Tanınmış kinorejissor Şamil Əliyevin “Çölçü” filmi 6-cı VIRGIN SPRING CINEFEST-in “Ən yaxşı bədii film” mükafatına layiq görülüb. Buna görə də film GOIDEN GALAXY AWARD (Yaxşıların yaxşısı / best of the best) statusunu qazanıb. Bu barədə qəzetimizə Şamil Əliyev məlumat verib. Onun sözlərinə görə, mükafatı təqdimetmə mərasimi 2018-ci ilin oktyabr ayında Hindistanın Kolkata şəhərindəki “Rotary Sadan” mərkəzində keçiriləcək.
Qeyd edək ki, “Antonioni”, “Tarkovski”, “Qodar”, “Berqman” kino mükafatlarının nominantı olan Şamil Əliyevin “Çölçü” filmi 2012-ci ildə Azərbaycan Respublikası Mədəniyyət və Turizm Nazirliyinin sifarişi ilə “Azərbaycanfilm” kinostudiyasında istehsal olunub. Ş.Əliyevin “Çölçü” bədii filmi 5 (beş) qitəni əhatə edərək 37 (otuz yeddi) beynəlxalq kino festivalında iştirak edib, bir sıra mükafatlara layiq görülüb. Bu festivallar A və B kateqoriyalı festivallardır. Festivallar çərçivəsində iştirak etdiyi ölkələrin siyahısına ABŞ, Almaniya, Avstraliya, Birləşmiş Krallıq, İtaliya, İspaniya, Serbiya, Rusiya, Çexiya, Misir, İndoneziya, Hindistan, Türkiyə, Qazaxıstan, Tacikistan, Banqladeş, Ukrayna, Estoniya daxildir.
“Çölçü” filminin ssenari müəllifi Vidadi Həsənov, operatoru Rafiq Quliyev, rəssamları Rafiq Nəsirov və İbrahim Aminovdur. Filmdə Vidadi Həsənov, Bəhruz Vaqifoğlu, Cavidan Məmmədov və başqaları çəkiliblər. “Çölçü” filminin süjeti belədir: Şəhər həyatından uzaqda, təbiətlə ünsiyyətdə gənc çölçü yaşayır. Atası Ulu ona çölçülük həyatının sirlərini öyrədir. Atası vəfat edəndən sonra o, qəsəbədən gəlmiş qızla tanış olur. Bu qızla tanışlıq onun həyatında yeni səhifə açır, böyük, onun tanımadığı dünyaya daxil olur...
LEYLA
