Dünən Beynəlxalq Mətbuat Mərkəzində Azərbaycan Respublikası Ərazilərinin Ermənistan silahlı qüvvələrinin işğalı nəticəsində itki və tələfatların qiymətləndirilməsi üzrə işçi qrupu və Azərbaycanlı girovlar Dilqəm Əsgərov və Şahbaz Quliyevin Hüquqlarını Müdafiə Komitəsinin birgə toplantısı keçirildi.
Xatırladaq ki, Kəlbəcər rayonunun ermənilər tərəfindən işğal edilmiş Şaplar kəndində erməni silahlı qüvvələrinin 2014-cü ilin yayında həyata keçirdikləri əməliyyat nəticəsində əslən azərbaycanlı Dilqəm Əsgərov və Şahbaz Quliyev girov götürülmüş, Həsən Həsənov qətlə yetirilmişdi. Dağlıq Qarabağdaki qondarma rejimin qurduğu saxta məhkəmədə Dilqəm Əsgərov ömürlük, Şahbaz Quliyev isə 22 il azadlıqdan məhrum edilib. Hər iki soydaşımız heç bir cinayət törətməyib, Kəlbəcərə getməkdə məqsədləri işğal edilmiş ata-baba yurdlarına baş çəkmək, əzizlərinin məzarını ziyarət etmək idi.
Toplantı iştirakçıları girovların hüquqlarının müdafisə ilə bağlı görülən işlərdən və qarşıda duran məsələlərdən danışıb. Mətbuat Şurasının sədri, millət vəkili Əflatun Amaşov girovların azad olunması uğrunda dövlət səviyyəsində görülən tədbirlərdən danışıb, Milli Məclisin deputatı Xahnhüseyn Kazımlı Londonda Diplomatik Prores İnstitutunda vəkillərlə keçirdiyi görüş barədə məlumat verib. Çıxış edənlər bildiriblər ki, Prezident İlham Əliyev beynəlxalq müstəvidə dəfələrlə bu məsələni qaldraraq, əsirlikdə olan bütün əsir və girovların azad olunmasını tələb edib. Lakin bütün tələblər bugünədək cavabsız qalıb.
Azərbaycanlı girovlar Dilqəm Əsgərov və Şahbaz Quliyevin Hüquqlarını Müdafiə Komitəsinin sədri Əlövsət Ağalarov yarandığı qısa vaxt ərzində komitənin gördüyü işlər barədə qısa məlumat verib: “Müdafiə komitəsinin təsis olunduğu gün Azərbaycan Respublikasının Prezidenti cənab İlham Əliyevə, beynəlxalq təşkilatlara, Rusiyanın Azərbaycandaki səfirinə müraciətlər qəbul etdik. İşçi qrupunun üzvləri Ukraynadan gəlmiş beynəlxalq səviyyəli hüquqşünaslar, akademik O.V.Zayçuk, professor L.D.Timçenko və professor A.A.Mereşko ilə Bakıda görüş keçirdik. Məqsədimizi izah etdik, problemin çözüm yolların aradıq. Onlar da bizimlə həmfikir olduqlarını bəyan etdilər və o görüşdə bizə bir yol xəritəsi çəkdilər. Bugünlərdə Kiyevdə keçirilən Ümumukrayna azərbaycanlılarının IV forumunda məsələ ilə bağlı bizim müraciətimiz də oxundu və qərara alındı ki, Dilqəmlə Şahbazın müdafiə komitəsinin Ukaynada da özəkləri yaradılsın. Hədəfimiz məsələnin beynəlxalq müstəvidə həllinə nail olmaqdır”.
Azəri Türk Qadınları Birliyinin sədri Tənzilə Rüstəmxanlı da problemin beynəlxalq səviyyədə ictimailəşməsinə nail olmağın vacibliyini bildirib: “Dünyanın tanıdığı və qəbul etdiyi Azərbaycan sərhəddində Kəlbəcər Azərbaycan torpağıdır və bu adamlar heç bir cinayət törətmədən ata-babalarının qəbrini ziyarət etməyə gediblər. Öncə bunu dünyaya anlatmalı, sonra beynəlxalq hüqüqlarımızdan istifadə etməliyik”. Digər çıxış edənlər – millət vəkili Elman Nəsirov, Akif Nağı, Azər Həsrət, Fəxrəddin Paşayev və başqaları da Dilqəmlə Şahbazın azad olunması üçün bütün beynəlxalq hüquqlarımızdan istifadə etməyin vaxtı çatdığını və nəyin hesabına olursa olsun soydaşlarımızın erməni girovluğundan azad edilməsi üçün bütün imkanlardan istifadə edilməli olduğunubildiriblər.
Baki-xeber.com
