"Bunun başqa adı yoxdur, ola da bilməz"
Azərbaycanda tariximizə aid hər hansı bir əlamətdar hadisə yaxınlaşırsa, erməni təbliğat maşını həmin dəqiqə işə salınır və o hadisələrin təhrif olunmasına start verilir. Bir neçə gündən sonra Azərbaycan ümummilli matəmlə 20 Yanvar şəhidlərini və həmin hadisələri yad edəcək.
Bizim tariximiz üçün bu gün nə dərəcədə matəm xarakteri daşısa da, o dərəcədə də şərəflidir. Çünki həmin tarixi gündə əliyalın insanlar rus tanklarının qabağına çıxaraq, müstəqillik və azadlıq tələb edirdi. Erməni təbliğat maşını isə bu hadisəni təhrif edərək, tamamilə başqa rakursdan təqdim edir. İddia olunur ki, guya həmin vaxt rus əsgərləri Azərbaycanda, xüsusilə də Bakıda yaşayan ermənilərin kütləvi deportasiyasının qarşısını almaq üçün bu qırğını törədib. Ermənilərin bu məkrli planı nədən xəbər verir?
Tarix üzrə fəlsəfə doktoru Səyyar Əliyev qəzetimizə açıqlamasında bildirdi ki, ermənilərin bu məkrli siyasəti onların bizə olan nifrəti və düşmənçiliyindən qaynaqlanır: "Bu o qədər də qədim tarix deyil ki, sübut edilməsi çətin olsun. Ona görə də biz alimlər, siz jurnalistlər bu məsələyə həssas yanaşaraq, onların bu iddialarına layiqli cavab verməliyik. Çünki indi yazılan tarix bir neçə əsrdən sonra etibarlı mənbəyə çevrilə bilir. Bilirsiniz ki, 1988-ci ildən başlayaraq Azərbaycanda milli azadlıq hərəkatı geniş vüsət almağa başlayıb. 1989-cu ildə Azərbaycan xalqı meydanlara çıxaraq müstəqillik tələb edirdi. Təsadüfi deyil ki, dünyanın bir neçə nüfuzlu təşkilatı həmin il azərbaycanlıları "İlin xalqı" nominasiyasına layiq görüb. Bunun ardınca Azərbaycanda sərhəd hərəkatı başladı. Rus imperiyasının vaxtından olan sərhədlər söküldü. İndi bunları danışmaq çox asandır, amma imperiyanın mövcud olan zamanında atılan addımların məsuliyyəti çox ağır idi. Həmin proseslərə kimi ermənilər Dağlıq Qarabağa qarşı ərazi iddiası qaldırmışdı. Bu zəmində yaranan qarşıdurmalardan sonra, 1988-ci ildən başlayaraq 200 mindən artıq azərbaycanlı öz ata-baba yuvalarından, tarixi torpaqlarından deportasiya edildi. Vəziyyətin belə olduğunu görən ermənilər könüllü şəkildə Azərbaycanı tərk etməyə başladı. Yəni tarixi faktlar sübut edir ki, 1990-cı ildə Azərbaycanda çox az sayda erməni qala bilərdi. Həmin tarixdə ermənilərin ölkədən kütləvi deportasiyasını biz istəsəydik də həyata keçirə bilməzdik. Çünki deyilən sayda erməni burada qalmamışdı. Bunu ermənilərin növbəti ağ yalanı saya bilərik. Rus ordusu 1990-cı ildə Azərbaycanda qalxan milli azadlıq hərəkatını yatırmaq üçün ölkəmizə soxulub. Bunun başqa adı yoxdur, ola da bilməz".
Məhəmmədəli QƏRİBLİ
