“ABŞ-ın radikal, şovinist erməni lobbi qruplarının Fransada TF1 heyətinə qarşı olduğu kimi, "New York Times"ə qarşı da hücumlarını və təhdidlərini qətiyyətlə pisləyirik. İfadə azadlığını, azad medianı boğmağa çalışırlar. Həmin reportajın bəzi hissələri ilə biz də razılaşmaya bilərik, lakin işlərinə hörmət edirik”. Bunu Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Twitter” səhifəsində yazıb.
Məlum olduğu kimi, Birləşmiş Ştatların bu nüfuzlu nəşri Ermənistanın Bərdə terrorunu işıqlandırıb. Ermənilər Amerikanın “New York Times” qəzetinin redaksiyasının yaxınlığında etiraz aksiyası keçiriblər. Etirazçılar redaksiyaya erməni bayraqları ilə gəlib və "Qarabağ münaqişəsinin düzgün işıqlandırılmasını" tələb ediblər. Etirazçıların narazılığına “New York Times” qəzetinin İstanbul müxbiri Carlotta Gall-ın verdiyi xəbərlər səbəb olub. Məqalədə ermənilərin Azərbaycanın mülki əhalisinə raket hücumları nəticəsində onlarla insanın ölməsi və xəsarət almasından, evlərə, obyektlərə dəyən ziyandan bəhs olunur. Qəzetdə Azərbaycan Prezidentinin köməkçisi Hikmət Hacıyevin danışıqlar prosesini sonlandıran əsas amilin Ermənistanın Baş naziri Nikol Paşinyanın “Qarabağ Ermənistandır” sözləri olduğunu qeyd etməsi sitat gətirilir.
Onu da qeyd edək ki, daha əvvəl erməni lobbisi Fransanın TF1 kanalının müxbiri Liseron Budulu təhdid edib. Xatırladaq ki, o, cəbhə bölgəsindən hazırladığı reportajda ermənilərin mülki əhaliyə hücumlarını lentə alıb.
Görün erməni həyasızlığı, qudurğanlığı nə həddə gəlib çatıb ki, onlar heç bir çərçivə gözləmədən nüfuzlu media orqanlarını obyektiv məlumat yaymalarına görə terrorla təhdid edirlər. Dünyanın gözü qarşısında onları hədələməkdən belə çəkinmirlər. O baxımdan ermənilərin bu terrorçu xarakterli davranışlarını ekspertlər necə dəyərləndirirlər?
“Bu isə Qərbin erməni həyasızlığına göz yummasının göstəricisidir”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, bütün bunlar erməni xislətinin əyani göstəricisidir: “Əvvəla ermənilər dünya üçün ləkə olmaqla yanaşı, həm də təhdid mənbəyidirlər. Çünki ermənilər qədər terrora, cinayətə meylli ikinci millət yoxdur. Həyasızlığın dərəcəsinə bax ki, ermənilər nüfuzlu media orqanlarını hədələməkdən belə çəkinmirlər. Onların bu hərəkəti həm də azad sözə basqıdır. Hansısa nüfuzlu media orqanı münaqişə ilə bağlı obyektiv mövqe sərgiləyirsə, o dəqiqə erməni lobbisinin təhdidi ilə üzləşir. Bundan əvvəl, məlum olduğu kimi, Fransanın TF1 kanalının müxbiri hazırladığı reportaja görə ermənilərin təhdidinə məruz qaldı. Hətta vəziyyət o yerə gəlib çatdı ki, telekanal sözügedən reportajı rəsmi internet səhifəsindən çıxardı. Çox təəssüflər olsun ki, Fransa ictimaiyyəti, müvafiq qurumlar ermənilərin bu həyasızlığına etiraz etmədilər. Belədə hər addımbaşı demokratiya və söz azadlığından danışırlar. Bütün bu biganəliyin nəticəsidir ki, ermənilər indi də “New York Times qəzetini hədələyirlər. Vaxtında buna etiraz edilsəydi, onlar belə cəsarətlənməzdilər. Bu isə Qərbin erməni həyasızlığına göz yummasının göstəricisidir”.
V.Rəhimzadənin fikrincə, nə qədər ki, dünya buna göz yumur, ermənilər bu kimi qanunsuz fəaliyyətlərdən əl çəkməyəcəklər.
Vidadi ORDAHALLI
