"Bunlar hamısı sanki robotdur və onların qarşısında hansı kağız qoyulursa, onu oxuyurlar"
Ermənistan beynəlxalq humanitar normalara, müharibənin yazılmış və yazılmamış qanunlarına növbəti dəfə hörmətsizlik nümayiş etdirməkdədir. Məlum olduğu kimi, dekabrın 29-da Azərbaycan-Ermənistan sərhədində baş vermiş döyüşlərdən sonra ordumuzun əsgəri Çingiz Qurbanovun cəsədi düşmənin nəzarətində olan ərazidə qalıb.
Beynəlxalq Qırmızı Xaç Komitəsinə müraciət olunsa da, erməni tərəfi cəsədi qaytarmaqdan imtina edir. Görünən odur ki, ermənilərin əlinə hələ 90-cı illərin əvvəllərindən Qarabağ döyüşlərində istifadə etdikləri praktikanı - cəsədlərdən qisas almağı və bununla alver etməyi yenidən işə salmaq fürsəti düşüb. Bundan başqa, bir neçə il əvvəl Qarabağda erməni mövqelərini darmadağın edən, onları ciddi itkiyə məruz qoyan Milli Qəhrəmanlar Mübariz İbrahimov və Fərid Əhmədovun cənazələrini düşmən tərəfi uzun müddət qaytarmaqdan imtina etdi. O zaman Rusiya prezidenti olan Medvedyevin vasitəçiliyindən sonra qarşı tərəf cəsədləri qaytardı.
Bu məsələdə diqqətçəkən məqamlardan biri də odur ki, ATƏT-in Minsk Qrupu sanki bunları görməzdən gəlir. Faktiki olaraq bu humanitar situasiyaya müdaxilə etmir. Halbuki, bir neçə il bundan əvvəl Ermənistana məxsus olan hərbi helikopter vurulanda onlar dərhal narahatlığını ifadə etmişdi. Müxtəlif vasitələrlə prosesə təsir etməyə çalışırdılar. Ancaq, nədənsə, Azərbaycan əsgərinin cəsədinin geri qaytarılması üçün bunu etmirlər. Sözügedən məsələni şərh edən hərbi ekspert Üzeyir Cəfərovun fikrincə, Azərbaycan əsgərinin cəsədinin düşmənin əlində olması böyük hiddət doğuran haldır: "Azərbaycan əsgərinin cansız bədənini ermənilərdən alıb ailəsinə təhvil vermək üçün nə beynəlxalq qurumlar, nə də ABŞ, Rusiya, Fransa bir addım atır. 2014-cü ildə Azərbaycan ordusu erməni helikopterini vuranda ATƏT sədrinin şəxsi nümayəndəsi Anjey Kasprşik həmin helikopterin qalıqlarını və meyitləri almaq üçün gecə ilə İrəvandan Bakıya gəldi. Azərbaycanın siyasi və hərbi rəhbərliyi ilə görüşüb bu məsələni qaldırdı. Bütün bunlar onu göstərir ki, Azərbaycan qərar verməlidir. 2017-ci il Dağlıq Qarabağın taleyində ən ağır illərdən biri olacaq. Hiss olunur ki, böyük dövlətlər Dağlıq Qarabağı tanımaq istiqamətində işləyirlər. Faktiki olaraq Rusiya bu sahədə fəal hərəkətə keçib. Nikolay Bordyujanın səsləndirdiyi fikirdən sonra Rusiya XİN açıqlama yaydı, ancaq digər dövlətlər səsini çıxarmadı.
ATƏT-in yeni avstriyalı sədrinin çıxışına baxdım. Adam əsəbləşməyə bilmir. Bunlar hamısı sanki robotdur və onların qarşısında hansı kağız qoyulursa, onu oxuyurlar. Həmin mətnlərdə isə tarix, mübtəda və xəbərin yeri dəyişir və bunu yeni fikir kimi bizə təqdim edirlər. Belə hiyləgər sədrləri çox görmüşük".
Vidadi ORDAHALLI
