Məlum olduğu kimi, yaxın günlərdə Paris meriyası qondarma “Dağlıq Qarabağ Respublikası”nı tanımağa hazırlaşır. Prosesin Fransa hakimiyyəti tərəfindən sanksiyalaşdırıldığı şübhə doğurmur. Parisin meri Ann İdalqo qatı ermənipərəst mövqeyi ilə tanınır, onun erməni lobbisinin tam nəzarətində olduğu bildirilir.
Qeyd edək ki, Fransa meri A.İdalqo Fransa erməniləri ilə sıx münasibət saxlayır. Onun müavinlərindən biri erməni Anuş Toronyandır. A.Toronyan fransız ermənilərinin təşkilatı CCAF-ın rəhbəri Ara Toronyanın qızıdır. 2015-2018-ci illərdə Parisin meri A.İdalqo Ermənistan prezidenti Serj Sarkisyanla 4 dəfə görüşüb. Qondarma “erməni soyqırımı” ilə bağlı tvitlər paylaşıb. Fransada erməni təşkilatlarının koordinasiyası şurasının rəhbəri Jan-Mark Ara Toronyanın qızı A.Toronyanı öz müavini təyin edib və s.
ATƏT MQ həmsədri olan Fransa qurumun fəaliyyəti dövründə davamlı şəkildə ermənipərəst mövqeyi ilə seçilib, həmsədr ölkə mandatının prinsiplərini pozaraq işğalçı Ermənistana hərtərəfli dəstək verib. 44 günlük müharibə dövründə Fransa bu ənənəsinə bir daha sadiq qaldı. Bütün bunlar onu deməyə əsas verir ki, hazırda Fransanın Azərbaycana münasibətini açıq düşmənçilik kimi də qiymətləndirmək olar. Erməni lobbisinin ciddi təsiri altında olan Fransa hökuməti və şəxsən Prezident Makron ermənilərin dəstəyini əldə etmək üçün müharibə dövründə işğalçı ölkəyə siyasi, iqtisadi və hərbi dəstək göstərib. Fransanın hərbi kəşfiyyatı davamlı şəkildə əldə etdiyi məlumatları Ermənistana ötürüb, Fransadan Ermənistana raket sistemləri də daxil olmaqla silah-sursat göndərilib.
Təbii ki, Fransanın anti-Azərbaycan və Ermənistanı müdafiə etmək cəhdləri heç bir nəticə vermədi. Azərbaycan işğal altında olan torpaqları azad etdi. Fransa hakimiyyətinin mövqeyi və cəhdləri onsuz da ölü qurum olan ATƏT MQ həmsədrlik institutunun tam məhv edilməsinə istiqamətlənib.
Onu da qeyd edək ki, Fransa Avropa İttifaqı ölkələrindən biri olaraq Azərbaycanla sıx iqtisadi əlaqələrə malikdir. Avropa İttifaqı ölkələri arasında ən çox ticarət dövriyyəsinə sahib ölkələr arasında Fransanın özünəməxsus yeri var. 2020-ci ilin yanvar-oktyabr aylarında Azərbaycanla Fransa arasında ticarət dövriyyəsinin həcmi 428 milyon dollar olub. İndiyədək Azərbaycan tərəfindən Fransa iqtisadiyyatına 2,1 milyard dollar, Fransa tərəfindən isə Azərbaycana 2,2 milyard dollar sərmayə yatırılıb.
Belə olan halda, Fransanın bütün bu yaramazlıqları qarşısında bu ölkənin Azərbaycan iqtisadiyyatında iştirakına yenidən baxıla bilərmi?
“Azərbaycan iqtisadiyyatının müxtəlif sahələrində bu ölkənin 65 şirkəti fəaliyyət göstərir”
Məsələyə münasibət bildirən ekspert Rəsul Cahangirlinin sözlərinə görə, rəsmi Parisin bu ədalətsiz siyasətinə qarşı Fransa ilə olan iqtisadi əlaqələrə yenidən baxılmlıdır: “Heç şübhə etmirəm ki, əlaqələrə yenidən baxılsa, bundan iqtisadi baxımdan ən çox Fransa itirəcək. Çünki Fransa Azərbaycanda bir sıra iqtisadi layihələrdə iştirak edir. Cənubi Qafqazda iqtisadi baxımdan ən öndə gedən ölkə Azərbaycandır. Azərbaycan iqtisadiyyatının müxtəlif sahələrində, o cümlədən, sənaye, enerji, ticarət, xidmət, kənd təsərrüfatı və s. sahələrdə 65 Fransa şirkəti fəaliyyət göstərir. Fransa şirkətləri Azərbaycanda dövlət investisiyaları hesabına həyata keçirilən və dəyəri 2,1 milyard dollar olan qeyri-neft layihələrində podratçı kimi iştirak edirlər. Fransa şirkətləri Balaxanıda qurulan zibil emalı müəssisəsinin yaradıcısıdır. Fransız şirkətləri hər il Azərbaycandan milyonlarla dollar qazanc əldə edirlər. Ölkəmizdə çoxsaylı fransız məhsulu satılır. Hesab edirəm ki, rəsmi Parisin ermənipərəst siyasətinə cavab olaraq Fransa ilə iqtisadi əlaqələrə yenidən baxılmalıdır. Bu ölkənin məhsulları boykot edilməlidir”.
Ekspertin fikrincə, Azərbaycan sözügedən addımları atsa, bu, qarşı tərəfə ciddi dərs olacaq.
Vidadi ORDAHALLI
