Azərbaycan ictimaiyyəti, xüsusilə son bir il ərzində iqtidarın ölkəmizdə siyasi dialoq mühitinin təşviqi ilə bağlı müxtəlif səpgili layihələrin şahididir. Siyasətdə sağlam münasibətlərin dəstəklənməsi məsələsini ölkəmizdə vətəndaş cəmiyyətinin formalaşması istiqamətində atılan inamlı addımlar sırasına aid etmək olar. Prezident İlham Əliyevin təşəbbüsü ilə reallaşan islahatlar ölkədə yeni siyasi konfiqurasiyanın formalaşması ilə yanaşı, siyasətdə peşəkar və demokratik münasibətlərin bərqərar olunmasını da tələb edir. Hakimiyyətin müxalifət nümayəndələri ilə mütəmadi şəkildə təşkil olunan görüşləri Azərbaycanda siyasi dialoq mühitinin inkişafına yönəlmiş siyasət kimi dəyərləndirilməlidir.
Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin siyasi partiya rəhbərləri və ictimai fəallarla görüşləri davam edir. Açıq fikir mübadiləsi şəraitində keçirilmiş növbəti görüşlər bəzi müxalif partiyaların sədrləri ilə ayrı-ayrılıqda videokonfrans formatında təşkil olunub.
Görüşlər zamanı, bir çox məsələlərlə yanaşı, siyasi partiyalar haqqında yeni qanun layihəsi, Prezidentin dövlət quruculuğu məsələləri ilə bağlı təşəbbüsləri, vətəndaş cəmiyyəti institutlarının inkişafı üçün birgə reallaşdırıla biləcək layihələr, Azərbaycanda multikulturalizm ənənələri, ölkəmizdə yaşayan və yaşayacaq ermənilərə münasibət, eləcə də COVID-19 pandemiyası ilə mübarizədə maarifləndirmə işlərinin əhəmiyyəti və bir sıra digər önəmli mövzular ətrafında müzakirələr aparılıb.
Prezident Administrasiyasının rəsmisi siyasi partiyaların rəhbərləri ilə görüşlərində xalqın ordumuza göstərdiyi dəstəyi xüsusi vurğulayıb.
Görüşə görə təşəkkürlərini bildirən partiya rəhbərləri dövlətçiliyimizin, iqtidarla müxalifət arasında dialoqun və demokratik ənənələrin inkişafına xidmət edən bütün təşəbbüslərə hər zaman dəstək olacaqlarını söyləyiblər.
Qeyd edək ki, Ədalət Vəliyev bu sahəyə təyin ediləndən sonra siyasi partiyalarla hakimiyyət arasındakı dialoq mühiti daha da intensiv hal alıb. Artıq bir çox siyasi partiyalarla mütəmadi görüşlər keçirilib. Maraqlıdır, bu görüşlər siyasi partiyaların fəaliyyətinə, taktikasına hansı yenilikləri gətirib və bu istiqamətdə partiyalar daha hansı yenilikləri tətbiq etməyə hazırlaşır?
“Belə diqqətin fonunda, təbiidir ki, siyasi partiya olaraq bizim də fəaliyyətimizdə dönüşlər olacaq”
Belə görüşlərdə bir neçə dəfə iştirak edən müxalifyönümlü Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, doğrudan da, Ədalət Vəliyevin məlum posta təyinatından sonra hakimiyyətlə siyasi partiyaların münasibətlərində xeyli yumşalma əmələ gəldi: “Mən bu şöbənin fəaliyyətini çox müsbət dəyərləndirirəm. Bizim partiyamızın uzun illərdən bəri dövlət qeydiyyatından keçməsinə baxmayaraq, hakimiyyətlə münasibətlərimiz çox zəif olub. Çünki hakimiyyətdə bu işə məsul olan şəxslər tərəfindən siyasi təşkilatlara ayrıseçkilik qoyulurdu. Həmin adamların müəyyən qisim siyasi təşkilatlarla münasibəti şəxsi münasibət kontekstində dəyərləndirilirdi. Özlərinə yaxın olmayanları prosesdən kənar saxlamaq istəyirdilər. Şəxsən biz özümüzə qarşı belə ögey nmünasibətin şahidi olmuşuq. Ancaq son dönəmdə biz görürük ki, PA-nın məlum şöbəsi, demək olar, bütün partiyalarla normal münasibətlər qurur. Bunun da ən böyük nəticəsini biz Vətən müharibəsi dönəmində gördük. Ölkənin, demək olar ki, bütün siyasi qüvvələri birmənalı olaraq dövləti, ordunu, Ali Baş Komandanı müdafiə etdi. Bundan sonrakı dönəmdə də ölkənin taleyi ilə bağlı məsələdə ölkənin siyasi təşkilatları dövlətə dəstək bəyanatı ilə çıxış etdilər. Hesab edirəm ki, hakimiyyətin digər qollarına məsul olan şəxslər də fəaliyyətlərində belə örnəklərdən yararlanmalıdır. Bizim partiya olaraq taktika və strategiyamızda hər hansı dəyişiklik olmadı, ancaq hakimiyyətlə münasibətlərimizdə normallaşma yarandı. Hesab edirəm ki, biz də öz tərəfimizdən bu tempin saxlanmasında maraqlı olacağıq. Bir sıra partiyaların qeydiyyat məsələsi də həll edildi. İki gün əvvəl isə bir çox partiyaya, o cümlədən bizə ofis verildi. Bu məsələdə də həmin şöbənin xüsusi rolu oldu. Belə diqqətin fonunda, təbiidir ki, siyasi partiya olaraq bizim də fəaliyyətimizdə dönüşlər olacaq”.
Partiya sədri hesab edir ki, yenilikləri partiyanın fəaliyyətinin daha məhsuldar olmasında müşahidə etmək mümkün olacaq.
Məhəmmədəli QƏRİBLİ
