Ali Baş Komandan, Prezident İlham Əliyevin rəhbərliyilə müzəffər Azərbaycan Ordusunun Ermənistan silahlı birləşmələrinin işğalı altında olan ərazilərimizin düşmən tapdağından azad edilməsi istiqamətində həyata keçirdiyi hərbi əməliyyatlara Azərbaycan xalqı birmənalı olaraq dəstək verib. Bütün məsələlərdə olduğu kimi, burada da xalq və dövlət birliyi özünü ən yüksək formada ifadə edib.
Prezident İlham Əliyev BBC-yə müsahibəsində bildirib ki, yaxın qohumlarını, oğullarını, qardaşlarını itirən insanlar bizdən dayanmamağı xahiş edirlər. “Təsəvvürünüzə gətirə bilərsiniz? Hər gün mən minlərlə məktub alıram, minlərlə məktub. O məktubların heç birində mən “dayanın” sözünü görməmişəm. Onlar deyirlər, mən oğlumu itirmişəm, qardaşımı itirmişəm, həyat yoldaşımı itirmişəm, xahiş edirik, sona kimi gedin. Çünki bizim xalqımız bu vəziyyətdə, demək olar ki, 30 il yaşayıb” - deyə ölkə başçısı müsahibəsində vurğulayıb.
“...bütün dünyaya xalqımızla dövlətimiz arasında qırılmaz birlik, həmrəylik olduğunu bir daha çatdırdı”
“Səs” qəzeti və eyniadlı informasiya agentliyinin rəhbəri Bəhruz Quliyev “Bakı-Xəbər”ə şərhində qeyd etdi ki, Prezident İlham Əliyevin yürütdüyü daxili və xarici siyasətin mayasını xalqımızın arzu və istəklərinin təşkil etdiyi şübhəsizdir. “İlk növbədə, Azərbaycan cəbhədə həyata keçirilən döyüş əməliyyatlarında qalib oldu. Azərbaycan döyüş cəbhəsində qalib olmasaydı, öz haqlı-ədalətli mübarizəsində hərbi gücünü ortaya qoyub müharibədən qalib kimi ayrılmasaydı, heç də bu qəbul olunmuş bəyanat Azərbaycanın istəyinə uyğun olmayacaqdı. Yəni ki, kimsə müharibəni dayandırmağa, atəşkəsə nail olmağa çalışacaqdı. Bilirsiniz ki, 45 gün müharibə getdi. Bu günlər ərzində cənab Prezidentin özü də etiraf etdi ki, bəzi ölkələr müharibəni dayandırmağımız və digər ərazilərimizi işğaldan azad etməməyimiz üçün bizə təzyiqlər ediblər. Amma cənab Prezident bunların heç birinə baxmadı. Prezident noyabrın 8-də Şəhidlər Xiyabanından xalqa müraciətində də dedi ki, elə bir qüvvə yoxdur bizi haqq mübarizəmizdən dayandırsın. Çünki bu, xalqın iradəsi, istəyi ilə baş verən prosesdir və xalqın dövlətlə həmrəyliyidir. Xalqın və dövlətin mövqeyi budur ki, sona qədər gedib torpaqlarımızı işğaldan azad etməliyik. Ən əsası odur ki, Prezident xalqın dediyini etdi, şəhid ailələrinin, yaxın qohumlarını, övladlarını itirən insanlarımızın istəyini həyata keçirdi və irəli getdi, torpaqlarımızın çox böyük hissəsini qarış-qarış düşməndən azad edərək, Ali Baş Komandan olaraq qələbəni təmin etdi. Prezident düşmən tapdağında olan ərazilərimizin işğaldan azad edilməsi prosesinə xalqın ciddi dəstək verdiyini BBC-yə də söyləməklə, bütün dünyaya xalqımızla dövlətimiz arasında qırılmaz birlik, həmrəylik olduğunu bir daha çatdırdı. Xalqımızın ən böyük arzusu torpaqlarımızın işğaldan azad edilməsi idi ki, onu da cənab Prezidentin rəhbərliyilə müzəffər ordumuz gerçəkləşdirib. Əsas odur ki, biz böyük qələbə qazanmışıq və bu müharibə bizim xeyrimizə bitdi”.
B.Quliyev bildirdi ki, qəbul edilən məlum bəyanata bütün bəndlər Azərbaycanın xeyrinədir, bu sənəd dövlətimizin istəyinə uyğun hazırlanıb. “Buradan da görünür ki, bu, birbaşa xalqın istəyini ifadə edir. Fikir verin, burada nə ermənilərə status verilməsindən, nə də Dağlıq Qarabağa muxtariyyət verilməsindən söhbət gedir. Bu gün Azərbaycanda yüzlərlə erməni və digər xalqların nümayəndələri yaşayır. Azərbaycan multikultural ölkədir. Ölkəmizdə etnik və dini zəmində heç bir problem yaşanmır. Ermənilər də bizim vətəndaşlarımız kimi Azərbaycan qanunları çərçivəsində o torpaqlarda yaşayacaqlar, onlara bu hüquq verilir. Sonra burada kimsə yaşayacaq-yaşamayacaq, bu, başqa məsələdir. Amma fakt budur ki, artıq Ermənistan işğal etdiyi ərazilərdən öz qoşunlarını çıxaracaq və bu, konkret qrafik əasında baş verəcək. Yəni artıq Prezidentin Ermənistandan tələb etdiyi qrafik bizə təqdim edildi, Azərbaycan öz istəyinə nail oldu” - deyə B.Quliyev bildirdi.
İradə SARIYEVA
