Arzu Nağıyev: "Övladdan valideynə qarşı istifadə etmək həm də mənəviyyata zidd əməldir"
Dövlət Təhlükəsizliyi Xidməti əməkdaşlarının həyata keçirdiyi əməliyyat zamanı həbs olunan "reket jurnalist"lər son 10 ildə qanunsuz fəaliyyətlə məşğul olub, müəyyən vəzifəli insanların uşaqları ilə bağlı qanunsuz çəkilişlər aparıb.
Bunu jurnalistlərə açıqlamasında Dövlət Təhlükəsizliyi Xidmətinin rəisi Mədət Quliyev deyib. Onun sözlərinə görə, "reket jurnalist"lər bu cür videogörüntülərlə həmin şəxslərdən pul tələb edib: "Bu qalmaqallı məsələdir. Jurnalistlər qanunsuz fəaliyyətlə məşğul olub. Bununla bağlı Dövlət Təhlükəsizliyi Xidmətində cinayət işi qaldırılıb və məsələyə hüquqi qiymət veriləcək".
Məlumat üçün qeyd edək ki, bu günlərdə DTX "Bizim dövr" qəzetinin redaktoru Surxay Əliyevi və onun müavinini, habelə "Gündəlik Bakı" qəzetinin redaktoru Habil Vəliyevi həbs edib. DTX-nin açıqlamasına görə, həmin şəxslər gizli videoçəkilişlər aparmaqla və digər qanunsuz yollarla şantajla məşğul olub, hədə-qorxu yolu ilə şantaj olunan şəxslərdən pul qoparıb.
Ədliyyə Nazirliyinin məlumatına əsasən, Azərbaycanda KİV-lərin sayı 5100-ü ötüb. Bu KİV-lərin bir qismi işini peşəkar səviyyədə qurub. Ancaq bir qismi də var ki, onlar mətbuat adına, jurnalistika adına ləkədir. Məqsədləri vətəndaşları müxtəlif yollarla şantaj etməklə, onlara hədə-qorxu gəlməklə pul tələb etmək olan belələri "reket jurnalist" kimi tanınır.
Sözügedən məsələni dəyərləndirən ekspert Arzu Nağıyevin fikrincə, əməliyyat-axtarış fəaliyyəti həyata keçirməyə icazəsi olmayan şəxslərin belə texnikalardan istifadə etməsi artıq qanunsuzluq, cinayətdir: "Belə texnikanı bu şəxslərə kim verib? Niyə verib? Bu sualların cavabı bir çox mətləbləri üzə çıxaracaq. Mədət Quliyevin də açıqlamasından bəlli oldu ki, hazırda cinayət işi başlanıb, istintaq gedir. İstintaqın "reket jurnalist"lərin hansı vəzifə sahibləri, iş adamlarına dair nə vaxt, hansı üsulla, hansı texniki vasitələrdən istifadə etməklə şantaj materialları topladığını ortaya qoyacağına əminəm. Bu adamların hərəkətlərindən belə nəticəyə gəlmək olur ki, Azərbaycan mentalitetini biliblər, iş adamlarını, vəzifə sahiblərini övladları ilə şantaj ediblər. Övladdan valideynə qarşı istifadə etmək həm də mənəviyyata zidd əməldir. Hər bir insanın bir zəif cəhəti var. Bu cəhətlərdən istifadə edib nüfuzdansalma elementləri toplamaqla gizlinləri yayacaqları ilə təhdid ediblər. Düşünürəm ki, burada bəzi xüsusi xidmət orqanı nümayəndələrinin təlimatlarından yararlanıblar. Bunlar özbaşına belə addımlar ata bilməzdi. Atsaydılar belə, bu çox qısamüddətli olar, 10 il davam edə bilməzdi. Düşünürəm ki, bu şəxslərin həbs olunmasında əsas məqsəd ötən 10 il ərzində onların bütün əlaqələrinin ortaya çıxarılmasıdır. Cinayət işinin başlanması zərərçəkənlərin dairəsinin müəyyən edilməsi və himayədarlarının, yol göstərən şəxslərin, vəzifəsindən və tutduğu mövqedən asılı olmayaraq, müəyyən edilərək istintaqa cəlb edilməsinə xidmət edir".
Vidadi ORDAHALLI
