03/12/2020 08:42
728 x 90

Paşinyan təqib etdiyi sabiq prezidentlərin ətəyindən tutur - Köçəryan və Petrosyanı Moskvaya göndərir

Yeganə Hacıyeva: “Bu səfər Dağlıq Qarabağda müharibənin gedişatına təsir edə bilməyəcək, boş bir səfər olaraq yadda qalacaq”

img

Ermənistanın Baş naziri Nikol Paşinyan Ermənistanın keçmiş prezidentləri Levon Ter-Petrosyan və Robert Köçəryanın Dağlıq Qarabağdakı vəziyyətlə bağlı danışıqlar aparmaq üçün Moskvaya səfərinə icazə verib. Bunu jurnalistlərə Nikol Paşinyanın mətbuat katibi Mane Gevorkyan deyib.

Onun sözlərinə görə, əvvəllər Qarabağ separatçılarının keçmiş liderləri Arkadi Qukasyan və Bako Saakyan Nikol Paşinyana müraciət edərək Levon Ter-Petrosyan və Robert Köçəryanın Rusiya elitasının nümayəndələri ilə görüşmək və mövcud vəziyyətin həll yollarını müzakirə etmək üçün Moskvaya getmək istədiklərini söyləyiblər: "Baş nazir Nikol Paşinyan bu təşəbbüs üçün heç bir maneə ola bilməyəcəyini vurğulayaraq bu təkliflə razılaşıb".

Son anda məlum olub ki, Ermənistanın sabiq prezidenti Robert Köçəryan COVID-19 virusuna yoluxduğu səbəbindən Moskvaya gedə bilməyib.

Maraqlıdır, Paşinyan hətta bu yaxınlara kimi özünün də ciddi təqib etdiyi sabiq prezidentləri Moskvaya göndərməklə hansı məqsədi güdür?

Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistanın Baş naziri Nikol Paşinyanın son günləridir və onun sonuna nə Rusiya, nə də kənar təsirlər deyil, öz səriştəsizliyi, təcrübəsizliyi, adi “Facebook” fəalı kimi küçədən birbaşa dövlət idarəçiliyinə gəlmək ambisiyası səbəb oldu: “Ermənistanın keçmiş prezidentləri Levon Ter-Petrosyan və Robert Köçəryanın Dağlıq Qarabağdakı vəziyyətlə bağlı danışıqlar aparmaq üçün Moskvaya səfəri haqqında isə onu deyə bilərəm ki, bu səfər 10 gün öncə üç eks-prezident - Levon Ter-Petrosyan, Robert Köçəryan və Serj Sarkisyan və Dağlıq Qarabağdakı qondarma rejimin keçmiş liderləri Arkadi Qukasyan, Bako Saakyan tərəfindən İrəvanda keçirilən görüşdə razılaşdırılmışdı. Bu 10 gün ərzində Nikol Paşinyan eks-prezidentlərin Moskva səfərinə icazə verməyib.

Bu gün isə Nikol Paşinyanın mətbuat katibi Baş nazirin bu səfərlə razılaşdığını və eks-prezidentlərin Moskvaya səfərə hazırlaşdıqlarını bildirdi.

“Burada məqsəd nə ola bilər” sualına gəlsək, öncə bir məqamı qeyd etmək istəyirəm. N.Paşinyanın səfərə icazə verməsi ilə paralel eks-prezidentlərdən biri, Rusiya Prezidentinin şəxsi dostu Robert Köçəryanın koronavirus yoluxması ucbatından Moskvaya getməyəcəyi məlum oldu.

Bu məsələ ilə bağlı mənim qəti əminliyim budur ki, Köçəryanın koronavirusa yoluxması məlumatı uydurmadır. Məsələ ondadır ki, Köçəryan hələ keçən ay Moskvada səfərdə oldu və Dağlıq Qarabağla bağlı Rusiya elitası, Rusiyadakı erməni lobbisi ilə görüşlər keçirsə də, bu görüşlər heç nə ilə nəticələnmədi.

Bütün cəhdlərinə baxmayaraq, şəxsi dostu Vladimir Putinlə görüşə bilmədi və ondan sonra keçən bir ay müddətində Köçəryanın siyasi proseslərdə çevikliyi və cəldliyi bir az azaldı.

“Bu nə üçün belədir” sualına gəlsək, hər nə qədər də Ermənistan Rusiyanın forpostu olsa da, Putin Ermənistanda hakimiyyət dəyişikliyində adının hallanmasında maraqlı deyil. Bu, Putin üçün Rusiyanın Ermənistandakı proseslərə müdaxiləsi kimi bir görüntü formalaşdırır ki, sırtıq erməni hakimiyyəti bu kartdan bolluca istifadə edə bilər. İddialar irəli sürə bilər və s.

Bu, həmçinin, Köçəryanın hakimiyyətə gətirilməsinin Putinin adı ilə bağlanması görüntüsü verə bilər ki, Köçəryan artıq bir müddətdir bu kartla oynayır, amma Putin bunda maraqı görünmür.

O üzdən, Köçəryan “Moskvaya gəlmə!” mesajının fonunda, cəmiyyətə koronavirusa yoluxmağı üzərindən getmədi görüntüsünü verir.

Burada bir haşiyəyə çıxım ki, Paşinyanın son günləri olmasını anlayan erməni hakimiyyətdaxili qrupların hamısı Rusiyaya can atır. Buna misal olaraq Tsarukyan və onun siyasi fraksiyasını göstərə bilərik: Eynilə onlar da Moskvaya səfər ediblər.

Moskva bu dönəmdə Dağlıq Qarabağda hərbi əməliyyatlara qarşımayacaq, çünki bu onun üçün Azərbaycanı və Türkiyəni itirmək anlamına gəlir.

Bu, Rusiya üçün Yaxın Şərqdə ən mühüm, güvənli və tək tərəfdaşı ilə böhran yaşamasına səbəb ola bilər.

Eyni zamanda, bu, Rusiya üçün Azərbaycanı tam itirmək və deməli, Cənubi Qafqazı tamamilə itirmək anlamına gəlir.

Çünki Cənubi Qafqazın bütün strateji enerji və kommunikasiya xətləri Azərbaycandan keçir.

Rusiyanın Dağlıq Qarabağda hərbi əməliyyatlara müdaxiləsi olacağı halda qarşısında heç arzulamadığı Azərbaycanda NATO bazaları perspektivi ilə üzləşəcək”. 

Politoloq hesab edir ki, Moskvaya tək səfər edəcəyi halda,  Ermənistanın keçmiş prezidenti Levon Ter-Petrosyan Rusiya elitasında ənənəvi erməni dairələrindən kənar heç bir mühüm görüş keçirə bilməyəcək. Ekspertin sözlərinə görə, bu səfər Dağlıq Qarabağda müharibənin gedişatına təsir edə bilməyəcək,  boş bir səfər olaraq yadda qalacaq.

Məhəmmədəli QƏRİBLİ

Son xəbərlər