Rusiyanın ABŞ-da prezident seçkilərinin nəticələrinə bilavasitə təsir etməkdə suçlanması, belə görünür, bəzi ölkələrin nəzərində onun reytinqinin yüksəlməsilə nəticələnib.
Belə ki, bu günlərdə Fransanın prezidentliyə namizədi Mari Le Pen, prezident seçilərsə, Fransanın Krımı Rusiya ərazisi kimi tanıyacağını bəyan edib. ABŞ-da Respublikaçılar partiyasının namizədi Donald Trampın gözlənilmədən demokrat Hillari Klintonu məğlub etməsində Moskvanın iddia olunan "kiber fəaliyyəti" nəzərə alınarsa, Le Penin bu bəyanatının əslində Moskvaya çağırış olduğu şübhə doğurmur.
Ultrasağçı “Milli Cəbhə” partiyasının lideri onu da deyib ki, əslində Krımın Ukraynaya əvvəldən heç bir aidiyyəti olmayıb. Onun sözlərinə görə, bu, sovet dövrünün özündən sonra regiona miras qoyduğu administrativ problemdir. Mari Le Pen özünün Krımın Rusiyaya məxsusluğunu qəbul etdiyini, lakin prezident seçilərsə, bütün Fransanın, həm də rəsmi olaraq bunu qəbul edəcəyini bildirib. Fransalı prezidentliyə namizədin bu açıqlaması isə onun seçki kampaniyasında Rusiyadan dəstək istəyi kimi də interpretasiya oluna bilər.
Ən azı ona görə ki, qətiyyətlə təkzib olunsa da, Rusiya bu məsələdə artıq “təcrübə yiyəsi” hesab olunur...
Samirə
