Zülfiyyə Eldarqızı: “Düşünürəm ki, teatrlarımız Cocuq Mərcanlı kəndi sakinləri qarşısında vətənpərvərlik ruhunda olan tamaşalarla çıxış etməlidirlər” Xəyalə Rais: “Bütün teatrlar Cocuq Mərcanlıda vətənpərvərlik mövzusunda tamaşalar təqdim etməkdə maraqlı olmalıdırlar”
Azərbaycan Ordusunun işğaldan azad etdiyi Cəbrayıl rayonunun Cocuq Mərcanlı kəndi hər bir azərbaycanlının diqqət mərkəzində olmalıdır. Son illər Cocuq Mərcanlıda bir sıra mədəni tədbirlər keçirilir, yazıçı və şairlər, müğənnilər, ictimai xadimlər bu kəndə gedib əhali ilə görüşürlər. Cəbhə bölgəsində yerləşən Cocuq Mərcanlı kəndinin sakinləri böyük ruh yüksəkliyi, vətənpərvərlik hissi ilə öz doğma obalarında həyatlarını davam etdirirlər.
Bir sıra mədəniyyət sahələri təmsilçiləri Cocuq Mərcanlı sakinlərinin görüşünə getsə də, hələ teatrlar həmin ünvanda tamaşa ilə çıxış etməyiblər. Əlaqə saxladığımız teatrların əksəriyyətinin repertuarında vətənpərvərlik tamaşaları olsa da, onlar bu tamaşaları cocuq mərcanlılara təqdim etməyiblər.
Azərbaycan Dövlət Gənc Tamaşaçılar Teatrından aldığımız məlumata görə, hələ bu teatr sözügedən kənddə tamaşa təqdim etməyib. Azərbaycan Musiqili Teatrı və Akademik Milli Dram Teatrı da cocuq mərcanlıların qarşısında çıxış etməyiblər.
Teatrşünasların bildirdiyinə görə, teatrların əksəriyyəti vaxtilə cəbhə bölgələrində tamaşalar təqdim ediblər. Son zamanlar teatrların cəbhə bölgəsində tamaşa təqdim etməməsinin səbəblərinin müxtəlif olduğunu qeyd edən ekspertlər bildirirlər ki, Cocuq Mərcanlıda vətənpərvərlik ruhunda tamaşaların təqdim edilməsi vacib məsələdir.
Sənətşünaslıq üzrə fəlsəfə doktoru, tanınan bədii qiraətçi, aktrisa Zülfiyyə Eldarqızı “Bakı-Xəbər”ə bildirdi ki, teatrların hansı səbəbdən Cocuq Mərcanlıda tamaşa təqdim etməməsindən məlumatsızdır. Bir müddət əvvəl cocuq mərcanlılar qarşısında çıxış etdiyini deyən Z.Eldarqızının sözlərinə görə, onların tamaşalara ehtiyacı var: “Bilirsiniz ki, vaxtaşırı Cocuq Mərcanlı sakinləri üçün konsert proqramları, tədbirlər təşkil edilir. Mən özüm də o tədbirlərdə bədii qiraətçi kimi iştirak etmişəm. Onlar vətənpərvərlik mahnılarını, vətənpərvərlik şeirlərini o qədər çox sevirlər ki... Onların vətənpərvərlik tamaşalarına böyük ehtiyacları var. Dövlətimiz Cocuq Mərcanlı kəndinə çox böyük diqqət-qayğı göstərir, kənd sakinləri bu qayğıdan, sevgidən yerdən göyə qədər razıdırlar. Düşünürəm ki, teatrlarımız Cocuq Mərcanlı kəndi sakinləri qarşısında vətənpərvərlik ruhunda olan tamaşalarla çıxış etməlidirlər. Bilirsiniz, bəzən teatrın, dramaturgiyanın dediyini başqa sənət sahələri ifadə edə bilmir. Biz Cocuq Mərcanlıda olarkən insanların sənətkarlara məhəbbətinin şahidi olduq”.
Z.Eldarqızının sözlərinə görə, çağdaş Azərbaycan dramaturqları Cocuq Mərcanlı mövzusunda da əsərlər yaza bilərlər. O hesab edir ki, bununla bağlı kifayət qədər material var: “Hər bir Cocuq Mərcanlı sakini bir qəhrəmandır. Onlar onsuz da vətənpərvər və torpağına, bayrağına sadiq insanlardır. Onların həyatı, yaşamı, düşmən qarşısında mərdliklə sinə gərməsi haqda da dram əsərləri yazıla bilər”.
Teatrşünas Xəyalə Raisin sözlərinə görə, teatrların cəbhəyanı bölgələrdə tamaşa təqdim etməyə marağı çox azdır: “Bu gün teatrların əksəriyyətində tamamilə başqa bir ab-hava hökm sürür. Teatrların repertuarında vətənpərvərlik mövzusunda tamaşalar olsa da, onlar bu tamaşaları lazımi ünvanlarda təqdim etmirlər. Hesab edirəm ki, keçmiş dövrlərdəki kimi, səyyar tamaşalar da təqdim edilməlidir. Bizim teatrlar deyirlər ki, tamaşa göstərmək üçün bölgələrdə şərait olmalıdır. Bölgələrdə çox gözəl şərait yaradılıb, yüksək təmirli, bütün texniki vasitələrlə təmin edilən mədəniyyət ocaqları, mərkəzlər var. Gedib o mərkəzlərdə tamaşa təqdim edə bilərlər. Bütün teatrlar Cocuq Mərcanlıda vətənpərvərlik mövzusunda tamaşalar təqdim etməkdə maraqlı olmalıdırlar. Cocuq Mərcanlıda bu gün gözəl şərait, infrastruktur formalaşdırlıb, mədəniyyət ocaqları fəaliyyət göstərir. Yəni burada tamaşa verilməsi üçün hər cür şərait də, tamaşaçı da var. Teatrlar Cocuq Mərcanlıda tamaşa verməlidirlər. Bu insanların vətənpərvərlik ruhlu tamaşalara ehtiyacı var desəm yanılmaram”.
İradə SARIYEVA
