İşğalçı Ermənistanda siyasi böhran get-gedə dərinləşir. Dərin xaos və böhran içində çabalayan Ermənistandakı ağır durum bütün istiqamətlərdə özünü göstərir. İqtisadi, siyasi, demoqrafik, hərbi, mənəvi-psixoloji cəhətdən ağır vəziyyətdə olan işğalçı ölkədə sosial etirazlar geniş miqyas alıb.
Bütün bunlar Paşinyan hökumətinin yürütdüyü işğalçılıq siyasəti nəticəsindədir. Ekspertlərin sözlərinə görə, vəziyyət o həddə çatıb ki, işğalçı ölkənin özünün dövlətçiliyi təhlükə altına düşüb. Yəni Ermənistandakı ağır sosial-iqtisadi, siyasi, hərbi, mənəvi-psixoloji böhran Ermənistanı tək Qarabağı yox, həm də öz dövlətçiliyini itirmək təhlükəsi ilə üzləşdirib.
Ekspertlər hesab edirlər ki, Ermənistanın öz dövlətçiliyini itirməsi artıq reallaşmaq üzrədir.
“Reallıq bundan ibarətdir ki, düşmən ölkədə yaşanan hərtərəfli dərin böhran, xaos Ermənistanı dağılmaq təhlükəsi ilə üz-üzə qoyub”
“Səs” qəzeti və eyniadlı informasiya agentliyinin rəhbəri Bəhruz Quliyev “Bakı-Xəbər”ə şərhində bildirdi ki, Ermənistan dövləti həqiqətən də dağılmaq üzrədir. “Paşinyanın yürütdüyü daxili və xarici siyasət Ermənistanın məhvini zəruriləşdirib, bu ölkə məhv olmaq ərəfəsindədir. Ermənistan bir dövlət kimi “Sorosun uşaqları” olan Paşinyan və onun komandası hakimiyyəti zəbt etdiyi ilk vaxtlardan dağılmağa doğru getməyə başlayıb. Düzdür, Paşinyandan əvvəl də Ermənistan ağır böhran içində idi, amma onun hakimiyyətə gəlməsi bu böhranı daha da dərinləşdirdi, qarşısıalınmaz bir vəziyyətə gətirib çıxardı. Reallıq bundan ibarətdir ki, düşmən ölkədə yaşanan hərtərəfli dərin böhran, xaos Ermənistanı dağılmaq təhlükəsi ilə üz-üzə qoyub. Bu ölkədə dağılma prosesi yaşanır. Bunun da başlıca səbəblərindən biri Paşinyanın işğalçılıq siyasətindən əl çəkməməsi, eyni zamanda da xarici və daxili siyasətdəki naşılığıdır. Paşinyan öz səriştəsiz, naşı davranışları ilə regionda olan dövlətlərlə də münasibətlərə nöqtə qoyub.
30 ilə yaxın davam edən Ermənistan-Azərbaycan Dağlıq Qarabağ münaqişəsinin danışıqlar prosesilə nizamlanacağına müəyyən qədər ümid var idi. Müharibə başlayana qədər Ermənistana status-kvonun saxlanması sərf edirdi. Status-kvonun saxlanmasına Ermənistan özü, onun xarici havadarları, ermənipərəst beynəlxalq təşkilatlar cəhdlər göstərirdilər, buna müəyyən qədər nail olmuşdular. Bunun nəticəsində də Ermənistanın daxilində sosial-iqtisadi vəziyyət ağırlaşdı, siyasi böhran dərinləşdi. Bunun sonu isə müharibə ilə nəticələndi. Bütün bu baş verənlərin günahkarı Paşinyandır, hər şeyin məsuliyyəti onun rəhbərlik etdiyi hakimiyyətin üzərindədir. Paşinyan regional münasibətləri korladı, regionda qeyri-standart vəziyyətin yaranmasına gətirib çıxaran addımlar atdı. Digər tərəfdən də onun bu addımları Ermənistanın bir dövlət kimi xəritədən silinməsinə səbəb olur. İllərdir torpaqlarımızı işğal altında saxlayan dövlətdə belə bir mənzərə yaşanır. Təəssüf edirəm ki, Qafqazda Ermənistan deyilən bir işğalçı ölkə mövcuddur”.
B.Quliyev qeyd etdi ki, Ermənistanın tutduğu işğalçılıq mövqeyi onu bütün regional layihələrdən təcrid edib və düşmən ölkənin ciddi sosial-iqtisadi, siyasi böhrana düşməsinə gətirib çıxarıb. B.Quliyevin sözlərinə görə, Azərbaycan Ordusunun Dağlıq Qarabağda və digər işğal edilmiş ərazilərimizdə hərbi əməliyyatlara başlaması, torpaqlarımızı işğaldan azad etməsi prosesi Ermənistanı daha ağır duruma, çıxılmaz vəziyyətə salıb. “Paşinyan hökuməti iflas durumdadır. Son bir ayda cəbhədə müharibənin gedişatı onu göstərdi ki, Ermənistan çox acınacaqlı bir durumdadır, o, çox sarsıdıcı məğlubiyyətə uğradılıb. Ermənistan, bütün mənalarda, Azərbaycandan dəfələrlə zəifdir, bunu özləri də etiraf edirlər. Ermənistanın hərbi-siyasi hakimiyyəti Azərbaycan Ordusunun gücü qarşısında acizdir və ordumuz qəsbkarın işğal etdiyi torpaqlarımızı ardıcıl olaraq azad edir. Bu gün Ermənistan qarşısında güclü bir dəmir əl, yumruq görür. Ölkə daxilində də onu eyni dərəcədə sıxırlar. Paşinyan hakimiyyəti zəbt etdikdən sonra müharibənin başlamasına rəvac verən bəyanatlar verib, çıxışlar edib. Bunun da məsuliyyəti Paşinyan və onun hakimiyyətinin üzərindədir. Ümumiyyətlə, regionda qan tökülməsinin baiskarı onlardır. Paşinyanın geriyə yolu yoxdur. Bu gün o təslim olsa belə, erməni xalqı onu ya parçalayacaq, ya tikə-tikə doğrayacaq, ya da çarmıxa çəkəcək, İrəvanın mərkəzi meydanında asacaqlar. Paşinyan erməni xalqını qırğına verir, eyni zamanda, onun davranışları nəticəsində Ermənistanda yaranan böhran insanları ondan ciddi şəkildə narazı salıb. Məsələyə hansı tərəfdən baxsaq, Ermənistan bu gün düşdüyü ağır vəziyyətin günahkarı kimi Paşinyanı görür. Hesab edirəm ki, Ermənistanın xilas yolu yoxdur”.
B.Quliyevin sözlərinə görə, Paşinyan guya Ermənistanda vəziyyəti düzəltmək üçün müxtəlif vəzifələrə yeni təyinatlar edib, köhnə məmurları isə işdən kənarlaşdırıb. Bunun çıxış yolu olmadığını deyən B.Quliyevin fikrincə, bu gün Ermənistan elə bir durumdadır ki, onu hansısa bir məmur yerdəyişməsi ilə həll etmək olmaz. “Paşinyanın öz komandasında dəyişiklik etməsi onu göstərir ki, o, Ermənistanı bu böhrandan çıxarmaq yolunu kadrları dəyişməkdə görür. Amma bu da ona heç nə verməyəcək. Paşinyanın yürütdüyü daxili və xarici siyasət, eləcə də onun işğalçılıqdan əl çəkməməsi Ermənistanın da bir dövlət kimi dağılmasına rəvac verib. Dağlıq Qarabağ Azərbaycanın tarixi torpağıdır və müzəffər ordumuz ərazilərimizi işğaldan azad edir” - deyə B.Quliyev vurğuladı.
İradə SARIYEVA
