Akif Nəsirli: “Fermerlərin əkdikləri ərzaq buğdası un istehsalı üçün aşağı keyfiyyətli sayılır”
Ölkənin Muğan zonasında cari təsərrüfat ilində taxıl əkininin həcmi azalıb.Rəsmi statistikaya əsasən, Muğanda taxıl əkinində ən çox azalma İmişli rayonunda müşahidə olunur.
Ötən təsərrüfat ilində rayonda 9 min 136,5 hektar sahədə buğda, 7 min 384,5 hektar sahədə arpa əkilmişdisə, bu il 2 min 509,7 hektar sahədə buğda və 6 min 844 hektar sahədə arpa əkilib. Analoji hal Cəlilabad və Biləsuvar rayonlarında da qeydə alınıb.
Fermerlər azalmanın əsas səbəbini məhsulun qiyməti ilə əlaqələndirir. Onların sözlərinə görə, 2024-cü ilin təsərrüfat ilində məhsulun bir kiloqramının qiyməti ötən illə müqayisədə xeyli azalaraq 55-60 qəpikdən 35-40 qəpiyə düşüb. Buna görə də fermerlər bu il pambıq, noxud və bostan bitkilərinin əkininə daha çox üstünlük veriblər.
Maraqlıdır, məlum problem necə həll olunmalıdır və fermerlər niyə digər bitkilərin əkininə üstünlük verir?
“Azərbaycanın bütün bölgələrində yetişdirilən ərzaq buğdasının keyfiyyəti aşağıdır, bu səbəbdən də un istehsalında daha çox idxal buğdadan istifadə olunur”
Liberal İqtisadçılar Birliyinin rəhbəri Akif Nəsirli “Bakı-Xəbər”ə açıqlamasında qeyd etdi ki, fermerlərin əkdikləri ərzaq buğdası un istehsalı üçün aşağı keyfiyyətli sayılır: “Ümumiyyətlə, Azərbaycanın bütün bölgələrində yetişdirilən ərzaq buğdasının keyfiyyəti aşağıdır. Bu səbəbdən də un istehsalında daha çox idxal buğdadan istifadə olunur. Daxildə istehsal olunan ərzaq buğdası isıə heyvandarlıq yemi üçün istifadə olunur. Ona görə yerli buğdanın qiyməti aşağı olur. Nəzərə almaq lazımdır ki, idxal olunan ərzaq buğdası yüksək keyfiyyətə malikdir, 80 faiz un əldə olunur ancaq yerli buğdaların un çıxımı 50-60 faizdir. Həmçinin, alınan unun keyfiyyəti xarici buğdadan alınan unla müqayisədə aşağı olur. Bu səbəbdən də yerli istehsal olan buğdanın qiyməti aşağıdır. Belə olan halda fermerlər digər məhsulların əkilməsinə üstünlük verir. Məlum problemi həll etmək üçün ölkə daxilində yüksək keyfiyyətli buğda sortları yetişdirilməlidir. Bunun üçün seleksiya ilə məşğul olan alimlər iş görməli, müasir tələblərə cavab verən buğda sortu istehsal edilməlidir”.
Həmsöhbətimiz hesab edir ki, ölkədə taxıl istehsalı stimullaşdırılmalıdır. Belə olarsa fermerlər qiymət ucuzlaşan vaxtı zərərçəkməsin: “Bununla yanaşı, ölkənin taxıl ehtiyatı fondu var. O da məlumdur ki, Dövlət Taxıl Fondunun doldurulması məhz idxal hesabına həyata keçirilir. Zənnimcə, ölkə daxilində keyfiyyətli buğda istehsal edilsə, Taxıl Fondunun doldurulması yerli istehsal hesabına başa gələr. Bu hal bazarda qiymətin normal saxlanmasına səbəb ola bilər”.
Günel CƏLİLOVA
