05/07/2020 09:07
728 x 90

Koronavirus Ermənistanı həm daxildən, həm də xaricdən çökdürür – Paşinyanın “yoluxma oyunu” isə onun ölkəsindəki olan-qalan nüfuzunu da yerlə bir etdi

img

Bu gün Cənubi Qafqaz ölkələri arasında koronavirusla bağlı ən fəlakətli vəziyyət Ermənistanda müşahidə edilir. Son məlumatlara əsasən, Ermənistanda koronavirusa yoluxanların sayı 11 minə, bu virusdan həyatını itirənlərin sayı isə 200-ə yaxınlaşır. Amma fəlakətin miqyasının daha böyük olması gözlənilir. Bunu hətta Ermənistanın baş naziri Nikol Paşinyan özü belə etiraf edir.

Paşinyan bildirir ki, Ermənistanda koronavirusla bağlı vəziyyət fəlakət həddindədir. O, son günlər Ermənistanda koronavirusa yoluxma və pandemiyadan ölüm hallarının çoxalmasından narahatlığını vurğulayaraq deyib: “Bu fəlakətdir”. Amma məsələnin həm də maraqlı tərəflərindən biri odur ki, indiki vəziyyətdə koronavirus Paşinyanın taxtını laxladan əsas faktorlardan birinə çevrilməkdədir. Müxalifətdə olan Respublika Partiyasının mətbuat katibi Eduard Şarmazanov bu xüsusda bildirir:“Gündən-günə ikiqat artan ölümlərin və sağlamlıq xaosunun cavabdehi Nikol Paşinyandır. Paşinyan və onun komandası hər şey etdi ki, ölkəmizdə sağlamlıq, humanitar və iqtisadi xaos baş versin. Vaxtilə mən koronavirus özünün pik həddinə çatmayana qədər məhdudiyyətlərin aradan qaldırılmasının lazım olmadığını söyləyəndə cənab misilsiz həmişəki kimi “eşşək qovurdu” və cinayətkar əzmlə məhdudiyyətləri aradan qaldırırdı. Nəticədə gündəlik olaraq yüzlərlə yoluxanlarımız və ölənlərimiz olur. Təəssüf ki, Ermənistan hökuməti bu müharibədə xalqı tək qoydu”.

“Parlaq Ermənistan” partiyasından olan deputat Mane Tandilyan isə qeyd edir: “Ermənistan xalqı hökumətin onu qoruya bilmədiyini görür. Vətəndaşların uzun müddətdir heç bir qaydaya əməl etməmələri də səhiyyə nazirinə etimadsızlığını göstərir”. Onun sözlərinə görə, hökumət koronavirusla mübarizədə uğursuz oldu, çünki tədbirlər vaxtında görülməli idi:"Xalq arasında koronavirusa qarşı qeyri-ciddi münasibət yayılıb. Ümid edirəm ki, vətəndaşlarımız bir vaxtlar virusun yayılmasına istehza ilə yanaşan və indi çaxnaşma içində olan hökumətdən daha ehtiyatlı olacaqlar". Tandilyan, həmçinin deyib ki, Nazirlər Kabineti tədricən koronavirusla mübarizənin məsuliyyətini vətəndaşların çiyinlərinə qoyur:“İnsanlar fövqəladə vəziyyətdə hökumətin onu qoruya bilmədiyini və tədricən bu məsuliyyəti üzərindən atdığını görür. Təkəbbürü bir kənara qoyub, bu vəziyyətdən necə çıxacağımızı bilən xarici mütəxəssisləri cəlb etməliyik".

Ermənistanın “Milli Gündəm” partiyasının həmtəsisçisi Avetik Çalabyan da vəziyyətin qəliz olduğunu bildirir:“Ermənistanda virusla bağlı vəziyyət dəhşətli istiqamətdə inkişaf edir. Ötən həftənin sonunda Ermənistan baş naziri Nikol Paşinyan vəziyyətin nəzarətdən çıxdığını və İtaliya ssenarisinin özünəməxsus üslubda yaxınlaşdığını qəbul edib. Ermənistanda koronavirusdan ölüm dünyada ən yüksəklərdəndir, bu, pandemiya əleyhinə mübarizənin də uğursuz olduğunu göstərir”. Yaranmış vəziyyətdə baş nazirin vəziyyəti daha pis məcraya yönəltdiyi üçün istefasını tələb edənlərin sayı artır. Amma koronavirus təkcə Ermənistanın daxili həyatına zərbə vurmayıb. Erməni mediası xarici siyasət sahəsində də acınacaqlı durum yarandığını bildirir. Xüsusən də Rusiya ilə bağlı Paşinyanın koronavirus gedişləri artıq mənfi effekt doğurur. Rusiyanın “Moskovskiy komsomolets” qəzeti yazır ki, Paşinyan koronavirusa yoluxduğunu bildirsə də, burada şübhəli məqamlar var:“Ermənistanın 45 yaşlı baş naziri Nikol Paşinyan öz doğum günündə bildirib ki, onda və ailə üzvlərində koronavirus aşkar edilib. Paşinyan və ailə üzvlərinin hər hansı simptomları yoxdur. Lakin özlərini təcrid etməyə qərar veriblər. Elə görünürdü ki, Paşinyanın xəstəliyinə görə təəssüflənməli idilər. Ancaq Ermənistanda çoxları düşünür ki, hökumət rəhbəri hiyləgərlik edir”. Qəzetin yazdığına görə, Paşinyan epidemiya əleyhinə təhlükəsizliyin bütün qaydalarına riayət etdiyini iddia edir, lakin bildirir ki, bunlar onu yoluxmaqdan xilas etməyib:“Bununla belə, Paşinyan dövləti idarə etməkdən imtina etməyə hazırlaşmır. Növbəti iki həftə ərzində o, ölkəni Sevandakı hökumət evindən idarə edəcək. Həyat yoldaşı Anna Hakobyan da tanışları və yaxınları ilə ünsiyyətlərini dayandırıb, Ermənistanda uşaqlar gününə həsr olunmuş konsertdə iştirak etməkdən imtina edib”. Qəzet bildirir ki, bununla Paşinyan miskin görkəm yaratmaq istəsə də əhali ona inanmır. Eyni zamanda daha bir məqam da Rusiaya ilə bağlıdır. “Erməni Qartalları - Birləşmiş Ermənistan” partiyasının sədri Xaçik Asryan məhz bu fonda Paşinyanın koronavirusa yoluxduğuna şübhə edir. Partiya rəhbəri baş naziri saxtakarlıqda və yalan danışmaqda ittiham edib:“Nikol Paşinyan, doğrudan da koronavirusa yoluxmusunuz, ya bir daha erməni xalqını aldadırsınız ki, xəstələnmək iddiası ilə amerikalı şeflərinin əmri ilə iyunun 24-də Moskvada keçiriləcək Böyük Vətən müharibəsində qələbənin 75 illiyinə həsr olunmuş rəsmi tədbirdə və paradda iştirak etməyəsiniz?” O, dolayı yolla Ermənistan baş nazirini Rusiya prezidenti Vladimir Putinlə üz-üzə gəlməkdən boyun qaçırmaqda ittiham edib. Partiyanın yaydığı məlumatda bildirilib ki, Nikol Paşinyan son iki ildə Ermənistanın idarəetmə sisteminə, sosial-iqtisadi və hərbi-siyasi fəaliyyətinə, xarici siyasətinə xələl gətirib, eyni zamanda dövlət səviyyəsində koronavirusa qarşı mübarizəsi tamamilə uğursuzdur:“Bundan əlavə, Ermənistanda fövqəladə vəziyyət rejimini uzadan Nikol Paşinyan özünün çökmüş və antimilli hökumətinin ömrünü uzatmağa çalışır. Hakimiyyətə qarşı mitinqləri qəsdən qadağan edərək, Ermənistan Milli Məclisində antimilli qanunların qəbul edilməsinə, habelə, Avropa Şurası tərəfindən tətbiq olunan pozğun konvensiyaların ratifikasiyasına şərait yaradır. Nikol Paşinyanın anti-dövlət, konstitusiyaya zidd qərarlarını həyata keçirən parlamentinin deputatları, şübhəsiz ki, erməni xalqı tərəfindən pislənəcək və qanunun ən sərt diqtəsi ilə cəzalandırılacaqlar”. Xaçik Asryan qeyd edir ki, Paşinyanın hərəkətlərinə Rusiyanın reaksiyası çox sərt olacaq.

Nahid SALAYEV

 

 

Son xəbərlər