Vergilər Nazirliyi MMC-in qeydiyyatı məsələsində inqilab etdi
İlqar Hüseynli: "Ümumi götürəndə Vergilər Nazirliyinin bu addımı müsbət dəyərləndirilməlidir"
"Belə olacağı halda ölkədə qeyri-neft sektoru, ən başlıcası, kiçik və orta sahibkarlıq daha da inkişaf edəcək"
Azərbaycanda şirkətlərin elektron qeydiyyatı və fərdi sahibkarların vergi qeydiyyatına alınması prosesi ciddi surətdə sadələşdirilib. Belə ki, Vergilər Nazirliyinin qərarı ilə "Kommersiya hüquqi şəxslərin onlayn qeydiyyatı" elektron xidməti üzrə inzibati reqlamentə dəyişikliklər edilib.
Bu dəyişikliklərə əsasən, yerli vətəndaşlar tərəfindən yaradılan Məhdud Məsuliyyətli Cəmiyyətlərin elektron dövlət qeydiyyatı müddəti 3 gündən 1 günə endirilib. MMC-lərin sürətli elektron qeydiyyatı isə 1 iş gün əvəzinə dərhal yerinə yetiriləcək.
Qeydiyyatla bağlı digər dəyişiklik tələb olunan sənədlərə aiddir. Yeni qaydalara görə, elektron qeydiyyat zamanı MMC-nin yaradılması barədə qərar tələb olunmayacaq. Sadəcə, hüquqi şəxsi elektron qeydiyyatdan keçirmək istəyən şəxs tələb olunan məlumatları daxil etdikdən sonra həmin məlumatlar əsasında sistem özü təsis qərarı hazırlayır.
Bununla yanaşı, nazirliyin qərarı ilə fərdi sahibkarların onlayn qeydiyyatı qaydaları da dəyişdirilib. "Fərdi sahibkarların onlayn qeydiyyatı" elektron xidməti üzrə inzibati reqlamentdə edilən dəyişikliyə əsasən, elektron qeydiyyat üçün müraciət etmiş fiziki şəxslərin onlayn qeydiyyatı dərhal həyata keçirilməlidir. Belə ki, fərdi sahibkarın e-qeydiyyatı İnternet Vergi İdarəsi Portalının "Onlayn kargüzarlıq və e-VHF" bölümü üzərindən aparılır.
Yeni qaydalara görə, fiziki şəxslərin müraciətindən sonra onların elektron formatda vergi uçotuna alınması dərhal həyata keçirilir və müvafiq şəhadətnamə onlar üçün ayrıca yaradılmış elektron ünvana real vaxt rejimində göndərilir.
Bütün bunlar ölkədə kiçik və orta sahibkarlığın inkişafına necə təsir göstərəcək?
Məsələyə münasibət bildirən ekspert İlqar Hüseynli Vergilər Nazirliyinin son dəyişikliklərinin kiçik və orta sahibkarlığın inkişafına müsbət təsir göstərəcəyi qənaətindədir: "Bundan əvvəl "Vahid pəncərə" sisteminin tətbiqinə start verildi. Nəticədə kiçik və orta sahibkarlıq subyektlərinin birbaşa, eyni zamanda tez qeydiyyata alınması xeyli sürətləndi. Orta sahibkarlıq subyektlərinin inkişafı üçün elektron qeydiyyatın əhəmiyyəti böyükdür. Ümumi götürəndə Vergilər Nazirliyinin bu addımı müsbət dəyərləndirilməlidir. Çünki bu, kiçik və orta sahibkarlığın inkişafına yardım edir.
Ancaq bütün bunlarla yanaşı, yaxşı olardı ki, kiçik və orta sahibkarlığın inkişafı üçün güzəştli kreditlərin verilməsi daha da genişləndirilsin.
Yerli-yersiz yoxlamaların qarşısı alınsın. Həmçinin, hesabatlılıq qaydalarının daha da sadələşdirilməsinə ehtiyac var. Hesabatlılıq qaydalarının prinsiplərinin sadələşdirilməsinə daha çox zərurət duyulur. Belə olacağı halda ölkədə qeyri-neft sektoru, ən başlıcası kiçik və orta sahibkarlıq daha da inkişaf edəcək".
