Bank kreditlisi ölsə, ya intihar etsə...

Tarix: 10.06.2015 / 02:10
Bölmə: İqtisadiyyat

Rəşad Həsənov: "Banklar kredit ayırarkən müştərinin ödəmə qabiliyyətini düzgün qiymətləndirməlidir ki, kredit borcuna görə özünəqəsd halları baş verməsin"

Ramin Məmmədov: "Şəxs hər hansı səbəbdən intihar edirsə, onun banka olan borcunun qaytarılmasını sığorta şirkəti nəzərdə tutmur"

Son zamanlar ölkədə problemli kreditlərin sayı artmaqda davam edir. Bankdan götürdüyü krediti geri qaytara bilməyənlərin bəzisi çıxış yolunu intiharda görür.
Maraqlıdır, kreditə görə intihar edən şəxsin kredit borcunu kim ödəməlidir? Yoxsa həmin şəxs öləndən sonra onun krediti bağlanmış olur?
Sığorta şirkətinin nümayəndəsi Ramin Məmmədovun sözlərinə görə, şəxs hər hansı səbəbdən intihar edirsə, onun banka olan borcunun qaytarılmasını sığorta şirkəti nəzərdə tutmur. Kredit götürən şəxs sərxoş halda, narkotik təsiri altında, yaxud qərəzli şəkildə, qəsdən törətdiyi qəza, hadisə nəticəsində sağlamlığını itirirsə, sığorta ödənişi edilmir: "Ağır xəstəlik nəticəsində əmək qabiliyyətinin itirilməsi, yaxud ölümlə bağlı da istisnalar var. Əslində sığorta şirkətləri vətəndaşın həyatını sığortalamazdan əvvəl onun hansı xəstəlikləri olduğunu yoxlamalıdır.
Sağalmaz xəstələrin həyatı sığortalanmır. Amma təcrübədə sığorta şirkətləri hər kəsi ayrı-ayrılıqda müayinəyə göndərməkdənsə, onlara bir sorğu blankı doldurmağı təklif edir. İnsan daha əvvəl hər hansı xəstəlikdən əziyyət çəkdiyini müqavilədə qeyd etməyibsə, bu da sığorta ödənişindən imtinaya səbəb ola bilər. Əgər şəxs ürək çatışmazlığından əziyyət çəkib, bunu müqavilədə qeyd etməyibsə belə, hadisə baş verərkən araşdırılır. Ölümün səbəbi məhz ürək çatışmazlığıdırsa, onda mümkündür ki, sığorta şirkəti ödəniş verməkdən imtina etsin. Sığorta şirkəti borcu qaytarmaqdan imtina etdikdə bank bu öhdəliyi şəxsin əmlakı varsa, əmlakına yönəldir. Əks halda zaminlərdən, varislərdən bu borc tələb olunur".
İqtisadçı-ekspert Rəşad Həsənov bizimlə söhbətində qeyd etdi ki, insanlar banklardan krediti müxtəlif məqsədlərlə götürür: "Dünyada insanlar kredit götürməsinə görə qruplara ayrılır: biznes krediti, ipoteka krediti götürənlər və sair. Azərbaycanda isə əhalinin əksəriyyəti banklara daha çox istehlak kreditləri üçün müraciət edir. İstehlak krediti əsasən həyat səviyyəsini daha da yaxşılaşdırmaq üçün götürülən kredit hesab olunur. Çox təəssüf ki, bizdə insanlar istehlak kreditini həyat səviyyəsini daha da yaxşılaşdırmaq üçün deyil, yaranmış borclarını ödəmək, hər hansı problemdən yaxa qurtarmaq üçün götürür. Bu da nəticədə insanları bataqlıqdan çıxmaq istəyərkən uçuruma yuvarlayır. Yəni bankdan pul götürüb digər banka borcunu ödəmək istəyərkən daha da artıq borc altına girir. Bu halın ortaya çıxmasında, təbii ki, bankların rolu böyükdür. Çünki banklar müştərini düzgün qiymətləndirməyə çox vaxt meylli olmur. Xarici ölkələrdə banka istehlak krediti üçün müraciət edən müştərinin gəlirləri dəqiq yoxlanır. Bizdə isə banklar daha çox krediti ayırdıqdan sonra müştərinin yaxasına çöküb pulu tələb edir. Bu gün Azərbaycanda bankların çox yüksək faizlə kredit təklif etməsi isə yaranmış vəziyyəti daha da çətinləşdirir. Çarəsiz insanlar əliyandımda bankdan kredit götürüb bir problemini həll edərkən özlərini daha böyük problemə salır. Xüsusilə istehlak kreditlərinin faiz dərəcələri çox yüksək həddədir. Bu isə, təbii olaraq, problemli kredit həcminin artmasına səbəb olur. Ona görə də banklar kredit ayırarkən müştərinin ödəmə qabiliyyətini düzgün qiymətləndirməli, eyni zamanda kreditlərin faiz dərəcələrini aşağı salmalıdır ki, kredit borcuna görə özünəqəsd halları baş verməsin.
Yaranmış problemdən başqa çıxış yolu bankların müştəridən aldığı komisyon haqların bir hissəsini sığortaya yönəltməsindədir. Bu gün banklar müştəridən tutduğu komisyon haqqın hamısını gəlir kimi özünə saxlayır. Ola bilər ki, bank əldə etdiyi komisyon haqqın bir hissəsini sığortaya ödəsin. Belə olduqda gələcəkdə kreditin ödənməsində problem yarandıqda sığorta şirkəti həmin müştəriyə kömək edə bilər".
Günel CƏLİLOVA

DİGƏR XƏBƏRLƏR

Tarix: 09.07.2026 / 19:05

Azərbaycana diri heyvan idxal edən iri şirkətlər əsas məlumatları "gizli" saxlayır...

Tarix: 09.07.2026 / 17:56

Britaniya “Zəngəzur” tankerini sanksiya siyahısından çıxardı

Tarix: 08.07.2026 / 15:30

"Avropa Yaşıl Enerji Dəhlizi" layihəsi icra mərhələsinə keçdi

Tarix: 08.07.2026 / 10:53

Beyləqanda şəkər çuğunduru fiaskosu...

Tarix: 07.07.2026 / 20:28

Sahibkarlara böyük şans açılır - üstəlik “qapı-qapı gəzməyə” son veriləcək...

Tarix: 07.07.2026 / 20:11

İran müharibəsi qlobal enerji təminatında yeni böhran yaradıb...

Tarix: 07.07.2026 / 16:35

Beyləqanın Əlinəzərli kəndində fermerlər üçün aqrar sığorta təlimi keçirilib

Tarix: 07.07.2026 / 12:56

Azərbaycanda vençur kapitalı fondları yaradılacaq...

Tarix: 06.07.2026 / 21:45

Ermənistan Azərbaycanla Türkiyənin elektrik şəbəkəsinə qoşulmaq istəyir...

Tarix: 06.07.2026 / 21:05

Avropanın daha bir dövləti Azərbaycanın Orta Dəhliz layihəsinə qoşulur...

Tarix: 06.07.2026 / 19:25

Ermənistan məhsullarının Avropaya çatdlrılmasında ağır problemlər yarandı...

Tarix: 06.07.2026 / 17:09

Rusiya Azərbaycan vasitəsilə Ermənistana 30 vaqon propan göndərdi

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 09.07.2026 / 21:52

İrandan Trampa “İrəvan mesajı” - sülh olmasa, TRIPP marşrutuna dözmərik...

Tarix: 09.07.2026 / 19:38

Vətəndaşın məmurlarla birbaşa ünsiyyətində sıfır hədd - rəqəmsallaşma dövrünün hədəfi...

Tarix: 09.07.2026 / 18:51

Çin və ABŞ-ın mübarizə apardığı Gürcüstan limanında Azərbaycan həlledici söz sahibinə çevrilir...

Diasporumuza Rusiyada problemlər yaradılandan sonra Avropa, Amerika istiqamətində fəallıq başladı...