Artıq Ermənistan cəmiyyətində də Azərbaycana uduzduqları barədə fikirlər açıq formada deyilir. Ermənistanın “Adekvat” hərəkatının təsisçisi Konstantin Ter-Nakalyan erməni xalqına müraciət edərək qeyd edib ki, erməni cəmiyyəti boş ümidlərə qapılmasın. Ermənistan ordusu Azərbaycan Ordusu qarşısında dayana bilməz.
Ermənistan yorucu müharibə ssenarisindədir: “Bunun əbədi davam edəcəyinə dair boş ümidlərə qapılmayın. Azərbaycanın pulunun və resurslarının bizimkindən daha tez tükənəcəyinə ümid etmək lazım deyil. Bir vacib həqiqəti anlamalıyıq ki, Rusiya Qarabağı bizim üçün qorumayacaq və itirdiyimiz əraziləri nəzarətimizə qaytarmayacaq, o, yalnız Ermənistan Respublikasını xilas edə bilər”.
Cəbhə xəttindəki vəziyyətə toxunan erməni hərəkatının qurucusu Ermənistanın, demək olar ki, bütün istiqamətlərdə “ağrılı” geriçəkilmə yaşadığını vurğulayıb: “Hərbi texnika və xüsusi personal sahəsində Ermənistanın ciddi itkiləri var. Azərbaycan Ordusunun ehtiyatları tükənməzdir, bizim ordumuz isə artıq taqətdən düşüb”.
Göründüyü kimi, Ermənistanda döyüşlərə praqmatk mövqedən yanaşanlar məsələnin ciddiliyini anlayır və məğlubiyyətin qaçılmaz olduğunun fərqindədirlər. O üzdən, indidən həyəcan təbili çalırlar.
“Ermənistanın Azərbaycanla müqayisədə resursları çox məhduddur”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun fikrincə, Ermənistan rəhbərliyi bütün bunlardan nəticə çıxarmasa, çox ciddi itkilərlə üzləşəcək: “Rəşadətli ordumuz, demək olar, hər gün tarix yazır. Yüksək peşəkarlıq, məharət, şücaət, qəhrəmanlıq, fədakarlıq nümayiş etdirən ordumuz bir-bir yaşayış məntəqələrini işğaldan azad edir. Qazandığımız qələbələr, şəhər və kəndlərimizin azğın düşməndən təmizlənməsi, düşmənin saysız -hesabsız itki verməsi qarşı tərəfi sarsıdır. Bu həm də vətəndaşlarımızın torpaqlarımızın azadlığı üçün hər bir çətinliyə dözməyə qadir olduğunu sübut edir. Hazırda Azərbaycan Ordusu döyüş meydanında tam üstünlüyə malikdir. Strateji məntəqə və yüksəklikləri ələ keçirən ordumuz Ermənistanın hərbi-texniki potensialını böyük dərəcədə sıradan çıxara bilib. Ötən günlər ərzində məhv edilən və qənimət kimi götürülmüş texnikanın dəyəri təqribən 2 milyard dollardan çoxdur. Cəbhədə ardıcıl məğlubiyyət iqtisadi durumun ağır olduğu və əhalinin ciddi sosial problemlər yaşadığı Ermənistanda siyasi-iqtisadi böhranı daha da dərinləşdirib. Ölkə daxilində hakimiyyətə qarşı etirazlar artır. Ermənistan əhalisi kriminal rejimin başçılarını məsuliyyətə cəlb etməyin zamanını gözləyir. Belə bir şəraitdə məsələyə ciddi yanaşanlar Ermənistanın məğlubiyyət astanasında olmasının fərqindədirlər. Çünki Ermənistanın Azərbaycanla müqayisədə resursları çox məhduddur. Bunu görməmək üçün gərək kor olasan. Görünən odur ki, Paşinyan kordur”.
Partiya funksioneri hesab edir ki, müharibənin Ermənistan üçün nəticəsi çox ağır olacaq.
Vidadi ORDAHALLI
