Gələn həftə Yunanıstan hökuməti SOCAR (Azərbaycan Dövlət Neft Şirkəti) ilə DESFA qaz operatorunun səhm nəzarət paketinin satışı ilə bağlı danışıqları bərpa edəcək.
"Trend"in "Ekathimerini" qəzetinə istinadən verdiyi məlumata əsasən, bu barədə Yunanıstanın yenidənqurma, ekologiya və energetika naziri Panos Skurletis deyib. O bildirib ki, SOCAR-a satılacaq DESFA-da iştirak payı müzakirələrin əsas mövzusu olacaq.
Xatırladaq ki, may ayında "Bloomberg" agentliyinin yaydığı xəbərə görə, Yunanıstan hökuməti DESFA-da satılan payın 66%-dən 49%-dək endirilməsi niyyətindədir. Belə ki, Yunanıstanın yeni hökuməti dövlət şirkətlərinin nəzarət paketinin hökumətdə qalmasını istəyir.
Bu danışıqların hansısa səmərəsi ola bilərmi?
Neft məsələləri üzrə ekspert İlham Şaban qəzetimizə açıqlamasında bildirdi ki, bu məsələdə son qərar Yunanıstan hakimiyyətindən asılıdır:"Yunanıstanda yaşanan iqtisadi böhran DESFA-nın taleyində qeyri-müəyyənliyə səbəb oldu. Noyabrın ayından bu məsələ səngidi. Sonra orda hakimiyyət dəyişikliyi baş verdi. Tamamilə əks qütbün nümayəndələri hakimiyyəti ələ keçirdi. Bundan sonra bütün müqavilələrə yenidən baxıldı. Belə bir şərt qoyuldu ki, ölkəyə aidiyyəti olan müqavilələrdə pay 51 faizdən aşağı olmamalıdır. Bu da SOCAR-ın malik olduğu 66 faizlik payın taleyini şübhə altında qoydu. Yunanıstanın tələbi həmin payın 49 faizə endirilməsi idi. Azərbaycan tərəfi isə Rövnəq Abdullayevin dili ilə onlara cavab vermişdi ki, biz tender sənədlərindən kənara çıxa bilmərik. Yenidən bu istiqamətdə danışıqlar bərpa edilirsə, son sözü Yunanıstan hakimiyyəti deməlidir. Prinsip etibarı ilə SOCAR-ın həmin müqaviləyə heç bir etirazı yoxdu".
Məhəmmədəli QƏRİBLİ
