24/11/2020 14:00
728 x 90

Senat noyabrın 25-də Fransa dövlətinin olan-qalan şərəfini də ermənilərin ayaqları altına sərəcək - Napoleonun vətənini rəzil edən Makronların cinayətləri davam edir...

Elşad Musayev: “Bütün vasitələri işə salıb buna mane olmağa çalışmalıyıq”

img

Fransa parlamentinin yuxarı palatası Senat 25 noyabrda qondarma Dağlıq Qarabağ Respublikasının tanınması ilə bağlı Konstitusiyanın 34-1-ci maddəsinin tətbiq edilməsinə dair səsvermə keçirəcək. Bir neçə senatorun hazırladığı qətnamə layihəsi ilə bağlı müzakirələr noyabrın 18-də aparılıb və səsvermənin noyabrın 25-də keçirilməsinə qərar verilib.

Fransa rəhbərliyi İkinci Qarabağ müharibəsi başlayandan bu günə kimi ermənilərin maraqlarından çıxış edir, dünyanın gözü qarşısında işğalçılığa və separatizmə dəstək verir. Düzdür, sözügedən qətnamə qəbul olunsa belə, bu sənədin hansısa hüquqi qüvvəsi olmayacaq. Fransa Konstitusiyasının 34-1-ci maddəsinə əsasən, bu, yalnız bir qətnamədir, icrası məcburi deyil. Bu və ya digər məsələlərlə əlaqədar il ərzində yüzlərlə təşəbbüs irəli sürülür, lakin onların tam əksəriyyəti müzakirəyə belə çıxarılmır. Ancaq qətnamə layihəsi Dağlıq Qarabağdakı qondarma qurumun tanınması məsələsindən çox, onun tanınmağa ehtiyac olduğu iddiası lobbiçiliyi üzərində qurulub. Şübhəsiz, bu, erməni lobbisinin ciddi cəhdləri sayəsində ərsəyə gəlmiş növbəti təxribatdır. Bununla erməni lobbisi Fransada təsir dairəsində olan siyasətçilərin, parlament nümayəndələrinin vasitəsilə öz iddialarını gerçəkləşdirməyə çalışır. Əslində, Senat Fransanın xarici siyasətinin müəyyənləşdirilməsində son söz sahibi olan təsisat deyil, qətnamələr yalnız hökumət icazə verdiyi təqdirdə səsverməyə çıxarıla bilər. Senatın cədvəlində də bu sənəd “qəbul oluna bilər” başlığı ilə keçir, onun mütləq şəkildə qəbul edilməsinə ehtiyac duyulmasına işarə verilmir.

Bütün hallarda, sözügedən bədnam qətnamə qəbul olunarsa, bu bizim ziyanımıza olacaq. O baxımdan bunun qarşısını almaq mümkündürmü? Mümkündürsə, nə etmək lazımdır?

  • “Məğlubiyyətin əvəzini çıxmaq üçün Ermənistanın tərəfdarları müxtəlif çirkin vasitələrdən istifadə edirlər”

Sözügedən məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayev bununla bağlı bir sıra məqamlara toxundu: “Əvvəla Azərbaycan döyüş meydanında təkcə Ermənistanı deyil, ermənilərin havadarlarını da məğlub edib. Ona görə də bu məğlubiyyətin əvəzini çıxmaq üçün Ermənistanın tərəfdarları müxtəlif çirkin vasitələrdən istifadə edirlər. Fransa Senatında qondarma qurumun tanınması ilə bağlı məsələnin qaldırılması bu çirkin kampaniyanın tərkib hissəsidir. Bundan əvvəl Paris meriyası bu təşəbbüslə çıxış edib. Təbii ki, Senatın bu qərarının hüquqi qüvvəsi olmayacaq. Ancaq buna rəğmən, belə bir qərar verilsə, bu, ümumən bizim ziyanımızadır. Ona görə də Azərbaycan bütün vasitələri işə salıb bunu əngəlləməyə çalışmalıdır. Fransa rəsmiləri ilə bizim hakimiyyət intensiv təmasda olmalıdır, öz etirazını bildirməlidir. Nəzərə almaq lazımdır ki, Fransanın Azərbaycanda bir sıra iqtisadi maraqları var. Fransanın “Total” şirkəti ölkənin ən böyük neft şirkətidir, neçə ildir Azərbaycanda fəaliyyət göstərir. İqtisadi baxımdan Azərbaycan Fransa üçün sərfəli ölkədir. Bundan başqa, Azərbaycan Fransada bir sıra xeyriyyəçilik layihələrində yaxından iştirak edib. Məsələn, məşhur “Luvr” muzeyinin təmirində ölkəmiz yardım edib və s. Ona görə də bütün bunlar Fransanın diqqətinə çatdırılmalı, müxtəlif səviyyələrdə etiraz edilməlidir. Avropada fəaliyyət göstərən diaspor təşkilatlarımız hərəkətə keçməlidirlər. Yəni bütün vasitələri işə salıb buna mane olmağa çalışmalıyıq”.

Partiya sədri hesab edir ki, diplomatik müstəvidə nə mümkündürsə, Azərbaycan bunu etməlidir.

Vidadi ORDAHALLI

Son xəbərlər