Ermənistanın hərbi təcavüzü nəticəsində zərər çəkmiş hər bir vətəndaşa dövlət tərəfindən yardım ediləcək. Məlumat üçün bildirək ki, 2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə dəymiş ziyanın ödənilməsi ilə bağlı əlavə tədbirlər haqqında Sərəncam imzalayıb.
Onu da vurğulayaq ki, 2292 nömrəli Sərəncamla yaradılmış Dövlət Komissiyası tərəfindən təxirə salınmadan iş aparılır. Ölkə başçısının sərəncamı ilə mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi və aradan qaldırılması ilə bağlı tədbirlərin icrasına başlanıb. Dəyən ziyanın qarşılanması üçün yaradılmış işçi qruplarına 11 rayonda dəymiş ziyanın müəyyənləşdirilməsi ilə bağlı müvafiq tapşırıqlar verilib.
Sərəncama əsasən, "ASAN xidmət" tərəfindən vahid məlumat bazası formalaşdırılacaq. Bazaya mülki əhaliyə, dövlət əmlakına, infrastruktur obyektlərinə, sahibkarlıq fəaliyyəti subyektlərinə, nəqliyyat vasitələrinə, kənd təsərrüfatı məhsulları və texnikasına, o cümlədən, əhaliyə məxsus tələf olmuş heyvanlar üzrə dəymiş ziyan və onun aradan qaldırılması ilə bağlı müfəssəl məlumatlar daxil edilir.
Onu da qeyd edək ki, artıq Ermənistan silahlı qüvvələrinin dinc sakinlərin olduğu yaşayış məntəqələrini atəşə tutması nəticəsində mülki əhaliyə dəymiş ziyan hesablanır. Belə ki, Füzuli və Cəbrayıl rayonlarına dəymiş ziyanın müəyyənləşdirilməsi prosesi başa çatıb. Ermənistan silahlı qüvvələrinin təxribatı nəticəsində mülki əhaliyə dəyən ziyanın müəyyənləşdirilməsi və aradan qaldırılması ilə bağlı yaradılmış Dövlət Komissiyasının üzvü İsmayıl Zeynalov media nümayəndələrinə açıqlamasında deyib ki, komissiya üzvləri artıq Cəbrayıl və Füzuli rayonlarına dəymiş ziyanı müəyyənləşdiriblər: "Cəbrayıl rayonunda Cocuq Mərcanlı kəndində 47 evə ziyan dəyib. Onlardan 41-i fərdi ev, 3-ü sahibkarlıq obyekti, 1-i məktəb, 2-si isə inzibati binadır. Cəbrayıl rayonunda tam dağılan ev yoxdur, amma təmirə ehtiyacı var. Füzuli rayonunun işğal edilməyən hissəsində azərbaycanlıların yaşadığı 348 fərdi evə baxış keçirilib ki, onlardan 12 ev tam olaraq dağıdılıb. Bundan başqa, rayon ərazisində məktəb, inzibati bina və sahibkarlıq subyektlərinə də ziyan dəyib. Ümumilikdə, rayon ərazisində 374 ev və obyektə ziyan dəyib, 6 maşın istifadəyə yararsız vəziyyətə düşüb, 488 ev quşu tələf olub".
“Erməni təcavüzü nəticəsində mülki əhaliyə dəyən ziyanın dövlət tərəfindən qarşılanması vətəndaşların sosial rifahını yaxşılaşdıracaq”
Sosial sahə üzrə ekspert Mayis Əliyev bildirdi ki, erməni təcavüzü nəticəsində mülki əhaliyə dəyən ziyanın dövlət tərəfindən qarşılanması vətəndaşların sosial rifahını yaxşılaşdıracaq. Bu isə savaşın iqtisadi nəticələrinin, fəsadlarının aradan qaldırılmasında önəmli rol oynayacaq: “Erməni faşizmindən nəsibini alan Gəncə, Bərdə, Tərtər və digər ərazilərdə xeyli sayda mülki əhalinin əmlakına ziyan dəyib, 100-ə yaxın insan həyatını itirib, 400-dən çox insan isə yaralanıb. Təqdir olunmalı haldır ki, dövlətin müharibədən ötən 1 aydan çox zaman kəsiyində atdığı sosial müdafiə xarakterli addımlar sırasında qeyd olunan kateqoriyaya aid əhali xüsusi yer aldı. İlk növbədə, müharibə zamanı həyatını itirən mülki şəxslərə şəhid statusu verildi. Ardınca cəbhə xəttindən kənarda olan və Ermənistanın müharibə cinayətlərindən nəsibini almış şəxslərin əmlak problemlərinin həlli üçün addımlar atıldı. Prezident İlham Əliyev 6 noyabr tarixində “2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə, dövlət əmlakına, o cümlədən, infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi və aradan qaldırılması ilə bağlı tədbirlər haqqında” müvafiq Sərəncama imza atdı. Bu sənəddə problemin həlli üçün konkret tapşırıqlar əksini tapıb. Sərəncamın mahiyyəti odur ki, erməni təcavüzü nəticəsində mülki əhaliyə dəymiş ziyan ödəniləcək. Həmçinin, sahibkarlara dəymiş zərər də ödəniləcək”.
Günel CƏLİLOVA
