Məlum olduğu kimi, Azərbaycan Prezidenti, Rusiya Prezidenti və Ermənistanın baş naziri tərəfindən üçtərəfli bəyanat imzalanarkən bildirilirdi ki, Ermənistan silahlı qüvvələri tərəfindən işğal edilən və hazırda işğalda olan Qazax rayonunun 7 kəndi də Azərbaycana qaytarılacaq.
Üçtərəfli bəyanatı şərh edən ekspertlərin, demək olar ki, hamısı Qazaxın Ermənistanın işğalında olan Sofulu, Barxudarlı, Bağanis Ayrım, Qızıl Hacılı, Yuxarı Əskipara, Aşağı Əskipara və Xeyrimli kəndlərinin işğaldan azad ediləcəyini deyirdilər.
Qazaxın işğalda olan kəndlərinin azad olunması məsələsi haqda hələ Rusiya danışmır. Halbuki, üçtərəfli bəyanat imzalandıqdan sonra Qazax rayonunun İcra Hakimiyyətinin başçısı Rəcəb Babaşov bildirirdi ki, üçtərəfli bəyanata əsasən, Qazaxın 7 kəndi də azad olunacaq.
“Qazaxın 7 kəndi işğaldan azad olunacaq, lakin bu məsələdə Rusiyanın bir qədər lənglik etməsi...”
AVCİA-nın vitse-prezidenti, professor, tanınmış siyasi icmalçı Məhərrəm Zülfüqarlı “Bakı-Xəbər”ə bildirdi ki, Azərbaycan Prezidenti, Rusiya Prezidenti və Ermənistanın baş naziri tərəfindən imzalanan üçtərəfli bəyanatda Qazaxın işğal altında olan kəndlərinin də azad olunması qeyd olunub, nəzərdə tutulur. Mən o kəndlərin ərazisini işğaldan sonra da görmüş bir şəxs kimi danışıram. Qazaxda bələdiyyələrlə bağlı tədbirdə çıxış edəndən sonra bildim ki, qazaxlılar “Göyəzən” restoranına gedəndə həmin o işğal olunmuş ərazidən keçib gedirlər. Ermənilər o yoldan istifadə etmirdilər, amma o yol işğal altına düşürdü. Demək istəyirəm ki, həmin ərazinin işğalda olmasına baxmayaraq, Azərbaycan əhalisi o ərazidən istifadə edir. 1988-ci ildən bəri Ermənistan Dağlıq Qarabağa iddia edib. Azərbaycan Ordusunun qələbəsindən sonra Dağlıq Qarabağ problemi tam bitib. Demək istəyirəm ki, Qazaxa Ermənistanın heç vaxt iddiası olmayıb və bu ərazilər də azad olunmalıdır. Sadəcə, Qazaxın işğal altında olan 7 kəndinin işğaldan azad edilməsinin ləngiməsinin səbəbini Rusiyanın MDB məkanında apardığı siyasətdə görmək olar. Tarixən Rusiyanın imperialist siyasətində ikili mövqe tutmaq, yaxud ikili siyasət yeritmək olub. İndi də biz onu görürük. Baxmayaraq ki, Rusiya Azərbaycanın gücünü görür, Türkiyə kimi böyük dövlətin bizə dəstəyini görür, amma yenə də Qazaxın kəndlərinin işğaldan azad edilməsini ləngitməklə hadisələrin yönünü dəyişmək istəyir. Xüsusən də 10 dekabrda keçirdiyimiz möhtəşəm Qələbə paradına Rusiya telekanalları qısqanclıqla yanaşdı, bir kadr belə göstərmədilər. İndi ekspertlər deyirlər ki, Azərbaycan Ordusu tərəfindən Ermənistanın vurulan silahlarının, texnikalarının paradda nümayiş etdirilməsi Rusiya tərəfindən yaxşı qarşılanmayıb. Rusiya o silahı bizim düşmənimizə verib, biz onu döyüş meydanında məhv etmişik. Bunu Ermənistana satan, yaxud bağışlayan adam bundan inciməməlidir. Demək istəyirəm ki, Qazaxın 7 kəndi işğaldan azad olunacaq, lakin bu məsələdə Rusiyanın bir qədər lənglik etməsi görünür ki, onun müharibədən sonra özünün hansısa psixoloji üstünlüklərini büruzə verməsi cəhdi ilə bağlıdır. Bu da boş şeydir. Çünki Rusiya əvvəlki Rusiya deyil, biz də keçən əsrin 90-cı illərindəki Azərbaycan deyilik”.
M.Zülfüqarlının sözlərinə görə, digər Minsk Qrupu həmsədrlərindən fərqli olaraq, Rusiyanın bölgəyə gəlməsi yeni reallıqdan əmələ gəlib. O hesab edir ki, burada Rusiya-Türkiyə razılaşması regionda sülhün bərqərar olması və sonrakı əməkdaşlıq üçün də geniş imkanlar açır. Onun fikrincə, Rusiya əgər bu sazişdən kənara çıxmaq istəyəcəksə, bir daha nüfuzunu itirəcək, Azərbaycan qardaş Türkiyə ilə birgə öz hüquqlarını bərpa edə biləcək. “İnanmıram ki, Rusiya buna gedə. Hazırda Rusiya Ukrayna ilə müharibə vəziyyətindədir, Belarusda vəziyyət ağırdır, Qırğızıstanda vəziyyət yaxşı deyil, Moldova və Gürcüstanla da onların ərazilərində qondarma rejim yaratdığına görə münasibətləri çox pisdir. Yəni Rusiyanın keçmiş SSRİ-ni bərpa etmək siyasəti uğursuzluğa düçar olub. İndi o özünün ən yaxın slavyan müttəfiqlərini itirdikdən sonra öz sərhədlərinə çəkiləcək. İnanmıram ki, Rusiya Azərbaycan və Türkiyə ilə münasibətləri korlamaq istəyər. Sadəcə olaraq, bir qədər təmkinli olmaq lazımdır ki, burada əsəb oyunu gedir. Biz bunda da qalib gələcəyik” - deyə M.Zülfüqarlı vurğuladı.
İradə SARIYEVA
