Bu gün səhər saatlarında Xəzərdə faciə baş verib. SOCAR “Azneft” İstehsalat Birliyinin N.Nərimanov adına Neft Qazçıxarma İdarəsində (NQÇİ) baş vermiş hadisə ilə əlaqədar ilkin məlumat yayıb.
Şirkətdən “Trend”-ə verilən məlumata görə, 15.12.2016-cı il tarixində səhər saat 05 radələrində Xəzər dənizində 41 metr/saniyə sürəti ilə əsən güclü külək “Azneft” İB-nin N.Nərimanov adına NQÇİ-nin 3 saylı Neft Yığım Məntəqəsinin sağ və sol hissəsində yerləşən estakadanın uzunluğu təqribən 150 metr olan hissəsini dənizə uçurub. Estakadanın həmin hissəsi özü ilə birlikdə ona bitişik olan meydançanı və üzərindəki yaşayış budkasını da uçurub.
İlkin məlumata əsasən, hadisə nəticəsində Neft Yığım Məntəqəsinin növbədə olan 5 nəfər və yaşayış budkasında olan 5 nəfər (cəmi 10 nəfər) əməkdaşı itkin düşüb. Bunlar Zülfüqarov Güloglan (maşinist), Zülfüqarov Azay (operator), Qurbanov Vidadi (operator), Həsənov Elçin (mexanik), Hacıəliyev Həsənağa (operator), Qafarov İlham (operator), Əsədov Samir (operator), Bəhrəmov Cavid (operator), Abbasov Ramiz (maşinist) və Rüstəmov Qorxmazdır (operator).
Hadisə yerinə dərhal Fövqəladə Hallar Nazirliyi və Xəzər Dəniz Gəmiçiliyi İdarəsinin gəmiləri cəlb olunub. Axtarış-xilasetmə işləri davam etdirilir. FHN, SOCAR və “Azneft” İB-nin rəhbərliyi hadisə yerindədir.
N.Nərimanov adına NQÇİ-də baş vermiş hadisə ilə əlaqədar "Azneft" İB-də qərargah yaradılıb. SOCAR-dan verilən məlumata görə, 15.12.16-cı il tarixində N.Nərimanov adına NQÇİ-də baş vermiş hadisə ilə əlaqədar Azneft İstehsalat Birliyində (Bakı şəhəri, Neftçilər Prospekti 73) qərargah yaradılıb.
Qərargahın əlaqə telefonları:
+994 12 521 11 44
+994 12 521 12 82
+994 50 841 10 62
+994 50 841 12 09
Azərbaycan Dövlət Dəniz Administrasiyası dənizdə baş vermiş qəza ilə bağlı məlumat yayıb. Administrasiyasının mətbuat xidmətindən verilən məlumatda bildirilir ki, bu gün səhər saatlarında Qaradağ rayonu Liman Nəzarət Müfəttişliyi tərəfindən Milli Mərkəzə daxil olan məlumata əsasən Səngəçal estakadasının “NST-3” buruğunun qülləsi kəskin hava şəraiti nəticəsində aşıb.
Baş vermiş hadisə ətraflı dəyərləndirilərək Dövlət Dəniz Administrasiyasının Uzaq Məsafədən Tanınma və İzləmə Milli Mərkəzi tərəfindən dərhal bütün müvafiq təşkilatlar məlumatlandırılaraq, mümkün axtarış və xilasetmə əməliyyatları nəzərə alınmaqla yaxınlıqda olan gəmilər - “Gültəkin Əsgərova”, “Vadim Seyidov”, “Vixr-5” hadisə yerinə yönəldilib.
İkinci mərhələdə isə “Caspian Provider”, “ Caspian Pride” və “Lənkəran” gəmiləri qəzanın fəsadlarının aradan qaldırılması məqsədilə hadisə yerinə cəlb edilib.
Hazırda qəzanın nəticələrinin aradan qaldırılması və suya düşməsi ehtimal olunan şəxslərin axtarışı prosesi Milli Mərkəzi tərəfindən koordinasiya edilərək daim nəzarətdə saxlanılır.
Fövqəladə Hallar Nazirliyi (FHN) isə dənizdə baş vermiş qəza nəticəsində itkin düşmüş neftçilərin axtarışına helikopter cəlb edib. Nazirliyin mətbuat xidmətindən verilən məlumata görə, axtarış işlərinə Fövqəladə Hallar Nazirliyinin “Vixr-5” və “Vixr-8” gəmiləri, nazirliyin Xəzər Hövzə Qəza-xilasetmə Xidmətinin “Svetlomor-2” gəmisi, həmçinin çətin hava şəraitinə baxmayaraq FHN-in Aviasiya dəstəsinin bir helikopteri cəlb olunub.
“Azneft” İB-nin baş mühəndisi Balamirzə Ağarəhimov deyib ki, Xəzərdə baş vermiş qəza nəticəsində itkin düşən neftçilərdən birinin meyiti tapılıb. Onun sözlərinə görə, bu, İlham Əlihüseyn oğlu Qafarovun meyitidir: “Meyit gəminin göyərtəsinə qaldırılıb, itkin düşənlərin axtarışları davam edir”.
B.Ağarəhimov əlavə edib ki, hadisə yerinə FHN-in, Sərhəd Qoşunlarının, Azərbaycan Xəzər Dəniz Gəmiçiliyinin və özəl şirkətlərin gəmiləri cəlb edilib: "Bundan başqa, FHN-in helikopteri cəlb olunub".
