrildi. Azərbaycan xalqı öz liderinin - müzəffər Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi. Müzəffər Azərbaycan Ordusu Ali Baş Komandanın rəhbərliyi altında cəmi 44 günə mümkünsüzü mümkün etdi! Ermənistanın hərbi kaputilyasiyasına nail olduq! Bəşəriyyətə haqqın, ədalətin, böyük dövlətlərin tapdağından qurtara biləcək bir dövlətin - Azərbaycanın var olduğunu sübut etdik. Bu ədaləti 44 gün ərzində yazan Azərbaycan xalqı, bütün dünya azərbaycanlıları bir yumruq kimi birləşərək, təkcə Ermənistanın yox, bütövlükdə haqsız güclərin üstünə getdi və sübut etdi ki, haqq yolunda, ədalətin, ərazi bütövlüyümüzün bərpası uğurunda vuruşuruq.
Üçtərəfli bəyanata əsasən, Dağlıq Qarabağın heç bir xüsusi statusu olmayacaq
Bəli, Azərbaycan əsgəri əsl qəhrəmanlıq, mərdlik, şücaət, rəşadət nümunəsi göstərdi. Düşmənin 30 il ərzində qurduğu, milyonlarla vəsait sərf etdiyi nəhəng istehkamlar qısa müddətdə darmadağın edildi, müzəffər ordumuzun tətbiq etdiyi savaş strategiyası müasir hərb tarixinə yeni örnək oldu. Belə vəziyyətdə Ermənistanın qarşısında yalnız iki yoldan birini seçmək qalırdı: ya Ermənistan ordusunun son tör-töküntüləri də döyüş meydanında son nəfərinə qədər məhv ediləcəkdi, ya da “ağ bayraq” qaldırıb, biabırçı hərbi məğlubiyyətini etiraf edəcəkdi. Paşinyan hakimiyyəti reallığı, nəhayət ki, qəbul etdi və noyabrın 10-da Ermənistan “ağ bayraq” qaldırdı, kapitulyasiya bəyannaməsini imzaladı.
30 il gözlədiyimiz o möhtəşəm tarixə şahidlik etmək zamanı yetişdi!
Azərbaycan, Rusiya prezidentləri və Ermənistan baş naziri tərəfindən noyabrın 10-da imzalanan üçtərəfli bəyanat Azərbaycan tarixinin ən böyük diplomatik qələbəsini təsdiq edən sənəddir. Üçtərəfli bəyanata əsasən, Dağlıq Qarabağın heç bir xüsusi statusu olmayacaq. Döyüş meydanında darmadağın edilən Ermənistanın Azərbaycan Prezidentinin münaqişənin ilk günlərindən bəyan etdiyi şərtləri qəbul etməkdən başqa çıxış yolu qalmadı.
Prezident İlham Əliyev ümummilli lider Heydər Əliyevin bütün gözləntilərini 17 illik hakimiyyəti dövründə gerçəkləşdirməyi bacardı
Azərbaycan illərdir həsrətində olduğu, səbrsizliklə gözlədiyi tarixi və qürurverici günlər yaşayır. İndi azadlığına qovuşmuş və hər qarışı müqəddəs olan torpaqlarımızda Azərbaycan bayrağının dalğalanmasından keçirdiyimiz qürur hissini sözlə ifadə etmək heç də asan deyil. Azərbaycan Ordusunun uğurlarının kökündə Prezident İlham Əliyevin son 17 ildə davam etdirdiyi, yeni çalarlarla zənginləşdirdiyi, çağdaş dövrümüzün tələblərinə uyğun çevik formada gerçəkləşdirdiyi ulu öndər Heydər Əliyevin siyasəti dayanır. Ümummilli lider Heydər Əliyev vurğulayırdı: “Mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümid bəsləyirəm”. Azərbaycan xalqı bu tarixi bəyanatın gerçəkliyinin bir daha əyani şahidi oldu. Prezident İlham Əliyev ümummilli lider Heydər Əliyevin bütün gözləntilərini 17 illik hakimiyyəti dövründə gerçəkləşdirməyi bacardı.
Ötən 17 ildə Azərbaycanın ən ağrılı problemi olan Dağlıq Qarabağ münaqişəsi bir an belə diqqətdən kənarda qalmadı
Prezident İlham Əliyevin apardığı məqsədyönlü və uğurlu siyasət nəticəsində peşəkar ordu quruculuğu, yüksək diplomatiya, qabaqcıl informasiya təminatı və iqtisadi sahədə saysız-hesabsız nailiyyətlər qazanıldı. Cəmi 44 günə təmin olunan böyük Qələbənin qazanılması üçün illərdir düşünülmüş planlı siyasət həyata keçirildi. Ötən illərdə Azərbaycan çeşidli təzyiqlərlə, siyasi çəkişmələrlə üzləşdi. Dövlət başçımız İlham Əliyev, bütün bunlara rəğmən, bir addım da olsun geri durmadı, müstəqil siyasət apararaq dövləti, xalqı daha da güclü şəkildə gələcəyə daşıdı, canından artıq sevdiyi ölkəsini davamlı olaraq inkişaf etdirdi. Ötən 17 ildə Azərbaycanın ən ağrılı problemi olan Dağlıq Qarabağ münaqişəsi bir an belə diqqətdən kənarda qalmadı. Ölkəmizin bu istiqamətdə mövqeləri gücləndi, ərazi bütövlüyümüz nüfuzlu qurumların rəsmi qərarlarında bir daha əks olundu. Bu qərarlar haqq işimizin uğurla yekunlaşmasında mühüm amil oldu. Azərbaycan Prezidenti həmin sənədlərin verdiyi üstünlüklərə, beynəlxalq hüquqa söykənərək hərbi əməliyyatlar zamanı ölkəmizə edilən təzyiqləri böyük ustalıqla dəf etdi. Məhz bu fəaliyyət sayəsində müharibənin gedişatında ölkəmizi dəstəkləyən dövlətlərin sayı artdı.
Ermənistan lobbisinin və xarici havadarlarının dəstəyi ilə münaqişə haqqında dünyada informasiya vakuumu yaratmaq istəyirdi
Qırx dörd günlük Vətən müharibəsi dövründə Prezident İlham Əliyevin diplomatik məharəti, prinsipiallığı, dəqiq və məqsədyönlü siyasəti nəticəsində Azərbaycan tarixi qələbə qazandı. Dövlət başçısının prosesi yüksək peşəkarlıqla, çevikliklə idarə etməsi, zəruri müdaxilələri diplomatik masada da bizi düzgün hədəflənmiş uğura doğru aparırdı. Ölkənin potensialı bütün platformalarda Ermənistanın işğalçılıq siyasətinin ifşa edilməsinə yönəldilmişdi. Prezident İlham Əliyev çıxışlarında hər zaman qeyd edirdi ki, məhz işğal siyasətinə görə Ermənistanı bütün regional layihələrdən təcrid edib. Dövlət başçısı tərəfindən yürüdülən düşünülmüş siyasətin nəticəsidir ki, Ermənistan heç bir perspektivi olmayan dalan dövlətə çevrildi. Bu baxımdan da əminliklə deyə bilirik ki, Azərbaycanın qazandığı bu Qələbə sadəcə 44 günlük müharibənin nəticəsi deyil. Belə ki, 17 illik fəaliyyəti dövründə Prezident İlham Əliyevin düşünülmüş şəkildə yürütdüyü uzaqgörən siyasət nəticəsində münaqişənin Azərbaycanın ərazi bütövlüyü çərçivəsində həlli ilə bağlı hüquqi baza yaradıldı, dünyada Azərbaycan haqqında obyektiv fikir formalaşdırıldı.
Müharibə dövründə döyüşlər sadəcə səngərdə və diplomatik masada deyil, informasiya məkanında da qızğın xarakter almışdı. Ermənistan, əvvəlki dövrdə olduğu kimi, istər erməni lobbisinin, istərsə də xarici havadarlarının dəstəyi və köməyi ilə münaqişə haqqında dünyada informasiya vakuumu yaratmaq istəyirdi. Lakin buna nail ola bilmədi.
İndi bütün dünya Azərbaycanın artan gücü ilə hesablaşmaq zorundadır
Beləliklə, ötən dövrdə səbrlə, təmkinlə yürüdülən siyasət nəticəsində qüdrətlənmiş Azərbaycan təkbaşına haqqı, ədaləti, beynəlxalq hüququ bərpa etməyə nail oldu. İndi bütün dünya haqqa söykənən Azərbaycanın artan gücü ilə də hesablaşmaq zorundadır.
Azərbaycan müharibədən uğurla və güclü formada çıxdı, vətəndaşlarımızın 30 ilə yaxın davam edən torpaq həsrətinə son qoyuldu, əldə olunan qələbə xalqın inamını özünə qaytardı. Torpaqlarımızın işğaldan azad olunması uğrunda canını, qanını fəda etmiş qəhrəman oğullarımızın, şəhidlərimizin, həmçinin həlak olan mülki vətəndaşlarımızın qisası alındı. Azərbaycan dövlətinin hərtərəfli qayğısı ilə əhatə olunan şəhidlərimizin xatirəsi bizim qəlbimizdə əbədi yaşayacaq və gələcək nəsillər onları hər zaman fəxrlə, qürurla yad edəcəklər.
Artıq Azərbaycan daha qüdrətli bir ölkəyə çevrilib. Təbiidir ki, müharibə və ondan sonrakı proseslərdə biz diasporumuzun aktiv fəaliyyətini müşahidə etdik. Onlar hər gün dövlətimizin yanında oldular. Hazırda onlara daha qüdrətli, qalib gəlmiş ölkənin diasporunu təmsil etmək şansı yaranır. Bu istiqamətdə diasporumuz hansı yenilikləri etməlidir və qələbə amilinin diasporumuzun daha da təşkilatlanmasına nə kimi təsiri olacaq?
“Sübut olundu ki, biz xaricdə birlik nümayiş etdirəndə, hətta güclü erməni diasporu da qabağımızdan qaçır”
Azərbaycan Milli İstiqalal Partiyasının Beynəlxalq məsələlər üzrə sədr müavini Elşən Mustafayev “Bakı-Xəbər”ə açıqlamasında bildirdi ki, qalib ölkənin vətəndaşı, məmuru, diaspor təmsilçisi olmaq fəxarət hissi yaradır: “Pandemiya ilə əlaqədar mənim xarici səfərlərim bir qədər az olur. Əvvələr isə, demək olar ki, ilin üçdəbir hissəsini xarici səfərlərdə olurdum. Təbiidir ki, bütün tədbirlərdə mən Azərbaycanı təmsil edirdim. Daima diasporumuzla əlaqə saxlayırdım. Hiss edirdim ki, onlarda vətənpərvərlik, Azərbaycana bağlılıq lazımi səviyyədədir, ancaq ərazilərimizin işğalı onları bərk sıxır. Çünki onlar ermənilərlə hansısa tədbirdə üz-üzə gələndə bu məqamı xatırladırdılar. Buna baxmayaraq, bizim diaspor təmsilçilərimiz hər zaman fədakar oldular. Müharibə dönəmində bunun bir daha şahidi olduq. Bu qələbə Azərbaycan diasporunu daha da konsolidasiya edə bilər. Bunun ilkin əlamətlərini biz 44 gün ərzində gördük. Bilirsiniz ki, diaspor təmsilçiləri arasında Azərbaycan hakimiyyətinə münasibətdə radikal mövqedə olan mühacirlər var. Müharibə zamanı biz onların da eyni mövqedən çıxış etdiyini gördük. Hamının amalı bir idi. Kimin gücü nəyə çatırdısa, Vətənə dəstək ifadə edirdi. Sübut olundu ki, biz xaricdə birlik nümayiş etdirəndə, hətta güclü olan erməni diasporu da qabağımızdan qaçır. Mənə elə gəlir ki, bizim diasporumuz müharibənin bizə qazandırdığı təcrübəni gələcək faəliyyətlərində də tətbiq edəcək”.
“Erməni lobbisi və diasporunun uzun illər ərzində Qarabağ mövzusu ətrafında formalaşdırdığı mif dağıdılıb”
Ekspertin sözlərinə görə, yaxşı təşkilatlanma həm də Azərbaycan diasporunun gücünü artıra bilər: “Bu da bizim layiqli diaspor nümayəndələrimizin yerli hakimiyyət qurumlarında, parlamentlərində , bələdiyyələrdə təmsilçiliyini artırar. Bir sözlə, biz diasporumuzu gücləndirməklə lobbiçilyiə keçid edə bilərik. Hazırda Azərbaycan beynəlxalq münasibətlər sistemində öz yerini möhkəmləndirməyə nail olub. Eyni zamanda, erməni lobbisi və diasporunun uzun illər ərzində Qarabağ mövzusu ətrafında formalaşdırdığı mif dağıdılıb. Azərbaycan həm informasiya müharibəsində, həm beynəlxalq ictimai rəyin formalaşdırılmasında, həm də qlobal güclərin regionda maraqlarının uzlaşdırılmasında, daha dəqiq ifadə etsək, bu maraqların Azərbaycanın milli mənafelərinə mümkün mənfi təsirlərinin neytrallaşdırılmasında çox ciddi uğurlar qazandı. Bu mənada, hesab edirəm ki, uğurlu siyasətimiz nəticəsində əldə etdiyimiz yeni irəliləyişlərimiz diasporumuzun da fəaliyyətinə müsbət təsirini göstərməlidir. Əminəm ki, biz diasporumuzun bu amildən müsbət mənada faydalandığının şahidi olacağıq. Bu qələbə, bütün sahələrdə olduğu kimi, bizə diaspor quruculuğu işində də yeni uğurlar gətirəcək”.
Məhəmmədəli QƏRİBLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur
