Qaraxan Əkbəroğlu: “Bu təşkilatı təsis etməkdə məqsədimiz dünya xalqları ədəbiyyatı arasında əlaqə, körpü yaratmaqdır”
Respublikamızdan kənarda yaşayan, yaradıcılıqla məşğul olan soydaşlarımızın ədəbiyyatımızın, mədəniyyətimizin təbliği ilə bağlı gördüyü işlər diqqət çəkir. Yaşadığı ölkənin sosial-siyasi, mədəni həyatında aktiv olan soydaşlarımız çalışırlar ki, Azərbaycanla bağlı müxtəlif işlər görsünlər, sülh və barışın tərəfdarı, tolerantlığın ünvanı olan ölkəmizi dünyada tanıtsınlar.
Avstriyanın Vyana şəhərində yaşayan və fəaliyyət göstərən, sözügedən ölkənin ictimai həyatında aktiv olan şair-yazıçı Qaraxan Əkbəroğlu mütəmadi olaraq Azərbaycan həqiqətlərinin dünyaya çatdırılması istiqamətində işlər görür. Vyanada Dünya Şairlər və Yazıçılar İttifaqı təsis edilib. Keçən ay yaradılan ədəbi qurumun sədri vəzifəsinə soydaşımız Qaraxan Əkbəroğlu seçilib.
Q.Əkbəroğlu “Facebook” üzərindən “Bakı-Xəbər”ə verdiyi açıqlamada bildirdi ki, rəhbərlik etdiyi qurum beynəlxalq səviyyəli təşkilatdır: “Avstriyada Dünya Şairlər və Yazıçılar İttifaqı təsis olundu və mən həmin quruma sədr seçildim. Bu təşkilatı yaratmaqda məqsədimiz dünya xalqları ədəbiyyatı arasında əlaqə, körpü yaratmaqdır. Müasir dünyada, bütün sahələr kimi, ədəbiyyat da inkişaf edir, yeni ədəbi dünyagörüşlər, izimlər yaranır. Ədəbiyyatları bir-birinə yaxınlaşdırmaq lazımdır. Bilirsiniz ki, Azərbaycan ədəbiyyatı çox zəngindir. Bizim ədəbiyyatımızın da bütün dünyada tanıdılmasına ciddi ehtiyac var. Düşünürəm ki, biz buna nail ola biləcəyik. Qeyd edim ki, bizim quruma ermənilər istisna olmaqla istənilən xalqın, dövlətin şair, yazıçı və jurnalistləri üzv ola bilərlər. Biz ancaq ermənilərin və cinayətkarların bu quruma üzv olmasına qarşıyıq və heç bir vaxt erməni toplumunun hər hansı bir nümayəndəsi bu quruma üzv ola bilməz. Bu mənim təşkilatın idarə heyəti qarşısında qoyduğum tələbdir. Onlar da bununla razılaşıblar. Erməni harada varsa, orada terror, məkr, yalan, hiylə var. Bunu bütün dünya xalqları, dövlətləri bilməlidirlər. Biz bu istiqamətdə də təbliğatımızı davam etdiririk”.
Bu qurumun siyasətüstü yaradıcı təşkilat olduğunu vurğulayan Q.Əkbəroğlu, bununla belə, Zori Balayanların davamçılarının bu təşkilatda təmsil olunmasının yolverilməzliyini önə çəkir. Hazırda quruma üzv olmaq üçün müxtəlif ölkələrdən müraciətlər gəldiyini deyən Q.Əkbəroğlunun sözlərinə görə, üzvlüyə sənəd verənlərin müraciəti qurumun idarə heyətində incələndikdən sonra onlar ədəbi ittifaqa üzv ola bilərlər: “Hazırda bizə 60 dövlətin şair və yazıçıları müraciət ediblər. Azərbaycandan da şair və yazıçıların bu təşkilata üzv olmasını istəyirik. Quruma Azərbaycandan 4 nəfər qəbul olunub. Bizə həm Qərb, həm də Şərq ölkələrindən müraciət edən yazarlar var. Qurumun təsis qurultayında 200 nəfər iştirak edirdi. Hazırda isə qurumun 1500 nəfərdən çox üzvü var. Bu gün fəaliyyət göstərdiyimiz ofis o qədər də böyük deyil. 20 mərtəbəli yeni ofis inşa etmək fikrindəyik. Mən bu təşkilata 4 il müddətində sədrlik edəcəyəm. Fəaliyyətim dövründə həm ədəbiyyatımızın dünya çapında tanıdılması, ədəbi əlaqələrin inkişafı sahəsində işlər görəcəyəm, həm də Xocalı soyqırımının, Qarabağ probleminin tanıdılması istiqamətində işlərimi davam etdirəcəyəm. Mən həmişə Xocalı faciəsi haqda danışıram, Zori Balayan kimilərinin uşaqlarımızın, qocalarımızın, insanlarımızın başına gətirdiyi müsibətləri qeyd edirəm. Məncə, ittifaqımızın xətti ilə bu sahədə daha çox işlər görə biləcəyik. Azərbaycan xalqı tolerant, sülhpərvər xalqdır. Mən bu amal ətrafında dünyanın işıqlı adamlarını, ziyalı və söz sahiblərini birləşdirmək niyyətindəyəm. Dünyada ədalətin ən böyük carçısı ədəbiyyatdır, sözdür. Dünya silahlanmadan, davadan, qarşıdurmadan sülhə, əminamanlığa keçid etməlidir. Ədəbiyyat həmişə bu amal uğrunda vuruşub.
Dünya Şairlər və Yazıçılar İttifaqında müxtəlif xalqların nümayəndələrinin təmsil olunduğunu vurğulayan Q.Əkbəroğlu qeyd etdi ki, ədəbi əlaqələrin qurulması istiqamətində görüləcək işlərin sırasında tərcümə mərkəzinin yaradılması, müasir tipli nəşriyyat-poliqrafiya mərkəzinin qurulması durur. O bildirdi ki, onun quruma sədr seçilməsinin əsas səbəbi ədəbiyyatda, xüsusən də poeziya sahəsində yaratdığı janrlardır. “Mənim ədəbiyyatda, poeziyada 49 janrda yaradıcılığım var. 2017-ci ildə 6 kitab yazmışam. Əsərlərim “Nobel” mükafatına təqdim edilib. Həm də elmlər doktoruyam. Bu quruma sədr seçilərkən Avstriyanın aidiyyəti qurumlarının hamısı məni dəstəklədilər. Dövlət qurumları təşkilatın fəaliyyəti üçün maliyyə yardımı ayıracaqlarını və təşkilatı vergidən azad edəcəklərini vəd ediblər. Onu da vurğulayım ki, bizə ən çox Amerika, Braziliya, Almaniya, Cexiya, Fransa və Hollandiyadan müraciətlər daxil olub. Düşünürəm ki, üzvlərimizin sayı gələcəkdə daha çox olacaq” - deyə Q.Əkbəroğlu bildirdi.
İradə SARIYEVA
