Azərbaycan, Rusiya və Ermənistan dövlət başçılarının birgə imzaladığı bəyanatda Naxçıvanla bağlı ayrıca müddəa da yer alır. Qeyd olunur ki, bu proses çərçivəsində Naxçıvan da blokadadan azad olur. Rusiya tərəfi Ermənistan ərazisindən Naxçıvanla dəhlizin yaradılmasını öz üzərinə götürür. Tərəflərin razılığı əsasında Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək.
Prezident, müzəffər Ali Baş Komandan İlham Əliyev xalqa müraciətində Naxçıvanla bağlı məsələyə toxunub: “Digər önəmli məsələ, xüsusilə qeyd etmək istəyirəm ki, Naxçıvan Muxtar Respublikasının Azərbaycanın əsas hissəsi ilə əlaqəsi bu sənəddə təsbit edilir. Həm bütün kommunikasiyaların, yolların açılması, eyni zamanda, burada göstərilir ki, yeni nəqliyyat-kommunikasiya infrastrukturu yaradıla bilər və yaradılmalıdır. Biz bunu əlbəttə ki, çox dəstəkləmişik. Deyə bilərəm ki, mənim təkidimlə bu bənd bu bəyanata salındı. Çünki birbaşa Ermənistan-Azərbaycan Dağlıq Qarabağ münaqişəsi ilə bu bəndin əlaqəsi yoxdur. Ancaq mənim təkidli tələblərim şadam ki, qəbul olundu”.
Bütün bu deyilənlərin fonunda, sülh bəyannaməsində Naxçıvanla bağlı maddənin olması nə deməkdir? Bunun əhəmiyyətini ekspertlər necə dəyərləndirirlər?
“Həmçinin, başqa kommunikasiya xətlərinin çəkilməsi mümkün olacaq”
Sözügedən məsələyə aydınlıq gətirən professor Əli Əlirzayevin fikrincə, bunun çox böyük əhəmiyyəti var: “Çünki Naxçıvan Muxtar Respublikasının iqtisadiyyatı xarici ölkələrlə iqtisadi əlaqələrdən asılıdır. Naxçıvan iqtisadiyyatı uzun müddət blokada şəraitinə düşmüşdü. Mehridən gedən yol blokadada idi, gediş-gəliş yox idi. Ona görə də iqtisadiyyatın inkişafı, təbii ki, hava yolu ilə olurdu. Bu isə müxtəlif imkanlardan istifadə etməyi məhdudlaşdırırdı. Naxçıvanda duz ehtiyatları, mineral sular var. Ümumiyyətlə, təbii sərvətləri çoxdur. Bunun başqa ölkələrə daşınması mühüm hadisədir. Naxçıvanda turizmin inkişafı çox aktual məsələdir, sağlamlığın inkişafı üçün əhəmiyyətli resurslar var. Bu yolun açılması Bakı-Naxçıvan-Türkiyə marşrutu ilə yükdaşımaları reallaşdıracaq. Həmçinin, başqa kommunikasiya xətlərinin çəkilməsi mümkün olacaq. Bu proses isə ucuz başa gələcək. Yeni iş yerləri açılacaq. Dəmir yolunun, ümumiyyətlə, nəqliyyatın yaradılması orada olan infrastrukturun inkişafına gətirib çıxaracaq. Əhalinin gediş-gəlişi asanlaşacaq, rifahı yaxşılaşacaq. Azərbaycanla birbaşa Naxçıvan, İran, Türkiyə əlaqələri genişlənəcək. Həqiqətən, Naxçıvan Şərqin qapısı kimi öz funksiyasını yerinə yetirəcək, bundan əminəm”.
Ə.Əlirzayevin fikrincə, müasir şəraitdə Naxçıvan iqtisadiyyatı dəfələrlə inkişaf edəcək.
Vidadi ORDAHALLI
