Kübra Əliyeva: “Hazırlanacaq kataloq ilk növbədə mənfur düşmənimiz olan ermənilərin xalçalarımızı…”
Ölkə daxilində və xaricdə muzey və şəxsi kolleksiyalarda saxlanan nadir Azərbaycan xalçaları barədə kataloq hazırlanacaq. Bu, Azərbaycan Prezidenti İlham Əliyevin imzaladığı sərəncamla təsdiq edilən “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nda əksini tapıb.
Dövlət Proqramına əsasən, Mədəniyyət və Turizm, İqtisadiyyat nazirlikləri, Milli Elmlər Akademiyası, Xalça Muzeyi, “Azərxalça” ASC 2018-2019-cu illərdə kataloqun hazırlanmasını təmin etməlidirlər. Eyni zamanda, “Azərxalça” ASC, İqtisadiyyat, Mədəniyyət və Turizm nazirliklərinə 2018-2019-cu illərdə itirilmə təhlükəsi olan nadir Azərbaycan xalçalarının və xalça məmulatlarının müasir üsullarla bərpasına dəstək mexanizmləri ilə bağlı təkliflərinin hazırlanması və aidiyyəti üzrə təqdim edilməsi tapşırılıb.
Nadir Azərbaycan xalçaları barədə kataloq hazırlanması barədə fikir bildirən professor, xalça mütəxəssisi Kübra Əliyeva “Bakı-Xəbər”ə açıqlamasında qeyd etdi ki, dünya muzeylərində əsasən XVI-XVII əsrə aid Azərbaycan xalçaları var. K.Əliyevanın sözlərinə görə, hazırlanacaq kataloq ilk növbədə mənfur düşmənimiz olan ermənilərin xalçalarımızı öz adlarına çıxarmaq cəhdlərinin qarşısını alacaq: “Bəllidir ki, vaxtilə bizim xalçalarımız müxtəlif adlar daşıyıb. SSRİ dönəmində bizim xalçalar rusların seçdikləri ad ilə tanınıb. Ondan əvvəl isə Azərbaycan xalçaları İran adı ilə adlanıb. Lətif Kərimovun kitabı çap olunandan sonra bütün dünya ölkələrində Azərbaycan xalçalarına münasibət dəyişib. Dünya alimləri hesab edirlər ki, Lətif Kərimovun 3 cildlik kitabı onların stolüstü kitabıdır. Danılmaz faktdır ki, dövlətimiz də xalçaçılığın inkişafı ilə məşğul olur. Bu sahə ilə bağlı bir neçə sərəncam imzalanıb, müxtəlif bölgələrdə hər il xalça fabrikləri tikilir və tikiləcək. Yenidən bu sənətin dirçəlməsi üçün şərait yaradılır. Ən əsası, bu sahənin inkişaf etməsi işsizliyin qarşısını alır. Məlumdur ki, Azərbaycan xanımları qədim dövrlərdə belə məhz bu sənətlə məşğul olublar. İndi məmnuniyyətlə hər kəs qeyd olunan sektorda çalışmağa qoşulur”.
Həmsöhbətimiz onu da vurğuladı ki, Azərbaycanın Birinci vitse-prezidenti Mehriban Əliyeva hansısa xarici ölkəyə səfər edən zaman mütləq orada sərgilər edir. Bu sərgilərdə Azərbaycan xalçaları ilk yerdə dayanır: “Bu da Azərbaycan xalçasına münasibəti dəyişir. Vaxtilə başqa ölkənin adı ilə təqdim olunan xalçaların Azərbaycan xalçası olduğunu insanlar öyrənir”.
K.Əliyeva xüsusi olaraq qeyd etdi ki, nadir Azərbaycan xalçaları barədə hazırlanan kataloq bir neçə dildə olacaq: “Çalışacağıq ki, kataloq 7 dildə olsun. Çünki ermənilər bizim maddi mədəniyyət abidələrini öz adlarına çıxarmaqla yanaşı, tərtib etdikləri kataloqu 7 dildə çap edirlər. Biz də Azərbaycan xalçaları ilə bağlı kataloqun 7 dildə olmasını arzu edirik”.
Günel CƏLİLOVA
