Prezident İlham Əliyev 2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə dəymiş ziyanın ödənilməsi ilə bağlı əlavə tədbirlər haqqında Sərəncam imzalayıb.
Sərəncama əsasən, sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhalinin əmlakına dəymiş ziyanla bağlı maddi yardım ödəniləcək.
Dağıdılmış və ya qəzalı vəziyyətə düşmüş yaşayış evləri üzrə məişət əşyalarına dəymiş ziyanla bağlı hər bir ailəyə 6000 (altı min) manat, şəxsi əşyalara dəymiş ziyanla bağlı hər bir ailə üzvünə 1500 (min beş yüz) manat məbləğində yardım ödəniləcək.
“Ölkə başçısı istər təbii fəlakətlərdə, istərsə də mənfur qonşularımızın törətdiyi hərbi cinayətlərdə zərər çəkmiş hər bir vətəndaşın yanında olub”
Erməni təcavüzü nəticəsində mülki əhaliyə dəymiş ziyanın ödənilməsinin əhəmiyyəti haqqında danışan millət vəkili Məlahət İbrahimqızı qeyd etdi ki, sentyabrın 27-dən başlayaraq Ermənistan silahlı qüvvələrinin Azərbaycan Respublikasının ərazisinə təcavüzü nəticəsində mülki əhalinin əmlakına dəymiş ziyanla bağlı kompensasiyanın verilməsi nəzərdə tutulub: “Birinci dəfə deyil ki, cənab Prezident belə bir sərəncam imzalayır. Xatırladım ki, dəfələrlə analoji sənəd və sərəncamlar imzalanıb. 2016-cı ildə Aprel döyüşləri zamanı Tərtər və bir sıra sərhəd boyunca olan bölgələrdə Ermənistan böyük dağıntılar törətmişdi. Həmin ildə də möhtərəm Prezident dövlətimizin güc və imkanlarından istifadə edərək, erməni təcavüzündən əziyyət çəkən insanlara kompensasiyanın ödənilməsi ilə bağlı tapşırıq verdi. Ölkə başçısı istər təbii fəlakətlərdə, istərsə də mənfur qonşularımızın törətdiyi hərbi cinayətlərdə zərər çəkmiş hər bir vətəndaşın yanında olub. Hər bir vətəndaş və ailə dövlətimizin gücünü, eyni zamanda, Prezidentimizin diqqət və qayğısını hiss edir. Sosial şəbəkələrdə çox yüksək qiymətləndirilən bu sərəncam insanlarımızın dövlət qayğısı ilə əhatə olunduğunun bariz nümunəsidir”.
Son olaraq qeyd edək ki, bu sərəncam Azərbaycan vətəndaşının sosial rifahının, üzləşdiyi problemlərin həllinin, təhlükəsizlik məsələlərinin dövlətimizin prioriteti olduğunu bir daha təsdiqləyir.
Günel CƏLİLOVA
