Məlum olduğu kimi, Türkiyə və Rusiya arasında sülhməramlıların fəaliyyəti və monitorinqi ilə bağlı sazişin imzalanması gözlənir. “Trend”in məlumatına görə, bu barədə sosial şəbəkələrdə məlumat yayılıb.
“Resurs” Analitik İnformasiya Mərkəzinin rəhbəri, politoloq Rasim Quliyev bizimlə söhbətində bildirdi ki, Rusiya Federasiyanın Prezidenti Vladimir Putinin, Ermənistanın Baş naziri Nikol Paşinyanın iştirakı ilə Azərbaycan Prezidenti İlham Əliyevin tələbləri nəzərə alınmaqla bəyanat imzalanıb. “O bəyantda müxtəlif bəndlər var və burada öhdəliklər əks olunub. Bu bəyanat ümumi xəritədir, tezislərdir. Söz yox ki, bunlar hamısı qarşılıqlı şəkildə daha detallı formada müqavilələrlə tənzimlənəcək. Orada hər şey dəqiq göstərilməklə ifadə olunmalıdır. Artıq sülhməramlı missiyanın tərkibi razılaşdırılıb. Cənab Prezidentin qeyd etdiyi kimi, bu artıq rəsmidir. Əlbəttə, Türkiyənin Rusiya ilə apardığı bu prosesə qədərki danışıqların da məntiqi nəticəsi odur ki, Azərbaycanın və Ermənistanın razılığı ilə sülhyaratma qüvvələrinin tərkibi razılaşdırılıb. Türkiyə və Rusiya arasında sülhməramlıların fəaliyyəti və monitorinqi ilə əlaqədar sazişin imzalanması noyabrın 10-11-də baş tuta bilər. Bütövlükdə, Türkiyə və Rusiya arasında bağlanacaq bu sazişin mühüm əhəmiyyəti var. Saziş imzalanma mərhələsindədir. Əsas odur, bəyanatda göstərilir ki, Ermənistan silahlı birləşmələri Azərbaycan ərazilərini tərk etdikdə ora sülhməramlı qüvvələr yerləşdiriləcək. Yəni bu proses tədricən baş verəcək. Dekabrın 1-nə qədər vaxt qoyulub ki, Ermənistanın bütün silahlı birləşmələri Azərbaycan torpaqlarını tərk etsin və yalnız Laçın dəhlizi vasitəsilə Dağlıq Qarbağın hansı hissəsində ki, ermənilər yaşayacaqlar, onların Ermənistanla əlaqələrinin təhlükəsiz şəkildə təmin olunmasını sülhməramlı qüvvələr yerinə yetirəcək. Eyni zamanda, Azərbaycan tərəfi BMT-nin Qaçqınlar üzrə ali komissarlığının iştirakı ilə həm orada yaşayan ermənilərin Ermənistandan qayıdıb yaşaması, həm də azərbaycanlıların işğaldan azad edilən torpaqlarımıza köçürülməsi prosesi ilə məşğul olacaq. Bu da vaxt aparan prosesdir”.
R.Quliyev qeyd etdi ki, əldə olunan razılığa görə, dekabın 1-nə qədər Ermənistan silahlı birləşmələrinin bizim ərazilərdən çıxarılması, iki ölkə arasında gələcəkdə baş verə biləcək hər hansı münaqişənin, müharibənin qarşısının alınması, onun növbəti dalğasının başlamaması üçün Türkiyə və Rusiya tərəfindən sülhyaratma qüvvələrinin nəzarət mexanizmi təmin olunmalıdır. “Əsas məsələ budur. Digər məsələlər isə mərhələ-mərhələ həyata keçiriləcək. Hələ qarşıda çox böyük vəzifələr durur. Dediyimiz kimi, Ermənistanın silahlı birləşmələrinin Azərbaycan ərazilərindən çıxarılması hələ ilkin mərhələdir. Bu yalnız bir mərhələdir. Bu hansı ki, prezidentlərin bəyanatlarında qəbul olunub və onlar artıq bunu imzalayıblar. Bundan sonra artıq növbəti mərhələlər başlayacaq. Qənaətimə görə, hətta bir neçə başqa ölkənin iştirakı ilə əlavə bir müqavilə də imzalanmalıdır. Ona sülh müqaviləsi də demək olar, kapitulyasiya da. Söz yox, Azərbaycan beynəlxalq təşkilatların qarşında ikinci bir məsələni qoymalıdır. Ermənistan həm hərbi cinayətlərə görə cavab verməli, həm də iqtisadi cinayətlərə görə təzminat ödəməlidir. Bax, bu məsələ artıq Azərbaycan tərəfindən ikinci bir mərhələdir, bu da beynəlxalq təşkilatlar qarşısında qaldırılacaq” - deyə R.Quliyev əlavə etdi.
İradə SARIYEVA
