Rusiyanın Ankaradakı səfirinə silahlı hücum olub. Baki-xebr.com-un Türkiyə KİV-nə istinadən verdiyi xəbərə görə, insident "Rusiya türklərin gözü ilə" fotosərgisinin açılışı zamanı baş verib.
Şahidlərin sözlərinə görə, Müasir İncənətə Evindəki sərgi salonuna daxil olan naməlum silahlı şəxs səfir Andrey Karlova atəş açıb. Səfir ağır vəziyyətdə hadisə yerinin yaxınlığındakı xəstəxanaya çatdırılsa da, onun həyatını xilas etmək mümkün olmayıb.
Silahlı hücumda səfirdən başqa 3 nəfər də yaralanıb.
Hadisədən sonra polis və xüsusi təyinatlılar binanı mühasirəyə alıb əməliyyat keçirilib. Təxminən 15 dəqiqə davam edən qarşıdurmanın ardından silahlı şəxs öldürülüb.
İlk məlumatlara görə, silahlı şəxs səfirə arxadan yaxınlaşaraq atəş açmağa başlayıb. Onun 25 - 30 yaşlarında olduğu bildirilir.
Rusiya Xarici İşlər Nazirliyi sözçüsü Mariya Zaxarova da Ankara səfiri Karlovun öldüyünü təsdiqləyib. Zaxarova, Moskvanın Karlovun vurulmasını terror hücumu kimi dəyərləndirdiyini deyib.
Səfirə qarşı silahlı hücumu Birləşmiş Millətlər Təşkilatının Təhlükəsizlik Şurasında qaldıracaqlarını söyləyən Zaxarova, terrorizmlə mübarizənin davam edəcəyi mesajını verib.
Kremlin sözçüsü Dmitri Peskov isə səfir Karlova hücumla bağlı Rusiya Xarici İşlər Nazirliyi və kəşfiyyat qurumları tərəfindən Rusiya prezidenti Vladimir Putinə hesabat təqdim edildiyini deyib.
