Dekabrın 9-da - Beynəlxalq Korrupsiyaya Qarşı Mübarizə Günündə Beynəlxalq Antikorrupsiya Akademiyasının Avstriyada yerləşən mənzil - qərargahında magistr proqramını başa vurmuş məzunların növbəti buraxılış mərasimi keçirilib. Akademiya korrupsiyaya qarşı mübarizə üzrə biliklərin artırılması və peşəkarlığın təkmilləşdirilməsi sahəsində dünyada ilk təhsil ocağı olmaqla, həmçinin beynəlxalq təşkilat statusunda fəaliyyət göstərir.
Mərasimdə BMT-nin Narkotiklər və Cinayətkarlıq Ofisinin, digər beynəlxalq təşkilatların, diplomatik nümayəndəliklərin təmsilçiləri, Avstriya hökumətinin yüksək vəzifəli şəxsləri iştirak edib.
Dünyanın 17 ölkəsindən olan 26 tələbə arasında 5 azərbaycanlı - Milli Məclisin Beynəlxalq əlaqələr şöbəsinin əməkdaşı Vüqar Məmmədov, Xarici İşlər Nazirliyinin əməkdaşı Süleyman Rüstəmov, Bakı Beynəlxalq Dəniz Ticarət Limanının əməkdaşı Məftun Abbasov, eləcə də proqramı fərqlənmə ilə bitirmiş Korrupsiyaya Qarşı Mübarizə üzrə Komissiyanın katibi Kamal Cəfərov və Baş prokuror yanında Korrupsiyaya qarşı Mübarizə Baş İdarəsinin böyük prokuroru Elnur Musayev Akademiyanının magistr proqramının məzunu olub.
Buraxılış mərasimində bütün məzunlar adından magistr qrupunun rəhbəri Elnur Musayev internet vasitəsilə dünyaya yayımlanan çıxışında Prezident İlham Əliyevin rəhbərliyi ilə korrupsiyaya qarşı mübarizə sahəsində ölkəmizdə həyata keçirilən məhkəmə-hüquq islahatları, institusional və cinayət təqibi tədbirləri haqqında ətraflı məlumat verib, eyni zamanda dünya ictimaiyyətinə Akademiyanın inkişafına dəstək verməsi yönündə müraciət edib.
Akademiyanı bitirən məzunlara "Korrupsiyaya qarşı mübarizə üzrə mütəxəssis" adı verilməklə diplomlar təqdim olunub.
Bundan başqa, dekabrın 5-də Çirkli Pulların Yuyulmasına Qarşı Mübarizə üzrə Sertifikatlaşdırılmış Ekspertlər Assosiasiyasının müvafiq imtahanını uğurla keçmiş Korrupsiyaya Qarşı Mübarizə üzrə Komissiyanın katibi Kamal Cəfərov çirkli pulların yuyulmasına qarşı mübarizə üzrə ekspert sertifikatına layiq görülüb.
Azərbaycan Respublikası bundan sonra da korrupsiyaya qarşı mübarizə sahəsində ixtisaslaşmış ekspertlərin hazırlanması istiqamətində səylərini davam etdirəcək.
