Məlumdur ki, “Human Rights Watch” insan haqları təşkilatı dekabrın 15-də “Ermənistan Azərbaycana qarşı “klastr bombalarından istifadə edib” adlı hesabat yayıb. Hesabatda Ermənistanın Azərbaycana qarşı klastr sursatlardan istifadə etdiyi xüsusi olaraq qeyd olunub.
Təşkilat ilk əvvəl klastr sursatlardan istifadənin müharibə qanunlarını pozduğunu, daha sonra isə 44 günlük müharibə dövründə Ermənistan tərəfindən Azərbaycanın sıx yaşayış məskənlərinə dəfələrlə bu bombaların atıldığını vurğulayıb.
Bu ilin noyabrında təşkilatın araşdırmaçıları Azərbaycana səfər zamanı üç rayona klastr bombaları ilə dörd hücumun gerçəkləşdirildiyini sənədləşdiriblər. Sənəddə bildirilib ki, klastr sursatlardan istifadə müharibə qanunlarının pozulması deməkdir.
Təşkilat standart beynəlxalq nəşrlərə istinadla yazır ki, Ermənistanın arsenalında “Toçka” və “İskəndər” ballistik raketləri, “Smerç” və Çin istehsalı olan WM-80 yaylım atəşi sistemləri var.
Təşkilatın Avropa və Orta Asiya üzrə direktoru Hyu Uilyamson bildirib ki, klastr sursatları qəddar silahdır, beynəlxalq sazişlə qadağan olunub, onlardan istifadə dinc həyata biabırçı sayğısızlığı göstərir.
“Hesabatda Ermənistan hərbi birləşmələrinin Azərbaycanda əhalinin sıx yaşadığı yaşayış məntəqələrinə dəfələrlə klastr bombalar atdığı xüsusi olaraq vurğulanır”
Millət vəkili Vüqar İsgəndərov bildirdi ki, klastr silahlardan istifadə müharibə qanunlarının pozulması deməkdir: “Təşkilatın hesabatından da göründüyü kimi, Azərbaycan Ordusundan fərqli olaraq, Ermənistan hərbi birləşmələri arsenalında olan “Toçka-U” və “İskəndər” ballistik raketləri, “Smerç” və Çin istehsalı olan WM-80 yaylım atəşi sistemlərindən istifadə etməklə, altı həftəlik müharibə dövründə Azərbaycanda əhalinin sıx yaşadığı yaşayış məntəqələrinə dəfələrlə klastr bombalar atıb. Onların mülki əhaliyə qarşı belə qəddar formada rəftarı, əlbəttə, beynəlxalq təşkilatların da mütləq “gözünə girməlidir”.
V.İsgəndərovun sözlərinə görə, təşkilatın araşdırmaçıları bu ilin noyabrında Azərbaycana səfərləri zamanı üç rayona klastr bombaları ilə dörd hücumun gerçəkləşdirildiyini sənədləşdiriblər: “Sənəddə qeyd olunub ki, bu hücumlarda ikisi uşaq olmaqla azı yeddi mülki şəxs öldürülüb, iki uşaq daxil 20 nəfər yaralanıb. “Human Rights Watch” II Qarabağ müharibəsində Azərbaycanın da dörd hücumda klastr sursatlara əl atdığını sənədləşdirdiyini, hücumlardan üçünün Xankəndiyə, birinin Hadruta endirildiyini bildirib. Ermənistandan fərqli olaraq, bu silahlarla yalnız hərbi hədəflər vurulub. Bizim ordu mənfur düşmənlərimiz kimi ləyaqətsiz deyil ki, mülki insanları hədəf alsın. Biz haqq savaşında yalnız hərbi birləşmələrə, terrorçulara qarşı vuruşmuşuq və onları torpaqlarımızdan qovmuşuq. Qeyd edək ki, təşkilat oktyabrda Ermənistanın Azərbaycanın Bərdə şəhərinə klastr bombası ilə hücumda 21 dinc sakinin öldürüldüyünü, 70 nəfərin yaralandığını sənədləşdirib. Azərbaycana hücumların biri Bərdədə, ikisi Goranboyda, biri Tərtərdə qeydə alınıb. Qurum hücum vaxtı həmin ərazilərdə, yaxud onların yaxınlığında hərbçi personalın, avadanlığın, texnikanın mövcudluğunu müəyyənləşdirə bilməyib”.
Günel CƏLİLOVA
