İnformasiya və İctimaiyyətlə Əlaqələr Şöbəsi: “İstanbul Beynəlxalq Kitab Sərgisi çərçivəsində Azərbaycan pavilyonunda...”
Bu gün Azərbaycanda kitab sənayesinin inkişafı ilə bağlı addımlar atılır. Dövlətin kitab çapına verdiyi dəstək, eləcə də Azərbaycan kitabının təbliği sahəsində görülən işlər milli kitabımızın tanıdılmasına xidmət edir. Ölkə daxilində kitabın təbliği üçün xeyli iş görülüb. Əsas hədəf isə Azərbaycan kitabını xarici ölkələrdə tanıtmaq, təbliğ etmək olmalıdır.
Azərbaycan kitabının xarici ölkələrdə təbliği sahəsində dövlət səviyyəsində nə kimi işlər görülür?
Mədəniyyət və Turizm Nazirliyinin İnformasiya və İctimaiyyətlə Əlaqələr Şöbəsindən “Bakı-Xəbər”ə verilən məlumata görə, Azərbaycan kitabı mütəmadi olaraq nazirliyin xətti ilə xarici ölkələrdə keçirilən sərgi-yarmarkalarda iştirak edir.
2017-ci ildə nazirliyin xəttilə Azərbaycan kitabının bir sıra beynəlxalq sərgilərdə iştirak etdiyini deyən İnformasiya və İctimaiyyətlə Əlaqələr Şöbəsinin əməkdaşları qeyd etdilər ki, 2017-ci il Mədəniyyət və Turizm Nazirliyi üçün Azərbaycan ədəbi irsinin qorunması, inkişaf etdirilməsi, gənc nəsillərə təbliği və dünyaya tanıdılması baxımından uğurlu il oldu, çoxsaylı iş görülüb: “İlk olaraq yerli yazarların son 2 ildə çap olunan əsərləri “Qızıl Kəlmə” Ədəbi Mükafatı Komissiyasının üzvləri tərəfindən qiymətləndirildi. Nazirliyin təsis etdiyi sayca beşincisi keçirilən “Qızıl Kəlmə” Ədəbi Mükafatına 5 nominasiya üzrə 100-dən artıq əsər təqdim olundu. Mayın 1-də mükafatın qaliblərə təqdimolunma mərasimi zamanı, komissiya üzvlərinin qərarına əsasən, beş əsas mükafatla yanaşı, daha iki əsəri fərqləndirən “Şans” ödülləri təqdim edildi. Nazirliyin təşkilatçılığı ilə 28-30 sentyabr tarixlərində Bakı İdman Sarayında V Bakı Beynəlxalq Kitab Sərgi-Yarmarkası keçirildi. Sərgi-Yarmarkada 100-ə qədər yerli, 20-dən artıq ölkəni (Türkiyə, Rusiya, Böyük Britaniya, İran, Hindistan, Pakistan, Belarus, Misir və s.) təmsil edən 51 xarici çap, poliqrafiya müəssisələri, kitabxanalar və digər qurumlar müxtəlif nəşr məhsullarını nümayiş etdirdilər, çoxsaylı tədbir keçirildi. Sərgi-Yarmarkanın ilk günündən başlayaraq kitabın təbliği və yayılması, gənc nəslin kitaba maraq və sevgisinin daha da artırılması, Azərbaycan oxucusunun dünyanın aparıcı nəşriyyatlarının məhsulları ilə tanışlığı, yerli və xarici nəşriyyat-poliqrafiya müəssisələri arasında yeni əməkdaşlıq imkanlarının yaradılması ilə bağlı qarşıya qoyulmuş məqsədə doğru uğurlu addımlar atıldı. Mədəniyyət və Turizm Nazirliyinin 2016-cı ildən etibarən Azərbaycan ədəbi-mədəni irsinin digər ölkələrdə təbliği məqsədilə həyata keçirdiyi “Azərbaycan Kitabının Dünyaya Tanıdılması” (AKDT) layihəsi çərçivəsində ümumilikdə 9 Azərbaycan ədəbiyyatı nümunəsi şair-yazıçı Yurtseven Şen tərəfindən Türkiyə türkcəsinə çevirilib, “Zengin Yayıncılık” Nəşrlər Evi tərəfindən çap edilərək oxucuların ixtiyarına verildi: 1) Yusif Vəzir Çəmənzəminli. “Qan içində” (İki od arasında), 2) Cəlil Məmmədquluzadə. “Danabaş kəndinin əhvalatları”, 3) Yusif Səmədoğlu. “Qətl günü”, 4) Əbdürrəhim bəy Haqverdiyevin hekayələri, I cild (“Xortdanın cəhənnəm məktubları”), 5) Əbdürrəhim bəy Haqverdiyevin hekayələri, II cild (“Ovçu Qasım”), 6) Mir Cəlal Paşayev. “Bir gəncin manifesti”, 7) İlyas Əfəndiyev. “Körpü salanlar”, 8) Fərman Kərimzadə. “Qarlı aşırım”, 9) Mir Cəlal Paşayev. “Füzulinin poetik xüsusiyyətləri” (elmi əsər)”.
İnformasiya və İctimaiyyətlə Əlaqələr Şöbəsindən onu da dedilər ki, Mir Cəlal Paşayevin “Füzulinin poetik xüsusiyyətləri” kitabının eyni zamanda Türkiyədə M.Füzuli yaradıcılığının tədris olunduğu bir sıra ali təhsil müəssisələrində dərs vəsaiti kimi istifadəsi düşünülür.
İnformasiya və İctimaiyyətlə Əlaqələr Şöbəsi əməkdaşlarının sözlərinə görə, ilkin mərhələdə özünü doğruldan AKDT layihəsinin yaxın gələcəkdə Türkiyə ilə yanaşı, digər ölkələrdə də davam etdirilməsi planlaşdırılır: “Azərbaycanın yaradıcı şəxslərinin həyat və yaradıcılığının ətraflı şəkildə öyrənilməsi, təbliği məqsədilə Azərbaycan Respublikası Prezidentinin müvafiq sərəncamlarına uyğun olaraq, görkəmli Azərbaycan şairi Molla Pənah Vaqifin 300 illiyi və şair-dramaturq Hüseyn Cavidin 110 illiyi təntənəli şəkildə qeyd edildi. Azərbaycan Respublikasının Mədəniyyət və Turizm Nazirliyi, Türkiyə Respublikasının Mədəniyyət və Turizm Nazirliyi, TÜRKSOY təşkilatı, Türk Mədəniyyəti və İrsi Fondu və Azərbaycan Milli Kitabxanasının birgə təşkilatçılığı ilə “Molla Pənah Vaqif ili”nin açılışı münasibətilə mart ayının 2-də TÜRKSOY-un qərargahında və mart ayının 3-də Sakarya Bələdiyyəsində kitab sərgisi və konfrans keçirildi. Azərbaycan nümayəndə heyətinin iştirakı ilə 2017-ci il noyabr ayının 2-də Ankara şəhərində Türkiyə Milli Kitabxanasında Molla Pənah Vaqifin anadan olmasının 300 illiyinə həsr olunmuş beynəlxalq elmi konfrans və Azərbaycan Milli Kitabxanasının fonduna məxsus olan Molla Pənah Vaqif əsərlərindən ibarət kitab sərgisi təşkil olundu. 4 noyabr 2017-ci il tarixində İstanbul Beynəlxalq Kitab Sərgisi çərçivəsində Azərbaycan pavilyonunda şair Molla Pənah Vaqifin 300 illik yubileyinə həsr olunan tədbir keçirildi. Mərasim zamanı Mədəniyyət və Turizm Nazirliyi tərəfindən nəşr olunmuş “Molla Pənah Vaqif”, Azərbaycan Milli Kitabxanasının hazırladığı “Molla Pənah Vaqif. Biblioqrafiya” və TÜRKSOY-un 12 dildə çap etdirdiyi “Dünya dillərində Molla Pənah Vaqif şeirləri” kitablarının təqdimatı oldu”.
İnformasiya və İctimaiyyətlə Əlaqələr Şöbəsindən verilən məlumata görə, kitabxana fondlarının uşaq ədəbiyyatı ilə zənginləşdirilməsi sahəsində konkret işlərin görülməsi məqsədilə nazirliyin “Bərpanəşr” layihəsi çərçivəsində kitabxanalarda 1 nüsxə qalmış nadir uşaq ədəbiyyatı nümunələrinin nəşri cari ildə də davam etdirildi, 30 adda Azərbaycan klassik uşaq ədəbiyyatı nümunələri çap olunub azyaşlıların ixtiyarına verilib: “Bu il də nazirliyin və Respublika Uşaq Kitabxanasının təşkilatçılığı ilə 2011-ci ildən etibarən həyata keçirilən “Uşaq Kitab Karvanı” layihəsi üzrə rayonlara (şəhərlərə) səfərlər təşkil edildi. Layihənin təşkilində başlıca məqsəd bölgələrdəki kitabxanaların uşaq şöbələri və filiallarında oxucuların sorğularını təmin etməklə kitaba olan ehtiyacın mümkün dərəcədə ödənilməsidir. Bu günə qədər layihə üzrə respublikamızın 22 rayonuna (şəhərinə) kitab karvanı yola düşmüş və regionlarda fəaliyyət göstərən kitabxanaların müvafiq bölmələrinə ümumilikdə 19 670 nüsxə uşaq ədəbiyyatı hədiyyə edilib. Azərbaycanın görkəmli ədəbiyyat xadimlərinin bədii yaradıcılığının təbliği və gənc, istedadlı şairlərin ortaya çıxarılması, cəmiyyətə tanıdılması məqsədilə Mədəniyyət və Turizm Nazirliyinin dəstəyi ilə “Söz” ədəbiyyat layihəsi çərçivəsində Xalq yazıçısı Anarla görüş, “Hüdudsuz”, “O2 - Oksigen”, “Zəhra”, “Güclü qadın” adlı tədbirlər və Xalq şairi Vaqif Səmədoğluna həsr olunmuş ədəbi-bədii gecə keçirildi. Heydər Əliyev Fondunun vitse-prezidenti Leyla Əliyevanın təşəbbüsü, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının, Mədəniyyət və Turizm Nazirliyinin “Söz” ədəbi layihəsinin təşkilatçılığı və Azərbaycan Yazıçılar Birliyinin dəstəyi ilə Qəbələdəki Heydər Əliyev Konqres Mərkəzində vətənpərvərlik mövzusuna həsr olunmuş “Poeziya günü” keçirildi”
2018-ci ildən gözləntilərə gəlincə, nazirliyin İnformasiya və İctimaiyyətlə Əlaqələr Şöbəsindən bildirildi ki, 2018-ci ildə də Mədəniyyət və Turizm Nazirliyi tərəfindən Azərbaycan ədəbi irsinin qorunması, inkişaf etdirilməsi, gənc nəsillərə təbliği və dünyaya tanıdılması ilə bağlı işlərin yüksələn xətt üzrə davam etdirilməsi, yeni-yeni mütərəqqi layihələrin həyata keçirilməsi planlaşdırılır.
Sözügedən şöbədən verilən məlumata görə, Belarusun Minsk şəhərində ənənəvi XXV Beynəlxalq Kitab Sərgi-Yarmarkasında Azərbaycanın Mədəniyyət və Turizm Nazirliyi ölkəmizin Belarusdakı Səfirliyinin dəstəyi ilə milli stend qurub.
Məlumata görə, Azərbaycanın stendi tərtibatı və kitabların çeşidinə görə sərginin mühüm stendlərindən biri kimi qiymətləndirilib: “Stenddə ümummilli lider Heydər Əliyevin həyat və fəaliyyəti, Azərbaycanın bugünkü həyatı, Dağlıq Qarabağ münaqişəsi, Xocalı soyqırımı, həmçinin, ölkəmizin tarixi ilə bağlı mühüm kitablar sərgilənir. İştirakçılar tərəfindən böyük maraqla qarşılanan milli stendimizi ziyarət edənlərə turizm imkanlarımız, mədəniyyətimiz, tariximiz, adət-ənənələrimiz, müasir ədəbiyyatımız haqqında geniş məlumat verilir, onlara jurnal, informasiya bukletləri paylanılır.
İradə SARIYEVA
