“Əziz həmvətənlər bu bəyanatın tarixi əhəmiyyəti var. Bu bəyanat videokonfrans formatında imzalanıb. Bəyanat 3 ölkə tərəfindən imzalanmalı idi. Lakin son anda Ermənistanın Baş naziri bəyanatı imzalamaqdan imtina etdi. Buna görə də bəyanatı mən və Rusiya Prezidenti imzaladıq. Rusiya və Ermənistanın dövlət başçıları bu sənədi imzalayacaqlar. Paşinyanın bu hərəkəti başadüşüləndir. Paşinyan onsuz da bu bəyanatı imzalayacaq. Bu bəyanat bizim şanlı qələbəmizdir”. Bu sözləri Azərbaycan Prezidenti İlham Əliyev xalqa müraciətində bildirib.
N.Paşinyan nə İlham Əliyev, nə Vladimir Putin kimi bəyanatı dünyanın gözü qarşısında imzalamadı. O niyə dünyanın gözü qarşısında məlum bəyanatı imzalamaqdan imtina etdi?
“Paşinyan bilərəkdən məlum bəyanatı imzalamaqdan imtina etdi, ancaq...”
Hərbi ekspert Üzeyir Cəfərov qəzetimizə açıqlamasında qeyd etdi ki, N.Paşinyan bilərəkdən məlum bəyanatı imzalamaqdan imtina etdi. Ancaq sənədi imzalamamaq Paşinyanı məsuliyyətdən azad etmir: “Paşinyan həm Ermənistanın, həm də Qafqazın ən böyük cinayətkarlarından biridir. O bu vəziyyəti təhlil etməyə borclu olan şəxs kimi çoxlu sayda hərbçimizin ölümünə səbəb oldu. Azərbaycan Ordusunun şərəfli əsgər və zabitlərinin ölümünə bu şəxs səbəb oldu. Bu səbəbdən də N.Paşinyan sərt şəkildə cəzalandırılmalıdır. Çox güman ki, Ermənistan əhalisi Paşinyanı cəzalandıracaq”.
Həmsöhbətimiz onu da əlavə etdi ki, bəyannamədə ən vacib məsələlərdən biri də odur ki, heç bir halda, Dağlıq Qarabağa status verilməsi haqqında bir kəlmə də söhbət getmir. Bütövlükdə, sənəddə bizim üçün ən fundamental məsələlər öz həllini tapıb. Bu da ondan ibarətdir ki, Dağlıq Qarabağ Azərbaycanın tərkib hissəsidir, qan tökmədən Laçın, Kəlbəcər və Ağdamın yerdə qalan hissəsi Azərbaycana qaytarılacaq və orada bir nəfər də erməni əsgəri qalmayacaq, yəni işğalçı ordunun Azərbaycan ərazisində mövcudluğuna son qoyulur: “Doğrudan da bu, tarixi bir nailiyyətdir və xüsusilə Şuşanın azad olunması bu tarixi nailiyyətin baş tutması üçün unikal imkanlar yaratdı. Bu möhtəşəm qələbənin memarı cənab Prezident İlham Əliyevdir, müzəffər Azərbaycan Ordusudur, Azərbaycan xalqıdır”.
Günel CƏLİLOVA
