27 sentyabr tarixindən etibarən 6 həftədən artıq davam etmiş Ermənistan hərbi qüvvələrinin hücumları nəticəsində 10 şagird həlak olub, 16 şagird yaralanıb, 54 təhsil müəssisəsi isə müxtəlif dərəcəli dağıntılara məruz qalıb. Bunu Təhsil naziri Emin Əmrullayev Beynəlxalq insan hüquqları gününə həsr olunmuş tədbir zamanı çıxışında deyib.
Təhsil naziri dəymiş zərərin aradan qaldırılması istiqamətində müvafiq addımların atıldığını vurğulayıb.
Ermənistan hərbi qüvvələrinin hücumları nəticəsində həlak olan, erməni cinayətkarlarının hədəfinə çevrilən bu şagirdlərimizin xatirəsinin əbədiləşdirilməsində ermənilərin bu cinayətini necə simvollaşdırmaq olar?
Məhərrəm Zülfüqarlı: “Ermənistanın son cinayətləri nəticəsində həlak olan şagirdlərimizin xatirəsinə abidə qoyulmalıdır”
AVCİA-nın vitse-prezidenti, tarix elmləri doktoru, professor Məhərəm Zülfqarlının fikrincə, Ermənistan faşizminin qurbanı olan şagirdlərimizə abidə qoyulmalıdır və bu abidə o şəkildə işlənməlidir ki, özündə məsum uşaqlarımızın erməni vandalizminin qurbanı olduğu əksini tapsın. “Faşist Ermənistan 44 günlük müharibədə Azərbaycanın dinc, mülki əhalisini hədəfə aldı, uşaqlar da daxil olmaqla saysız insan həlak oldu. Həlak olanlar arasında 10 şagirdin də olması onu göstərir ki, Ermənistan bir dövlət olaraq humanizmdən, insanlıqdan kənar siyasət yürüdür və faşist davranışları nümayiş etdirir. Hesab edirəm ki, Ermənistanın ağırçaplı silahlardan, qadağan olunmuş raketlərdən atəş açması nəticəsində həyatını itirən Azərbaycan məktəblilərinin xatirəsinin əbədiləşdirilməsinə başlanmalıdır. Bizim şagirdlər erməni cinayətlərinin qurbanı olub, arzuları, istəkləri güllələnib. Ermənistanın son cinayətləri nəticəsində həlak olan şagirdlərimizə abidə qoyulmalı və bu abidədə Ermənistan faşizminin bütün detalları əks olunmalıdır ki, bu abidəni görən adam onların hansı dövlət tərəfindən öldürüldüyünü görsün. Bunun üçün Təhsil Nazirliyi hərəkətə keçməli və erməni faşizminin qurbanı olan məktəblilərimizə qoyulacaq abidə ilə bağlı müsabiqə elan etməlidir. Bu müsabiqədə heykəltəraşlar işlərini təqdim etsinlər”.
M.Zülfüqarlı hesab edir ki, bundan əlavə, həmin şagirdlər haqqında kitablar yazılmalı, KİV-də, sosial şəbəkələrdə ən müxtəlif xarici dillərdə məqalələr, məlumatlar yayılmalıdır. Bizim bu məsələni daha çox təbliğ etməli və onu beynəlxalq ictimaiyyətə çatdırmalı olduğumuzu deyən M.Zülfüqarlının fikrincə, eyni zamanda, orta məktəblərdə də şagirdlərə erməni vandalizminin, cinayətlərinin qurbanı olan şagirdlərimiz haqqında ətraflı məlumatlar verilməlidir: “Ermənistan faşizminin mahiyyəti çatdırılmalıdır ki, bu cinayət unudulmasın, eyni zamanda, bu nasistlərin hədəfinin Azərbaycan uşaqları, Azərbaycanın dinc əhalisi olduğu haqda davamlı olaraq şagirdlərimizə bilgilər verilməlidir”.
İlqar Orucov: “Ermənistanın bu qanlı cinayətlərinin qurbanı olan məktəblilərimizin xatirəsi əbədiləşdirilməlidir”
Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fizika-riyaziyyat üzrə fəlsəfə doktoru İlqar Orucovun fikrincə, Ermənistanın Azərbaycana təcavüzü nəticəsində təkcə məktəblər dağıdılmayıb, təkcə mülki əhaliyə hərtərəfli ziyan dəyməyib, eyni zamanda, təhsil işçilərimiz də, şagirdlərimiz də bu cinayətlərə tuş gəldilər: “Əvəla onu qeyd edim ki, Vətən müharibəsində müəllimlərimiz də böyük qəhrəmanlıq nümunələri göstərdilər. Hətta rayon təhsil şöbələrindən birinin müdiri və bir neçə müəllimimiz şəhid oldu. Əslində, müəllimlər bir daha göstərdilər ki, onlar yalnız məktəbdə şagirdlərə Vətəni sevməyi öyrətmirlər, eyni zamanda, onlar Vətənin çətin günündə onun müdafiəsində öz şücaətlərini göstərirlər. Bu müəllimlərimiz öz şagirdlərinə vətənpərvərlik nümunəsini öz canları-qanları bahasına nümayiş etdirdilər. Əlbəttə, Ermənistan faşizmi nəticəsində 10 şagirdimizin həlak olması, 16 şagirdimizin isə yaralanması erməni təcavüzünün, ermən vəhşiliyinin bariz nümunəsidir. Hətta bilirsiniz ki, müharibə gedən dövrdə Azərbaycanda 1200 məktəb bütövlükdə fəaliyyətini dayandırdı. Bu, əslində, onunla bağlı idi ki, düşmən çox qəddardır, bütün müharibə qanunlarını, bütün sivil qanunları, bəşəriyyətin tərəfdar çıxdığı bütün dəyərləri tapdayaraq məktəblərə, məktəblilərə, mülki əhaliyə atəş açırdı. Erməni faşistləri bizim şagirdlərimizi öldürdü, yaraladılar. Əlbəttə, Ermənistanın bu qanlı cinayətlərinin qurbanı olan məktəblilərimizin xatirəsi əbədiləşdirilməlidir. Biz onları unutmamalıyıq. Bu şagirdlərimizin arzuları düşmən cinayətləri nəticəsində nakam qaldı, onların gələcəkləri məhv oldu”.
İ.Orucovun sözlərinə görə, təkcə erməni faşizmi nəticəsində həyatını itirən 10, yaralanan 16 şagirdlə məsələ bitmir, bu gün bizim yüzlərlə şagirdimiz var ki, onlar bundan stress keçirir, müharibənin acısını indi də yaşayırlar. “Şəhid olan nə qədər valideynimiz var ki, onların övladları bu stressi yaşayır və əbədi olaraq da yaşayacaqlar.
İctimai Şura olaraq Təhsil naziri Emin Əmirullayevlə görüşdə təklif etdik ki, dərsliklər yenilənməlidir. Xüsusən də bu dərsliklərdə Vətən müharibəsində igidlik göstərmiş və şəhid olmuş hərbçilərimizin xatirəsi əbədiləşdirilməli, onların qəhrəmanlıqları gələcək nəsillərə ötürülməlidir. Hesab edirəm ki, Ermənistan faşizminin qurbanı olan şagirdlərimiz haqqında ədəbiyyat, tarix dərsliklərində məlumatlar əks olunmalıdır. Onların xatirəsi unudulmamalı və onlar daim xatırlanmalıdır. Biz bununla gələcək nəsillərə nümunə göstərə bilərik ki, bizim Ermənistan kimi qəddar, cinayətkar düşmənimiz var və onlar ermənilərin bu cinayətlərini heç zaman unutmasınlar. Bu baxımdan, fikrimcə, dərsliklərdə həlak olan şagirdlərimizin xatirəsinin əbədiləşdirilməsi üçün işlər görülməlidir. Deyim ki, artıq bu istiqamətdə işlər gedir, məlumatlar toplanır, dəqiqləşdirilir, bizim dərsliklərimizdə mütləq şəkildə erməni faşistlərinin qətlə yetirdikləri şagirdlər haqqında məlumatlar yer alacaq. Bununla iş bitməməlidir, eyni zamanda, həmin şagirdlərin xatirəsi onların təhsil aldığı məktəblərdə əbədiləşdirilməlidir. Düşünürəm ki, onlarla bağlı xüsusi guşələr yaradılmalı, onların doğulduqları, qətlə yetirildikləri tarix, şəkilləri əks olunmalıdır. Həmçinin də o şagirdlərin oxuduqları siniflərdə sinif otaqlarında xüsusi partaların ayrılması, onların xatirələrinin sinif yoldaşları tərəfindən daim əziz tutulması, onların sanki əbədi olaraq sinifdə olması təəssüratı yaradılmalıdır. Hansı məktəbdə ki, həyatını Ermənistan faşizmi nəticəsində itirən şagird var, orada bu cür addımlar atılsa, hər yeni sinif həmin sinifdə təhsil alarkən bir daha onları xatırlayacaq. Bununla da biz erməni təcavüzünü, faşizmini gələcək nəsillərə ötürə biləcəyik”.
İ.Orucov vurğuladı ki, artıq bu istiqamətdə proseslər başlanıb, Təhsil Nazirliyi xüsusilə dərslik məsələsi ilə bağlı işlərə başlayıb. Ekseprt ümid edir ki, növbəti tədris ilində biz yeni dərsliklər görə biləcəyik və bu dərsliklərdə məhz bu kimi məqamlar yer alacaq. “Ənənəvi dərslərə başlandıqda artıq məktəblərdə şəhid olan şagirdlərimizlə, müharibədə qəhrəmanlıqla şəhidliyə qovuşan məzunlarla, şəhidlərimizlə bağlı xüsusi lövhələrin, guşələrin şahidi olacağıq” - deyə İ.Orucov qeyd etdi.
İradə SARIYEVA
